تەگىن مەديتسينالىق كومەكتىڭ كەپىلدى كولەمى اياسىندا ديسپانسەرلىك ەسەپكە الىنعان ونكولوگيالىق اۋرۋعا شالدىققان ناۋقاستار, جۇكتى ايەلدەر, جاسى 65-تەن اسقان ازاماتتار ماسكامەن قامتىلاتىن بولادى, دەپ حابارلايدى ەلوردا اكىمدىگىنىڭ رەسمي سايتى.
«نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسى مەديتسينالىق مەكەمەلەرگە تىركەلگەن تۇرعىنداردى ماسكامەن قامتاماسىز ەتۋ ماقساتىندا «سك-فارماتسيا» جشس-نەن 300 000 مەديتسينالىق ماسكا الدى. مەديتسينالىق ماسكالار ديسپانسەرلىك ەسەپكە الىنعان ونكولوگيالىق اۋرۋعا شالدىققان ناۋقاستارعا, جۇكتى ايەلدەرگە ۇلەستىرىلۋدە. وسىلايشا, ءبىر جولعى رەت اياعى اۋىر ايەلدەردى قامتاماسىز ەتۋ ءۇشىن 68 500, ەگدە جاستاعى ازاماتتار ءۇشىن 183 500, ونكولوگيالىق اۋرۋلارعا شالدىققان ازاماتتار ءۇشىن 48 000 ماسكا ءبولىندى», – دەپ مالىمدەدى اكىمدىكتە.
بۇگىنگى تاڭدا الىنعان مەديتسينالىق ماسكالاردىڭ 10% تۇرعىندار اراسىندا تاراتىلعان. ەگدە جاستاعى پاتسيەنتتەرگە ۆولونتەرلەر مەن مەديتسينالىق مەكەمەلەردىڭ قىزمەتكەرلەرى ماسكا مەن قاجەتتى ءدارى-دارمەكتەردى ۇيلەرىنە جەتكىزىپ بەرۋدە.