سولتۇستىك قازاقستاننىڭ اۆتوجولدارى ەلىمىزدىڭ باسقا وڭىرلەرىندەگى سياقتى ەشقاشان جوعارى تالاپ دەڭگەيىنەن تابىلعان ەمەس. جىل سايىن بالەن ميللياردتاعان اقشا بولىنسە دە بيىل ىستەلگەن جول كوپ بولسا 2-3 جىلعا عانا شىداپ, قايتا جوندەۋدى تالاپ ەتىپ جاتادى. جاڭادان سالىنعان جانە جوندەلگەن جولدىڭ ساپاسى قاتاڭ تەكسەرىلمەيدى, سونىڭ ناتيجەسىندە جولدىڭ جىرى ەشقاشان بىتپەيدى. وسى ماسەلەنى مەملەكەتتىك دەڭگەيدە قولعا الىپ, تاۋەلسىز كوميسسيانىڭ مونيتورينگىنە بەرەتىن كەز جەتتى. سول كوميسسيانى ۇستاۋعا كەتەتىن شىعىن ءوزىن 10-15 ەسە اقتار ەدى. ويتكەنى, جولداردىڭ ساپاسى جاقسارىپ, جوندەۋ جۇمىستارىنا كەتەتىن ارتىق شىعىندار ازايار ەدى.
سولتۇستىك قازاقستان وبلىسىندا بىلتىر جول شىعىندارىنا 30 ملرد تەڭگە بولىنگەن. بىراق بارلىق جولدىڭ ءالى دە 35 پايىزى جوندەۋدى تالاپ ەتەدى. بيىل تاعى 39 ملرد تەڭگە بولىنبەك, ول دا جول ماسەلەسىن تولىق شەشە المايدى. وبلىستا بارلىعى 9 مىڭ شاقىرىم اۆتوجولدار بار. جۋىردا اۆتوجولدار باسقارماسى باستىعىنىڭ ورىنباسارى ت.اۋەلوۆ بيىل سونىڭ 770 شاقىرىمىنا اسفالت توسەلەتىنىن جەتكىزدى. بۇل جۇمىستارعا جاز بويى 1500-دەي ادام تارتىلادى ەكەن. ارينە, حالىققا جۇمىس تابىلعانى جاقسى, بىراق ءبىر ىستەلگەن جولداردى تىم بولماسا 10 جىلعا دەيىن قوزعامايتىن قىلىپ, ساپالى ىستەۋگە ۋادە بەرەمىز دەگەن سوزدەر باستىقتىڭ اۋزىنان شىققان جوق. ويتكەنى, جولدىڭ ساپالى جاسالاتىنىنا مامانداردىڭ وزدەرى دە سەنبەيدى.
بيىلعى جوندەلەتىن جولدار تيميريازەۆ, ءۋاليحانوۆ جانە مۇسىرەپوۆ اۋداندارىنىڭ تۇرعىندارىن قۋانتپاق. ايتپەسە, جامان جولدان بۇل اۋدان تۇرعىندارىنىڭ جۇيكەسى ابدەن جۇقارعان ەدى. سونداي-اق «ساۋمالكول-نوۆويشيم» جانە «پوكروۆكا-كورنەەۆكا-گورنوە» تاسجولدارى جوندەلمەكشى. «پەتروپاۆلوۆسك — قورعان» اۆتوتراسساسى دا جوندەۋدەن وتپەك.
جول جوندەۋدىڭ قاۋىرت شاعىنا جولشىلار مامىر ايىنان باستاپ كىرىسەدى.
سولتۇستىك قازاقستان وبلىسى