جامبىل وبلىسىندا ءىرى جوبالاردىڭ جوقتىعى نەگىزگى ماسەلەلەردىڭ ءبىرى

وسى جىلى وڭىردە وسىنداي بەلسەندى شارالارمەن 58,6 مىڭ ادام قامتىلادى. ال, ونى جۇزەگە اسىرۋعا 85,3 ميلليارد تەڭگە باعىتتالعان. ناتيجەسىندە جالپى 52,4 مىڭ ادام جۇمىسپەن قامتىلسا, ونىڭ ىشىندە 22,6 مىڭ ادام تۇراقتى جۇمىسپەن قامتىلعان. اعىمداعى جىلدىڭ 4 ايىنىڭ قورىتىندىسى بويىنشا «ەڭبەك» باعدارلاماسى اياسىندا 9,7 مىڭ ادام جۇمىسقا ورنالاسقان بولسا, سارىسۋ, قورداي, جۋالى جانە بايزاق اۋداندارى مەن تاراز قالاسىندا جۇمىسپەن قامتۋ ورتالىقتارى ارقىلى جۇمىسقا ورنالاستىرۋ دەڭگەيى وبلىستىق ورتا كورسەتكىشتەن تومەن بولىپ وتىر. ال, مويىنقۇم, شۋ جانە تالاس اۋداندارىنىڭ جۇمىس بەرۋشىلەرى زەينەتاقى قورىنا وزدەرىنىڭ قىزمەتكەرلەرىنىڭ جارناسىن اۋدارۋعا اسىعار ەمەس. سونىمەن قاتار, بۇگىندە كاسىپتىك قايتا دايارلاۋ اياسىندا 171 جامبىلدىق وقىتۋدان وتۋدە ەكەن. ال, اعىمداعى جىلعى 18 مامىردان باستاپ ولاردىڭ سانى 1350 ادامعا ارتادى. سونداي-اق, 232 ادام 912,1 ميلليون تەڭگەنىڭ شاعىن نەسيەسىنە قول جەتكىزگەن. جيىندا اگرارلىق-نەسيەلىك كورپوراتسيانىڭ جەرگىلىكتى فيليالىنىڭ جۇمىسىن جانداندىرۋ قاجەتتىلىگى دە ايتىلدى. مۇندا بۇگىنگە دەيىن نەسيەلىك قارجىنىڭ 1,7 پايىزى عانا يگەرىلگەن. ءوز سوزىندە جورابەك باۋبەكوۆ گرانتتاردى بەرۋ مەرزىمىنىڭ ەكىنشى جارتىجىلدىققا ىسىرىلىپ وتىرعانىنا دا الاڭداۋشىلىق ءبىلدىردى. سوندىقتان دا قالا جانە اۋدان اكىمدەرىنە قارجىلىق جوسپارلارىن جەدەل ازىرلەپ, گرانتتاردى مامىر جانە ماۋسىم ايلارىندا بەرۋدى باستاۋلارى قاجەتتىگىن دە جەتكىزدى. بۇگىندە «جول كارتاسى» بويىنشا ينجەنەرلىك جانە كولىك ينفراقۇرىلىمىن سالۋعا, تۇرعىن ءۇي-كوممۋنالدىق شارۋاشىلىقتى دامىتۋعا جانە ەلدى مەكەندەردى اباتتاندىرۋعا 61,2 ميلليارد تەڭگە قاراستىرىلعان. ناتيجەسىندە 19,6 مىڭ جۇمىس ورنى قۇرىلادى دەپ جوسپارلانۋدا. قازىرگى ۋاقىتتا بارلىق لوتتار بويىنشا كونكۋرستار وتكىزىلىپ, قورداي اۋدانىندا 552 جوبا بويىنشا جۇمىستار باستالعان. الايدا, كەزدەسىپ وتىرعان بىرقاتار كەدەرگىلەر جونىندە وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆا ايتتى. ونىڭ ايتۋىنشا, ءىرى جوبالاردىڭ جوقتىعى جانە جوبالىق-سمەتالىق قۇجاتتامانىڭ باياۋ دايىندالاتىنى وزەكتى ماسەلە. بۇل رەتتە بەردىبەك ساپارباەۆ «اكىمدەر مەن باسقارما باسشىلارى ءار جوبانىڭ ساپاسىن قاداعالاپ, جۇمىس ورىندارىن قۇرىپ, قۇرىلىستى ۋاقىتىندا اياقتاۋلارى كەرەك», دەپ تاپسىردى.

ال, ءتارتىپتى ساقتاۋ ماسەلەسى تۋرالى وبلىس اكىمى اپپاراتىنىڭ باسشىسى الماس ماديەۆ حابارلادى. ول 1 مامىرداعى جاعداي بويىنشا مەملەكەتتىك جانە باسقا دا ورگاندارعا 5444 بىرلىك كىرىس قۇجاتتارى كەلىپ تۇسكەنىن جەتكىزدى. ونىڭ ىشىندە 3 225 باقىلاۋعا الىنىپ, 2 043 قۇجات ورىندالعان. ءالى 1182 قۇجات قاراستىرىلۋدا. وبلىس اكىمى تاراپىنان 808 حاتتامالىق تاپسىرما بەرىلسە, ونىڭ 596-سى باسقارمالارعا جانە 212-ءسى تاراز قالاسى مەن اۋدان اكىمدەرىنە قاتىستى. كوروناۆيرۋس ىندەتىنىڭ تارالۋىنا بايلانىستى ولاردىڭ 15-ءى كەيىنگە قالدىرىلعان بولسا, 14-ءى ورىندالماعان. اۋدان اكىمدەرى 44 تاپسىرمانى ورىنداي الماعان. بۇل ورايدا بەردىبەك ساپارباەۆ بەرىلگەن تاپسىرمانى ورىنداماعان نەمەسە مەرزىمىنەن كەشىكتىرگەندەرگە قاتاڭ شارالار قولدانۋ قاجەتتىگىن ايتا كەلە, ۇلى جەڭىس مەرەكەسىندە قارت مايدانگەرلەردى قۇتتىقتاۋعا بايلانىستى ۇيىمداستىرۋ شارالارىنا كوڭىل ءبولدى.

جامبىل وبلىسى