اقتوبە وبلىسى مەن ونىمەن كورشىلەس اتىراۋ, باتىس قازاقستان, ماڭعىستاۋ جانە قىزىلوردا وبلىستارىندا كوروناۆيرۋس ينفەكتسياسى تارالىپ وتىر. سوعان بايلانىستى اقتوبە وبلىسىنىڭ باس مەملەكەتتىك سانيتارلىق دارىگەرى نۇرسۇلۋ بەركىمباەۆا پاندەميانىڭ كەڭىنەن تارالۋ قاۋپىنىڭ الدىن الۋ ءۇشىن ارنايى قاۋلى شىعاردى. مۇندا تۇتاستاي ءوڭىر مەن اقتوبە قالاسى اۋماعىندا حالىق قاۋىپسىزدىگىن قامتاماسىز ەتۋ جونىندەگى مىندەتتەر جان-جاقتى قامتىلعان.
سوعان سايكەس 2020 جىلدىڭ 31 ناۋرىز كۇنگى ساعات 00.00 دەن 2020 جىلعى 15 ءساۋىر كۇنگى ساعات 07.00 گە دەيىن اۋقىمدى ءىس-شارالار كەشەنى جۇزەگە اسىرىلماق. وسى ۋاقىت ارالىعىندا تاماق ونىمدەرى مەن ءدارى-دارمەكتەر جانە مەديتسينالىق بۇيىمدار تاسيتىن كولىكتەردەن وزگە قوزعالىس قۇرالدارىنىڭ بارلىق تۇرلەرىنە وبلىس اۋماعىندا جۇرۋگە تيىم سالىنادى. ارنايى ماتەريالدار تاسيتىن اۆتوموبيلدەر دەزينفەكتسيالىق توسقاۋىلدارمەن قامتاماسىز ەتىلەدى. ۇكىمەتتىك, جۇكتىك ترانزيتتىك رەيستەر مەن تەمىر جول بايلانىستارى شەكتەۋلى مەرزىم كەزىندە جۇرگىزىلمەيدى.
سونداي-اق بۇل كەزدە بارلىق مەملەكەتتىك جانە جەكەمەنشىك بالاباقشالار, ءىرى ساۋدا ورتالىقتارى, بارلىق الەۋمەتتىك-تۇرمىستىق نىساندار جۇمىسىن توقتاتادى. ال قىزمەت جاسايتىن ەڭ قاجەتتى دەگەن نىسانداردىڭ جۇمىس كەستەسىنە شەكتەۋ قويىلادى. بۇعان قوسا باس مەملەكەتتىك سانيتارلىق دارىگەردىڭ قاۋلىسىنا سايكەس وڭىردە زالالسىزداندىرۋ ءتارتىبى مەن رەجيمى كۇشەيتىلەدى. ونىڭ باستى جولدارىنىڭ ءبىرى –كوپ بەيىندى انتيسەپتيكالىق قۇرال-جابدىقتارمەن قامتاماسىز ەتۋ بولىپ وتىر. قوعامدىق تاماقتاندىرۋ ورىندارىنا قويىلاتىن سانيتارلىق تالاپتار دا كۇشەيتىلەدى.
بۇعان قوسا قابىلدانعان قۇجاتتا اقتوبە ايماعى تۇرعىندارىنىڭ بەلگىلەنگەن ساقتاندىرۋ شارالارىن مۇقيات ورىنداۋى قاجەتتىگى كورسەتىلگەن. كارانتيندىك رەجيمنىڭ ورىندالۋىن باقىلاۋ ماقساتىندا كوشەلەر مەن ءىرى ەلدى-مەكەندەردە پاترۋلدىك ءتارتىپ ەنگىزىلمەك. Covid-19 وشاقتارى تىركەلگەن جاعدايدا قالا اۋماعى مەن تۇرعىن ءۇي اۋماقتارىن وقشاۋلاۋ مەن قورعاۋ شارالارى جاسالماق. تۇتاستاي العاندا وبلىس پەن اقتوبە قالاسىنىڭ كارانتيندىك ايماعى تولىقتاي قورشالماق.
كوروناۆيرۋس ينفەكتسياسىنىڭ تارالۋى اقتوبە وبلىستىق دەنساۋلىق ساقتاۋ سالاسىنىڭ وكىلدەرىنە دە جاڭا مىندەتتەر جۇكتەۋدە. ونىڭ باستى تارماعى سانيتارلىق-دەزينفەكتسيالىق جاعداي مەن ەپيدەمياعا قارسى رەجيمدى كۇشەيتۋدەن تامىر تارتادى. Covid-19 جۇقتارعان ناۋقاستار مەن ولارمەن قارىم-قاتىناستا بولعان ادامدار ينفەكتسيالىق ستاتسيونارعا جاتقىزىلىپ, دەرەۋ وقشاۋلانباق. ىندەت بەلگىلەرى بايقالعان ادامداردى ەرتە انىقتاۋ ءۇشىن اۋلالاردى ارالاۋ بەلگىلەنگەن. سانيتارلىق لوك-بەكەتتەردە تەمپەراتۋرانى ولشەۋ ءىسى مۇقيات ءارى تولىق جۇرگىزىلىپ, بۇل ساتتە مەديتسينا قىزمەتكەرلەرىنىڭ قورعانىس دەڭگەيىن قامتاماسىز ەتۋ قاراستىرىلعان.
-تەاتر كيىم ىلگىشتەن باستالسا, كوروناۆيرۋس ينفەكتسياسىنان ساقتانۋ – تۇرعىندار اراسىنداعى ءتۇسىندىرۋ جۇمىستارىنان باستالادى. بۇل رەتتە جەرگىلىكتى اتقارۋشى ورگاندار مەن بارلىق مۇددەلى ۇيىمدار وكىلدەرى باق-پەن الەۋمەتتىك جەلىلەردە ونلاين رەجيمىندە وتكىزىلەتىن بريفينگتەردە سىندارلى بولۋىنا بەلگىلەنگەن تالاپتاردى تياناقتى ءارى تۇسىنىكتى تۇردە ايتۋىنا باسا نازار اۋدارعاندارى ءجون. ءبىزدىڭ قازىرگى باستى ماقساتىمىز اۋماقتىق جانە جەرگىلىكتى مەملەكەتتىك ورگاندارمەن بىرلەسىپ وسى قاۋلىنىڭ جۇزەگە اسۋىن قامتاماسىز ەتۋ. ال ونىڭ ورىندالۋىن باقىلاۋ جونىندەگى جاۋاپكەرشىلىكتى وزىمە قالدىرامىن دەيدى اقتوبە وبلىسىنىڭ باس مەملەكەتتىك سانيتارلىق دارىگەرى نۇرسۇلۋ بەركىمباەۆا.
ءبىز وسى تۇيىنمەن ماتەريالىمىزدىڭ نۇكتەسىن قويعاندى ءجون كورەمىز.