ۇلتتىق قاۋىپسىزدىك كوميتەتى شەكارا قىزمەتىنىڭ اقپاراتى بويىنشا, 2020 جىلعى 30 ساۋىردە قازاقستاندىق شەكاراشىلار بورتىندا ازەربايجاننىڭ 4 ازاماتى بار «بايدا» ۇلگىسىندەگى شاعىن كولەمدى كەمەنى ۇستادى. بۇل وقيعا تۇنگى ساعات 03:55-تە ۇلىق (راكۋشەچنىي) مۇيىسىنەن وڭتۇستىككە قاراي 30 ميل قاشىقتىقتا بولعان. بۇل تۋرالى ءسىم ءباسپاسوز قىزمەتى حابارلادى.
ۇستالعان كەمە قازاقستان رەسپۋبليكاسى اۋماقتىق سۋلارىنان تابىلدى. شەكارانى بۇزۋشىلار شەكارا كاتەرى ەكيپاجىنىڭ حالىقارالىق تەڭىز زاڭناماسىنا سايكەس كەمەنى توقتاتۋ تۋرالى تالاپتارىنا قاراماستان ءتيىستى جاۋاپ قايتارماي, مەملەكەتتىك شەكارا كاتەرىنىڭ الدىندا سوقتىعىسۋعا قاۋىپ توندىرە وتىرىپ, ۇلكەن جىلدامدىقتا قاۋىپتى مانەۆر جاساعان.
شەكارا بۇزۋشىلارىن قۋ 1 ساعات 40 مينۋتقا سوزىلىپ, ناتيجەسىندە «قازاقستان رەسپۋبليكاسى مەملەكەتتىك شەكاراسى تۋرالى» زاڭنىڭ تالاپتارىنا سايكەس كەمەنى ماجبۇرلەپ توقتاتۋ ءۇشىن شەكاراشىلار قارۋ قولدانعان. وسىلايشا, قارۋدان اۋاعا 25 ەسكەرتۋ, 87 رەت ءجۇرۋ باعىتى بويىنشا جانە 185 رەت شەكارا بۇزۋشىلاردىڭ كەمە قوزعالتقىشتارى بويىنشا وق اتىلدى.
قارۋدى قولدانۋ سالدارىنان ءۇش قۇقىق بۇزۋشى جاراقات الدى. ۇستاۋ كەزىندە زارداپ شەككەندەرگە دەرەۋ العاشقى مەديتسينالىق كومەك كورسەتىلدى. قابىلدانعان شارالارعا قاراماستان, جاعاعا كەلگەن كەزدە جەدەل جاردەم دارىگەرلەرىمەن ۇستالعان ادامداردىڭ ءبىرىنىڭ قايتىس بولعانى انىقتالدى.
قازىرگى تاڭدا قازاقستان رەسپۋبليكاسى قۇزىرەتتى ورگاندارى ۇستالعاندارعا قاتىستى قر قىلمىستىق كودەكسىنىڭ 392-بابى 1-بولىگىنە سايكەس مەملەكەتتىك شەكارانى بۇزۋ فاكتىسى بويىنشا تەرگەۋ ءىس-شارالارىن جۇرگىزۋدە.قر ۇقك شق حابارلاعانداي, ۇستالعان ءتورت براكونەردىڭ ۇشەۋى 2017 جىلى ىسپەتتەس ءتارتىپ بۇزعانى ءۇشىن قازاقستان زاڭناماسىنا سايكەس 6 ايعا باس بوستاندىعىنان ايىرىلعان.
قازاقستان تاراپى قازا تاپقان ازەربايجان ازاماتىنىڭ وتباسىنا كوڭىل ايتادى. بۇگىن تاڭەرتەڭ قازا تاپقان ادامنىڭ دەنەسى ازەربايجان تاراپىنا بەرىلدى.
بۇل وقيعا تۋرالى تولىق اقپارات ازەربايجان تاراپىنا جىبەرىلدى.
قازاقستان تاراپى ازەربايجان ازاماتتارىنىڭ قازاقستان مەملەكەتتىك شەكاراسىن بۇزۋ فاكتىلەرىنىڭ جيىلەنۋىنە الاڭداۋشىلىق بىلدىرەدى. 2017 جىلدان باستاپ قازىرگى ۋاقىتقا دەيىن 41 ءار ازاماتى ۇستالدى, ونىڭ 33-ءى قازاقستان مەملەكەتتىك شەكاراسىن بۇزعانى ءۇشىن سوتتالدى.