دوللاردىڭ ءباسى ارتىپ كەلەدى

سىرتقى ۆاليۋتا نارىعىندا 2020 جىلعى 13-27 ناۋرىز ارالىعىنداعى كەزەڭدە بىرقاتار ماڭىزدى وقيعا بولدى. الدىمەن اقش-تىڭ فەدەرالدى رەزەرۆتىك جۇيەسى نەگىزگى پايىزدىق مولشەرلەمەنى 0-0,25%-عا دەيىن تومەندەتتى. سونداي-اق كوروناۆيرۋستىڭ اسەرىنەن قارجىلىق كەلەڭسىزدىككە قارسى بىرقاتار باعدارلامانى ىسكە قوسى. اقش-تىڭ فەدەرالدى رەزەرۆتىك جۇيەسى, سونىمەن قاتار, الەمنىڭ 9 جەتەكشى ورتالىق بانكىمەن سۆوپ جەلىلەرى ارقىلى «كوك قاعازدىڭ» قۇنىن ارتتىرۋ بويىنشا كەلىسىلگەن شارالار تۋرالى حابارلادى. اقش كونگرەسى ەكونوميكانى ۇستاپ تۇرۋ ءۇشىن 2 ترلن دوللار بولۋگە كەلىسىم بەردى. وتكەن اپتانىڭ ورتاسىنان باستاپ دامۋشى ەلدەردىڭ ۆاليۋتالارى الەمدىك ەكونوميكانى قولداۋ جونىندەگى اۋقىمدى شارالار اياسىندا تۇراقتانۋ بەلگىلەرىن كورسەتۋدە.

دامۋشى ەلدەر ۆاليۋتالارىنىڭ اقش دوللارىنا قاتىستى باعامدارىنىڭ سەرپىنى بىلاي قالىپتاستى:

ءۇندى رۋپياسى 1,3%-عا (73,91-دەن 74,85-كە دەيىن) السىرەدى. ءۇندىستاننىڭ رەزەرۆتىك بانكى جالپى سوماسى 50 ملرد دوللاردى قۇرايتىن وتىمدىلىكتى قامتاماسىز ەتۋ شارالارى تۋرالى جاريالاپ, نەگىزگى مولشەرلەمەنى 5,15%-دان 4,4%-عا دەيىن تومەندەتتى.

تۇرىك ليراسى 1,9%-عا (6,33-تەن 6,45-كە دەيىن) السىرەدى. پرەزيدەنت كوروناۆيرۋستىڭ سالدارىمەن كۇرەسۋ شارالارىن جاريالادى, ەكونوميكانى ىنتالاندىرۋ كولەمى 15,4 ملرد دوللاردى قۇرادى.

برازيليا رەالى ورتالىق بانكتىڭ 3,75%-عا دەيىن تومەندەتۋ تۋرالى شەشىمىنىڭ اياسىندا 5,4%-عا (4,84-تەن 5,1-گە دەيىن) السىرەدى.

مەكسيكا پەسوسى S&P اگەنتتىگىنىڭ تاۋەلسىز رەيتينگتى BBB دەڭگەيىنە دەيىن تومەندەتۋ تۋرالى شەشىمى اياسىندا 6,5%-عا (21,92-دەن 23,34-كە دەيىن) السىرەدى.

رەسەي ءرۋبلى مۇناي نارىعىنداعى تەرىس ديناميكانىڭ جانە ينۆەستورلاردىڭ تاۋەكەل دەڭگەيىنىڭ ناشارلاۋى سالدارىنان 8,9%-عا (72,44-تەن 78,92-گە دەيىن) السىرەدى.

يندونەزيا رۋپياسى مولشەرلەمەنى 4, 5%-عا دەيىن تومەندەتكەننەن كەيىن 9,4%-عا (14 778-دەن 16 170-كە دەيىن) السىرەدى, ەكونوميكالىق ءوسۋ بولجامى 4,2-4,6% دەيىن تۇزەتىلدى (5-5,4% - الدىڭعى بولجام بويىنشا).