وتان قورعاۋشىلار كۇنى قارساڭىندا ەلىمىزدىڭ قاۋىپسىزدىگىن جانە بەيبىت ازاماتتاردى قورعاۋدا تۇرعان ادامداردىڭ ەڭبەگى اتاپ ءوتىلدى. ءوزىنىڭ كۇندەلىكتى جاۋىنگەرلىك ەڭبەگىمەن قارۋلى كۇشتەردىڭ جاۋىنگەرلىك دايىندىعىن جانە قازاقستاننىڭ قورعانىس قابىلەتىن نىعايتۋعا ۇلەس قوسقاندار كەزەكتى اسكەري اتاقتار, مەملەكەتتىك جانە ۆەدومستۆولىق ناگرادالارمەن ماراپاتتالدى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.
پرەزيدەنتتىڭ «جوعارى اسكەري جانە ارناۋلى اتاقتار, سىنىپتىق شەندەر جانە بىلىكتىلىك سىنىپتار بەرۋ تۋرالى» جارلىعىمەن «گەنەرال-لەيتەنانت» اسكەري اتاعى قورعانىس ءمينيسترى نۇرلان ەرمەكباەۆقا, قورعانىس ءمينيسترىنىڭ ءبىرىنشى ورىنباسارى – باس شتاب باستىعى مۇرات بەكتانوۆقا, قورعانىس ءمينيسترىنىڭ ورىنباسارى تيمۋر داندىباەۆقا, سونداي-اق تۇڭعىش پرەزيدەنت - ەلباسى اتىنداعى ۇلتتىق قورعانىس ۋنيۆەرسيتەتىنىڭ باستىعى سۇلتان كامالەتدينوۆكە بەرىلدى. سونىمەن قاتار, پرەزيدەنت جارلىعىمەن 21 اسكەري قىزمەتشى مەملەكەتتىك ناگرادالارعا يە بولدى.
كاسىبي مەرەكە قارساڭىندا قورعانىس مينيسترلىگىندە قارۋلى كۇشتەردىڭ اسكەري قىزمەتشىلەرىنە قۇرمەت كورسەتۋ ءراسىمى ءوتتى. جەكە قۇرامداعى ماراپاتقا يە بولعانداردىڭ نەگىزگى بولىگى راسىمگە بەينەبايلانىس رەجيمىندە قاتىستى.
قورعانىس ءمينيسترىنىڭ بۇيرىعىمەن 15 وفيتسەرگە مەرزىمىنەن بۇرىن اسكەري اتاقتار بەرىلدى, سەگىز اسكەري قىزمەتشى «ەل قورعانى» ۆەدومستۆولىق ناگرادالارىمەن ماراپاتتالدى.
ولاردىڭ ىشىندە الماتى قالاسىندا پاترۋلدەۋگە قاتىسۋ بارىسىندا كاسىبيلىك تانىتقان ەكى كۋرسانت بار. اتاپ ايتقاندا, قۇرلىق اسكەرلەرى اسكەري ينستيتۋتىنىڭ كۋرسانتى باحىتجان باراتوۆ, راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتى بولات ەرسۇلتان.
سونىمەن قاتار قر قم زاڭ دەپارتامەنتىنىڭ باستىعى «زاڭ سالاسىنىڭ ۇزدىگى» توسبەلگىسىمەن ماراپاتتالدى.
قورعانىس ءمينيسترى نۇرلان ەرمەكباەۆ جەكە قۇرامدى قۇتتىقتادى.
ء«بىز سىزدەرمەن جاڭا ادىستەردى قولدانا وتىرىپ, ونداعان كوماندالىق-شتابتىق وقۋ-جاتتىعۋلار مەن جاتتىعۋلاردى وتكىزدىك. جەدەل دايىندىقتىڭ ماڭىزدى شارالارىنىڭ ءبىرى, ەل پرەزيدەنتى - قارۋلى كۇشتەردىڭ جوعارعى باس قولباسشىسىنىڭ قاتىسۋىمەن وتكەن «ايبالتا» ستراتەگيالىق كوماندالىق – شتابتىق وقۋ–جاتتىعۋى بولدى», – دەپ اتاپ ءوتتى ول.
مينيستر ءبىزدىڭ كونتينگەنتتەر شەتەلدە ءتۇرلى وقۋ-جاتتىعۋلارعا قاتىسىپ, ەلىمىزدىڭ اۋماعىندا دا بىرلەسكەن ءىس-شارالار وتكىزگەنىن ەسكە سالا كەتتى.
«بىتىمگەرشىلىك قىزمەتىندە ماڭىزدى قادام جاسالدى. قازىرگى قارۋلى كۇشتەر تاريحىندا العاش رەت ءبىز «ليۆانداعى بۇۇ ۋاقىتشا كۇشتەرى» ميسسياسىنا قاتىسۋ ءۇشىن دەربەس بىتىمگەرشىلىك بولىمشەنى جىبەردىك. مەن يراكتا, اۋعانستانمەن شەكاراداعى تاجىكستاندا, كوت-د-يۆۋاردا, باتىس ساحارادا جانە نەپالدا بىرقاتار ميسسيالاردى ورىنداۋعا قاتىسقان سىزدەردىڭ بارلىقتارىڭىزعا ريزاشىلىعىمدى بىلدىرەمىن», – دەدى ەرمەكباەۆ.
