وزبەكستان پرەزيدەنتى شاۆكات ميرزيەەۆ سىرداريا وبلىسىنداعى سۋ قويماسى بوگەتىنىڭ بۇزىلۋىنان سۋ باسقان قازاقستاننىڭ تۇركىستان وبلىسىنداعى ەلدى مەكەندەردە اپات سالدارىن جويۋعا قاجەتتى كومەك بەرۋگە دايىن ەكەنىن ءبىلدىردى.
وزبەكستان پرەزيدەنتى ءباسپاسوز قىزمەتىنىڭ مالىمەتىنە سۇيەنسەك, 27 ساۋىرگە قاراعان ءتۇنى اپات كەزىندە بۇحارا مەن سىرداريا وبلىستارىنداعى 38 مىڭنان استام ۇيگە, 847 الەۋمەتتىك نىسان مەن ەگىستىكتەرگە زالال كەلگەن.
ء«بىز تابيعي اپاتتىڭ زاردابىن جويۋ ءۇشىن بارلىق قاجەتتى شارالاردى قولدانۋدامىز. ۇكىمەتتىك كوميسسيا تاۋلىك بويى جۇمىس ىستەپ تۇر. بۇگىنگە دەيىن الەۋمەتتىك نىسانداردىڭ 70 پايىزى جانە ۇيلەردىڭ 20 پايىزىنىڭ شاتىرلارى جابىلعان. سونداي-اق 5 000 شاقىرىم ەلەكتر جەلىسى, 1100 ترانسفورماتور جوندەلگەن. وكىنىشكە قاراي, وسى ۋاقىتقا دەيىن تابيعي اپات سالدارىنان 4 ازاماتىمىز قايتىس بولدى, 1 ادام حابار-وشارسىز كەتتى. قازا بولعانداردىڭ وتباسى مەن جاقىندارىنا قايعىرىپ كوڭىل ايتامىن», - دەدى شاۆكات ميرزيەەۆ.
ونىڭ ايتۋىنشا, سۋ قويماسىندا بولعان اپاتقا بايلانىستى حالىقارالىق ساراپشىلاردى تارتا وتىرىپ, بارلىق بوگەتتەرگە تەرەڭ ساراپتاما جۇرگىزىلەتىن بولادى.
«وكىنىشكە قاراي, ساردوباداعى اپات سالدارىنان كورشىلەس قازاقستان رەسپۋبليكاسى تۇركىستان وبلىسىنىڭ ماقتاارال اۋدانىنداعى ەلدى مەكەندەردى دە سۋ باستى. ءبىز قازاقستان پرەزيدەنتى قاسىم-جومارت توقاەۆپەن تەلەفون ارقىلى سويلەسىپ, بۇل ماسەلەنى ءوزارا تۇسىنىستىكپەن, اشىق ءارى كەڭىنەن تالقىلادىق. كەشە تۇركىستان وبلىسىنىڭ اكىمى ومىرزاق شوكەەۆ باستاعان دەلەگاتسيا وقيعا ورنىنا بارىپ, جاعدايدى جان-جاقتى زەرتتەدى», - دەدى وزبەكستان پرەزيدەنتى.
ونىڭ ايتۋىنشا, ۇكىمەت, ءتيىستى مينيسترلىكتەر مەن ۆەدومستۆولار, جەرگىلىكتى بيلىك ورگاندارى, باسقا دا شەنەۋنىكتەر مەن ساراپشىلار وزدەرىنىڭ قازاقستاندىق ارىپتەستەرىمەن بىرگە تابيعي اپاتتاردىڭ سالدارىن جويۋ ءۇشىن تىعىز جۇمىس ىستەيتىن بولادى.
«بۇل تەحنوگەندىك كۇتپەگەن اپات تەك ءبىزدىڭ تۇرعىندارعا عانا ەمەس, سونىمەن بىرگە كورشى قازاق باۋىرلارىمىزعا دا ۇلكەن زيان كەلتىرگەنى وتە ۇياتتى بولدى. ولاردىڭ مەكەندەيتىن جەرىنە جانە ەگىستىك القاپتارىنا زيان كەلتىرىلگەنىنە دە وكىنەمىز. ء«بىز قازاقستاندىق باۋىرلارىمىزعا تابيعي اپاتتىڭ سالدارىن جويۋعا قاجەتتى كومەك بەرۋگە دايىن ەكەنىمىزدى بىلدىردىك. بۇكىل حالىقپەن بىرگە وسى قيىندىقتاردى دا بىرلەسە ەڭسەرەمىز دەگەن سەنىمدەمىن», - دەدى وزبەكستان پرەزيدەنتى.