سوعىس باستالعاندا مەنىڭ اكەم جىلقايدار وماروۆ 19 جاستا بولىپ, ليتۆا كسر-ءنىڭ پانەۆەجيس قالاسىندا اسكەري مىندەتىن اتقارىپ, «ماكسيم» پۋلەمەتىن يگەرگەن ەكەن. قاندى قىرعىن باستالاردان بىرنەشە كۇن بۇرىن, 1941 جىلدىڭ 17 ماۋسىمىندا ول قىزمەت ەتەتىن پولكتى دابىلمەن تىك كوتەرىپ, شىعىس پرۋسسياداعى مەملەكەتتىك شەكارانى قورعاۋدىڭ ءبىرىنشى سىزىعىنا اپارادى.
22 ماۋسىمداعى تاڭعى ساعات 4-تە ۆەرماحت كسرو اۋماعىن بومبالاپ, شەكارادان وتكەندە العاشقى سوققىعا ۇشىراعانداردىڭ اراسىندا ءبىزدىڭ اكەمىز, قاتارداعى جاۋىنگەر جىلقايدار وماروۆ تا بولعان.
ءىى دۇنيەجۇزىلىك سوعىستا كەڭەس اسكەرىنىڭ اراسىندا «شەكارادان شەگىنۋ» مەكتەبى دەگەن تۇسىنىك بولعان. اكەمىز سول «مەكتەپتى» ءبىرىنشى كۇننەن باستان كەشىپ, بارلىق ساباعىن العان جاۋىنگەر. بىردە اتىسىپ, بىردە قاشىپ اقىرى ولار ورلوۆ وبلىسىنىڭ كرومسك اۋدانىندا قورشاۋعا تۇسەدى. وسى جەردەن ءبولىنىپ-ءبولىنىپ, قاشىپ شىققان كەڭەس جاۋىنگەرلەرى جان-جاققا بىتىراپ كەتەدى. اش, جالاڭاش بولىپ, بىرنەشە كۇن بويى ورماندا بوسقان اكەم باسقا امالى بولماعاندىقتان بىردە بولشايا رىجكوۆو دەگەن دەرەۆنياداعى ءبىر ءۇيدىڭ ەسىگىن قاعادى. ءۇي يەلەرى مەيىرىمدى جاندار ەكەن, ابدەن اشىققان, ءولىم حالىندەگى جاۋىنگەردى ولار ۇيلەرىنە كىرگىزىپ الادى. نەمىستىڭ موتورلانعان اسكەرى بۇل اۋماقتى الدەقاشان باسىپ الىپ, شىعىسقا ءوتىپ كەتكەن ەكەن. دەرەۆنيادا وككۋپانتتار ءتارتىبى ورناپ, ستاروستا تاعايىندالعان. وسىنداي جاعدايدا ءۇي يەلەرى باستارىن قاتەرگە تىگىپ, باسقا ۇلتتىڭ وكىلى بولسا دا كەڭەس جاۋىنگەرى بولعاندىقتان مەنىڭ اكەمدى ۇيلەرىندە تىعىپ ساقتاپ, 20 كۇن بويى جاسىرعان.
بىردە ۇيلەردى ارالاپ, تەكسەرىپ جانە تاماق جيناپ جۇرگەن نەمىس پاترۋلدەرى ساتىر-كۇتىر ەتىپ كىرىپ كەلەدى. ءۇي يەسى ايەل اكەمنىڭ باسىنا ورامال جاۋىپ ۇلگەرەدى. الدىنا سول ءۇيدىڭ ەكى ءبۇلدىرشىنى دە وتىرا قالادى. كىسىگە جاقىن قىزدار بۇل ۋاقىتتا اكەمە ۇيرەنىپ قالعان ەكەن جانە ونى جاسىرۋ كەرەكتىگىن ءسابي جۇرەكتەرىمەن سەزىنەدى. نەمىستەر الدىنا بالا ۇستاپ وتىرعان «كارى ايەلدەن» كۇدىكتەنبەي, تەزىرەك بەرگەن تاماقتى الىپ, كەتىپ قالادى. ەگەر سول جولى اكەم اشكەرەلەنسە ونى عانا ەمەس, ءۇي يەلەرىن دە اتىپ تاستاۋى كادىك ەدى.
