بىرىككەن كۇرەس الەمى (UWW) 2020 جىلعى توكيو وليمپياداسىنا ىرىكتەۋ ءتۋرنيرى ماروككو, ماجارستان جانە قىتايدا وتكىزىلەتىنىن مالىمدەدى. قازاقستاننىڭ ۇلتتىق وليمپيادا كوميتەتىنىڭ حابارلاۋىنشا, بۇل شەشىمدى حالىقارالىق وليمپيادا كوميتەتى دە (حوك) راستاعان.
بۇگىنگە دەيىن وليمپيادا جولداماسىنىڭ تەڭ جارتىسى سپورتشىلارعا ۇلەستىرىلگەن. ال ازيا ايماقتىق ىرىكتەۋ ءتۋرنيرى قىتايدىڭ سيان قالاسىندا وتكىزىلەتىن بولدى. بۇعان دەيىن كوروناۆيرۋس قاۋپىنىڭ جوعارىلاۋىنا بايلانىستى سيانداعى تۋرنير قىرعىزستان استاناسى بىشكەككە اۋىستىرىلعان ەدى.
الايدا ىندەتتەن قاۋىپتەنگەن قىرعىزستان بيلىگى جارىستى وتكىزۋدەن باس تارتقان. وسىلايشا, اتالعان تۋرنير كەلەسى جىلى قايتادان سيان قالاسىندا ۇيىمداستىرىلادى. افريكا جانە مۇحيت ايماعىنىڭ ىرىكتەۋ دوداسى ماروككودا, ەۋروپالىق ىرىكتەۋ سىنى ماجارستاندا وتەدى.