وسىدان ءدال 36 جىل بۇرىن, ياعني 1984 جىلدىڭ 8 مامىرىندا كسرو ءوز سپورتشىلارىن اقش-تىڭ لوس-اندجەلەس قالاسىندا وتەتىن XXIII جازعى وليمپيا ويىندارىنا جىبەرۋدەن رەسمي تۇردە باس تارتقان ەدى.
1980 جىلى اقش باستاعان بىرقاتار كاپيتاليستىك مەملەكەت ماسكەۋ وليمپياداسىنا بويكوت جاريالاعان بولاتىن. سوعان جاۋاپ رەتىندە كسرو-نىڭ وليمپيادالىق كوميتەتى لوس-اندجەلەستەگى جارىسقا قاتىسپاۋ جونىندە شەشىم قابىلدادى. ماسكەۋ تاراپىنان قابىلدانعان بۇل شەشىمدى البانيا, انگولا, افگانيستان, بولگاريا, ۆەتنام, گدر, يەمەن, كۋبا, لاوس, ماجارستان, موڭعوليا, پولشا, سولتۇستىك كورەيا, چەحوسلوۆاكيا, ەفيوپيا, جوعارعى ۆولتا, يران جانە ليۆيا قولدادى.
وليمپيا ويىندارىنىڭ وزىنە كەلەتىن بولساق, 1984 جىلدىڭ 28 شىلدەسىندە باستالعان ءدۇبىرلى دودا 12 تامىز كۇنى ءوز مارەسىنە جەتتى. وعان 140 مەملەكەتتەن كەلگەن 6829 سپورتشى قاتىستى. ولار 23 سپورت ءتۇرى بويىنشا باق سىناپ, 221 جۇلدە جيىنتىعىن ساراپقا سالدى.
جالپى كوماندالىق ەسەپتە اقش قۇراماسى جەكە-دارا كوش باستادى. جارىس قوجايىندارى 83 التىن, 61 كۇمىس جانە 30 قولانى ولجالادى. ەكىنشى جانە ءۇشىنشى ورىندارعا رۋمىنيا (20+16+17) مەن گفر (17+19+23) تابان تىرەدى.