سونداي-اق ارىس قالاسىندا تج سالدارىن جويۋ بويىنشا دا بەلسەندى جۇمىستار جۇرگىزىلۋدە.
مينيستر ءوز قۇتتىقتاۋىندا بيىلعى جىلى وتان قورعاۋشىلار كۇنى ەل تاريحىندا العاش رەت توتەنشە جاعداي ەنگىزىلگەن ەرەكشە جاعدايلاردا اتاپ وتىلەتىندىگىن اتاپ ءوتتى. ول مىڭداعان اسكەري قىزمەتشى كوروناۆيرۋستىڭ تارالۋىن بولدىرماۋ بويىنشا قاجەتتى شارالاردى قامتاماسىز ەتە وتىرىپ, ءوز بورىشىن ابىرويمەن اتقاراتىنىنا نازار اۋداردى. سونىمەن قاتار ولار جارعىلاردا دا, لاۋازىمدىق نۇسقاۋلىقتاردا دا جازىلماعان ماڭىزدى نارسەلەردى ءوز دەنساۋلىعىنا قاۋىپ توندىرە وتىرىپ ورىندايدى.
«قارۋلى كۇشتەردىڭ اسكەري قىزمەتشىلەرى بۇكىل ەل بويىنشا مىڭداعان نىساندار مەن ونداعان ميلليون شارشى مەترگە دەزينفەكتسيا جۇرگىزدى, بلوكبەكەتتەردە قىزمەت اتقارىپ, پاترۋلدەۋ جۇرگىزدى, جۇزدەگەن وتانداستاردى ەۆاكۋاتسيالادى جانە شەت ەلدەن گۋمانيتارلىق كومەك كورسەتتى. قاۋىپ-قاتەرلەرگە قارسى تۇرۋداعى جوعارى دايىندىق دەڭگەيىن كورسەتكەن بارلىق اسكەري-مەديتسينالىق مەكەمەلەر جۇمىلدىرىلدى», – دەپ اتاپ ءوتتى مينيستر.
بۇل رەتتە جۇزدەگەن اسكەري قىزمەتشىلەر ءوز مىندەتتەرىن ۇيىنەن مىڭداعان شاقىرىم جەردە, دالالىق جاعدايىندا ورىندادى.
«وسى قيىن-قىستاۋ كەزەڭدە ءبىزدىڭ جاۋىنگەرلەرىمىزدىڭ جوعارى كاسىبيلىگى, بورىشقا ادالدىعى, اسكەري باۋىرلاستىق جانە ءوزارا كومەك كورسەتۋ سياقتى قاسيەتتەرى ايقىن كورىندى. قاراپايىم ادامدار ءۇشىن بۇل اۋىر سىناق بولسا, ال اسكەري قىزمەتشىلەر ءۇشىن بۇل كەزەكتى جاتتىعۋ», – دەدى نۇرلان ەرمەكباەۆ.
قورعانىس ۆەدومستۆوسىنىڭ باسشىسى قيىن ۋاقىتتا ەل مەن حالىقتىڭ مۇددەلەرى ءۇشىن اسكەري قىزمەتشى بولۋعا ارنايى جيىندارعا شاقىرىلۋعا ءوز ەركىمەن نيەت بىلدىرگەن بىرنەشە مىڭ جاستارمەن ماقتانا الاتىن ويىمەن ءبولىستى.
قورعانىس ءمينيسترى جەكە قۇرام مەن وتباسىلارىن ۇلى وتان سوعىسىنداعى جەڭىستىڭ 75 جىلدىعىمەن قۇتتىقتادى.
«9 مامىردا ادامزات ناسىلىنە, دىنىنە نەمەسە الەۋمەتتىك مارتەبەسىنە قاراماستان بەيبىتشىلىك پەن تەڭدىك قۇقىعى ءۇشىن سوعىستى جەڭىپ الدى. اتا-بابالاردىڭ ەرلىگى ارقاشان جادىمىزدا ساقتادى. ولار وتانىمىزعا تاۋەلسىزدىك, ال ۇرپاقتارىنا بەيبىت اسپاندى وسيەت ەتكەن.
ءبىزدىڭ ورتاق مىندەتىمىز – تاۋەلسىز قازاقستان تاريحىندا وسىنداي وقيعا ەشقاشان قايتالانباۋى ءۇشىن, ءبىزدىڭ حالقىمىز بەن بولاشاق ۇرپاقتىڭ قاۋىپسىزدىگىن ساقتاۋعا كۇن سايىن كومەك كورسەتۋ», – دەدى مينيستر.