بۇگىن قازاقتىڭ داڭقتى بالۋانى, قازاقستاننىڭ ەڭبەك ەرى جاقسىلىق ۇشكەمپىروۆتىڭ تۋعان كۇنى. ابىز اقساقال 69 جاسقا تولىپ وتىر.
جاقسىلىق ءامىرالى ۇلى 1951 جىلدىڭ 6 مامىرىندا جامبىل وبلىسى بايزاق اۋدانىنىڭ تەگىستىك اۋىلىندا دۇنيەگە كەلدى. ەركىن كۇرەسپەن ەكى جىل عانا اينالىسقانىنا قاراماستان ول قازاقستان چەمپيونى اتىندى. سوعان قاراماستان 20 جاستاعى جىگىتتىڭ بۇل تابىسىن «كەزدەيسوقتىق» دەپ ەسەپتەگەن باپكەرلەر ونى قۇراماعا المادى. سوعان وكپەلەگەن جاقسىلىق گرەك-ريم كۇرەسى ۇيىرمەسىنە اۋىستى. كۇرەستىڭ بۇل تۇرىندە كەيىپكەرىمىزدىڭ تولاعاي تابىستارعا قول جەتكىزگەنى بارشا جۇرتقا ءمالىم.
جاقسىلىق ۇشكەمپىروۆتىڭ سپورتتىق عۇمىرىنداعى ەڭ زور تابىسى – ماسكەۋ وليمپياداسىنىڭ التىن مەدالى. سول جارىستا قانداسىمىز رۋمىنيالىق كونستانتين الەكساندرۋ, پولشالىق رومان كەرپاچ, ماجارستاندىق فرەنتس شەرەش جانە بولگاريالىق پاۆەل حريستوۆتى ۇتىپ, «ماڭگى توزباس اتاققا» قول جەتكىزدى. سونىمەن قاتار. جاقاڭ بىرنەشە رەت كسرو چەمپيوناتىندا توپ جارىپ, ەۋروپا بىرىنشىلىگىنىڭ كۇمىس مەدالىن يەلەندى. 1981 جىلى وسلودا وتكەن الەم چەمپيوناتىنىڭ جەڭىمپازى اتانعاننان كەيىن داڭقتى بالۋان بوز كىلەممەن قوش ايتىستى.