كاسىپقوي رينگتەگى ءوزىنىڭ سىرالعى قارسىلاسى ءارى وتانداسى مايك تايسوننىڭ جاتتىعۋدى باستاپ, سپورت زالدا تەر توگىپ جاتقانىن ەستىگەن ايگىلى ەۆاندەر حوليفيلد تە شارشى الاڭعا ورالعىسى كەلەتىنىن مالىمدەدى.
بيىل كۇزدە 58 جاسقا تولعالى وتىرعان ەۆاندەردىڭ دە سپورتىق مانسابىندا جارقىن جەڭىستەر از بولعان جوق. 1983 جىلى پانامەريكا ويىندارىندا كۇمىس جانە 1984 جىلى لوس-اندجەلەس وليمپياداسىندا قولا مەدالدى يەلەنگەن اقش-تىڭ الاباما شتاتىنىڭ تۋماسى عالامدىق دودا اياقتالعان بەتتە كاسىپقوي رينگتكە كۇش سىناسۋعا بەل بۋدى. 27 جىلعا جۋىق ۋاقىت بويى جۇدىرىقتاسقان حوليفيلد 57 كەزدەسۋ وتكىزىپ, 44 رەت جەڭىسكە جەتتى. 29 قارسىلاسىن نوكاۋتقا جىبەردى. 10 مارتە ۇتىلدى. ەكى رەت تەڭ ءتۇسىپ, تاعى ءبىر باسەكەنىڭ ناتيجەسى ەسەپكە الىنعان جوق. ول ءبىرىنشى اۋىر جانە اسا اۋىر سالماقتا بىرنەشە مارتە ەڭ بەلدى نۇسقالار بويىنشا الەم چەمپيونى جانە ءابسوليۋتتى چەمپيون اتاعىن يەلەندى. ەۆاندەر 49 جاسقا كەلگەن شاعىندا عانا بىلعارى قولعابىن شەگەگە ءىلدى.
اتىشۋلى مايك تايسونمەن ەۆاندەر ءحوليفيلدتىڭ جولى ەكى مارتە قيىستى. 1996 جىلدىڭ 9 قاراشاسىندا وتكەن باسەكە 11 راۋندتا توقتاتىلدى. ەۆاندەر مايكتى قارسىلاسىن اۋىر سوققىلاردىڭ استىنا العاننان سوڭ تورەشى اراشا ءتۇستى. 1997 جىلدىڭ 29 شىلدەسىندە ءحوليفيلدىڭ قۇلاعىن ەكى رەت وڭدىرماي تىستەگەنى ءۇشىن تايسون رينگتەن قۋىلدى.