سولتۇستىك قازاقستان وبلىسىندا ونلاين رەجىمدە جۇرگىزىلگەن اقىندار ءمۇشايراسى مارەگە جەتتى. ونىڭ تاقىرىبى اتى جامان ىندەتكە قارسى كۇرەسىپ جاتقان دارىگەرلەر مەن پوليتسيا قىزمەتكەرلەرىنىڭ حالىق الدىنداعى ولشەۋسىز ەڭبەگىن دارىپتەۋ.
وسى تاقىرىپتى ويلاپ تاۋىپ, اقىنداردىڭ ەرەكشە ءمۇشايراسىن قولعا العان وبلىستاعى اقىندار مەكتەبىنىڭ توراعاسى جارقىن جۇپارحان. ونىڭ ايتۋىنا قاراعاندا مۇشايراعا وبلىستىڭ بارلىق تۇكپىرلەرىنەن 20 اقىن قاتىسقان. ولاردىڭ جاستارى 15 پەن 35 جاس ارالىعىندا. مۇشايراعا قاتىسقان اقىنداردىڭ شىعارمالارىن الدىمەن قازىلار القاسى قاراپ, سەگىزىن عانا كونكۋرسقا جولداعان. وسى اقىنداردىڭ ولەڭدەرى الەۋمەتتىك جەلىلەر ارقىلى حالىققا تانىستىرىلعان.
سەگىز اقىننىڭ اراسىنان سۋىرىلىپ شىققان, وبلىسقا بەلگىلى جاس اقىن امانجول زاعىپار بولدى. ونىڭ ولەڭى بۇگىنگى ىندەتتىڭ زاردابىن سوعىس ورتىمەن ۇشتاستىرىپ, ۇتىمدى قيۋلاستىرىلعان ەكەن. ايتاتىن ويلارى, اقىندىق شەبەرلىگى دە باسقالارعا قاراعاندا جوعارى بولدى. ءسويتىپ ول 100 مىڭ تەڭگەلىك باس جۇلدەنى قانجىعاسىنا بايلادى. ەكىنشى ورىندى جۋرناليست نۇرگۇل وقاشەۆا جانە جۇلدەلى ۇشتىكتى جۇمابەك راحىموۆ تۇيىندەدى. بۇلاردىڭ ەسەپشوتتارىنا 60,80 مىڭ تەڭگەدەن جۇلدە ءتۇستى.
كارانتيندىك رەجىمدە دە اقىنداردى شىڭداپ, زار شاعىنان ايىرماي جانە ىندەتكە توتەپ بەرىپ جاتقان جانداردىڭ رۋحىن ءسوز قۇدىرەتىمەن كوتەرىپ جۇرگەن جارقىن جۇپارحان قاتىسقانداردىڭ بەلسەندىلىكتەرىن جوعارى باعالاپ, ولاردىڭ ولەڭدەرىندە سارۋايىمشىلدىققا سالىنۋشىلىققا جول بەرىلمەي, وتانسۇيگىشتىك رۋحتىڭ زور بولعانىن اتاپ ءوتتى.
قىزىلجار