«ەمبىمۇنايگاز» اكتسيونەرلىك قوعامىنا قاراستى كەن ورىندارىندا قوسىمشا بارلاۋ ەسەبىنەن كومىرسۋتەگى شيكىزاتىنىڭ قورى ەسەلەندى. بۇل مەملەكەت باسشىسى قاسىم-جومارت توقاەۆتىڭ گەولوگيالىق بارلاۋ جۇمىستارىن كۇشەيتۋگە قاتىستى تاپسىرماسىنا سايكەس قولعا الىنىپ وتىر.
كومپانيا ءباسپاسوز قىزمەتىنىڭ مالىمەتىنشە, «ەمبىمۇنايگاز» يەلىگىندەگى كەن ورىندارىنان وندىرىلەتىن مۇناي قورى 86,2 ميلليون تونناعا جەتتى. ال, وتكەن جىلى مۇنداعى قور كولەمى 74,3 ميلليون توننانى قۇراعان ەدى.
– بىلتىر قر پايدالى قازبالار كورلارى جونىندەگى مەملەكەتتىك كوميسسياسى قولدانىستاعى س.نۇرجانوۆ, كەنباي (شىعىس مولدابەك ۋچاسكەسى), ج.دوسمۇحامبەتوۆ, بوتاقان, سونداي-اق, قايتا اشىلعان باتىس قاراسور (1,4 ملن تن) كەن ورىندارىندا 14,8 ملن توننا كولەمىندەگى كومىرسۋتەگى شيكىزاتى قورىن بالانسقا الىپ, بەكىتتى. قور وسىمىنە بايىرعى كەن ورىندارىن يگەرۋگە جاڭا ادىستەر مەن تەحنولوگيالاردى قولدانا وتىرىپ, بەلسەندى بارلاۋ جۇمىستارىن جۇرگىزۋ ناتيجەسىندە قول جەتتى, - دەپ حابارلادى «ەمبىمۇنايگاز» اق-نىڭ ءباسپاسوز قىزمەتى.
سونىمەن بىرگە, وتكەن جىلى تايسويعان بلوگىنىڭ 5 600 شارشى شاقىرىم اۋماعىنا 3D موGت سەيسموبارلاۋ جۇرگىزىلدى. ەندى سەيسموبارلاۋ دەرەكتەرىن وڭدەۋ ارقىلى بارلاۋ, بۇرعىلاۋ جۇمىستارى جۇرگىزىلەتىن قۇرىلىمدار دايىنداۋ كوزدەلۋدە.