تاعى بىردە وسى ۇيگە نەمىستەرگە قىزمەت ەتىپ جۇرگەن ستاروستا كەلىپ, ۇيلەرگە جاپپاي مۇقيات تەكسەرىس جۇرگىزىلەتىنىن, سوندىقتان جاسىرعان جاۋىنگەردەن قۇتىلۋ كەرەكتىگىن ەسكەرتىپ كەتكەن. وكىنىشكە وراي, اكەم ءوزىن قۇتقارعان سول مەيىرىمدى جانداردىڭ دا, ستاروستانىڭ اتى-جوندەرىن ەسىنە ساقتاماپتى. وسى دەرەۆنيادا اكەمنەن باسقا دا بىرنەشە جاۋىنگەر باسقا ۇيلەرگە جاسىرىنعان ەكەن.
سول جاۋىنگەرلەر كۇندىز ورماندارعا جاسىرىنىپ, تۇندە شىعىسقا قاراي سىرعىپ وتىرىپ, ايتەۋىر ءوزىمىزدىڭ اسكەرگە قوسىلعان. اكەم الدىمەن ماسكەۋ قورعانىسىنا قاتىسىپ, ودان بريانسك پەن كالينين مايداندارىندا سوعىسقان. پولكتىڭ بارلاۋشىلارى قاتارىندا 429-شى جەكە بارلاۋ وتريادىندا بولعان. ودان 371-ءشى «ۆيتەبسك» ديۆيزياسىنىڭ روتاسىندا سوعىسقان. ءۇش رەت اۋىر جارالانعان. سوڭعى جاراقاتتى 1943 جىلى رجەۆ وپەراتسياسىندا الىپ, ۇزاق ۋاقىت گوسپيتالدا ەمدەلگەننەن كەيىن سوعىس مۇگەدەگى رەتىندە ساپتان بوساتىلعان.
جىلقايدار وماروۆتىڭ جاۋىنگەرلىك ەرلىگى «1-ءشى دارەجەلى وتان سوعىسى وردەنى», «ەرلىگى ءۇشىن», «جاۋىنگەرلىك ەڭبەگى ءۇشىن», «گەرمانيانى جەڭگەنى ءۇشىن» مەدالدارىمەن جانە كوماندوۆانيانىڭ بىرنەشە العىس حاتتارىمەن اتالعان. ول بەيبىت زاماندا اتقارعان ىستەرى ءۇشىن 8 مەدال مەن «ەڭبەك ارداگەرى» توسبەلگىسىن الدى.
سوعىستان كەيىن انامىز ءجاميلا وماروۆاعا ۇيلەنىپ, جەتى بالا تاربيەلەدى. قازىر نەمەرەلەرىنىڭ سانى 20-عا جۋىق. اكەم باقىتتى وتباسى ورتاسىندا 77 جاسقا دەيىن ءومىر ءسۇرىپ, 1999 جىلى ومىردەن ءوتتى.
ءبىز اكەمىزدى ساعىنىشپەن ەسكە الامىز. ونى قۇتقارىپ قالعان بولشايا رىجكوۆو دەرەۆنياسىنداعى مەيىرىمدى جانداردىڭ اتى-ءجونىن بىلمەگەنىمىزگە وكىنەمىز, ەگەر بىلگەن بولساق ءبىز ولارعا اكەمىزدى قۇتقارعانى ءۇشىن شەكسىز العىسىمىزدى جەتكىزەر ەدىك.
نۇرىم وماروۆ,
ازاماتتىق قورعاۋ پولكوۆنيگى
پەتروپاۆل