توتەنشە جاعداي ورناعان ورال قالاسىندا تۇرعىندارعا قانداي قامقورلىق جاسالىپ جاتىر؟ بۇل جونىندە وبلىستىق باسقارمالار مەن ورال قالاسىنىڭ اكىمى نە دەيدى؟!
ورال قالاسىنىڭ اكىمى ابات شىنىبەكوۆتىڭ ايتۋىنشا, قالادا جەدەل شتاب قۇرىلىپ, بارلىق مەملەكەتتىك جانە ارناۋلى قىزمەت ورىندارى كۇشەيتىلگەن جۇمىس رەجيمىنە كوشكەن. «اسىرەسە, تۇرعىنداردى ومىرلىك ماڭىزى بار قاجەتتىلىكپەن قامتيتىن «باتىس سۋ ارناسى», «جايىقجىلۋقۋات» سەكىلدى ستراتەگيالىق نىسانداردىڭ جۇمىسى ەرەكشە قاداعالانۋدا. وبلىس ورتالىعىندا جۇمىس ىستەپ تۇرعان 1446 بيزنەس نىسانىنىڭ جۇمىسىنا توتەنشە جاعدايعا بايلانىستى وزگەرىستەر ەنگىزىلەدى. بۇل نىسانداردىڭ باسشىلارىنا ءتيىستى ەسكەرتۋ حات جىبەرىلدى» دەدى قالا اكىمى.
توتەنشە جاعدايعا بايلانىستى ورال قالاسىندا قۇرىلعان جەدەل شتاب وكىلدەرى قالا اۋماعىن 20 سەكتورعا ءبولىپ, بارلىق سەكتوردا ورنالاسقان كاسىپكەرلىك نىساندارى مەن مەكەمە-كاسىپورىنداردى توتەنشە جاعداي رەجيمىنە كوشىردى.
– قالا بويىنشا 80 ساۋدا ءۇيى, 22 بازار, 117 مەيرامحانا, 213 ءدامحانا جانە 26 فيليالى بار 11 امبەباپ-دۇكەن جۇمىس ىستەيدى. سونىمەن قاتار 653 ازىق-ت ۇلىك دۇكەنى, 25 شارۋاشىلىق دۇكەنى, 15 فيتنەس كلۋب, 24 قورقورحانا, 5 تۇنگى كلۋب بار. وسى شاعىن جانە ورتا بيزنەس نىساندارىنىڭ يەلەرىنە ەسكەرتۋ حاتتارى جولداندى. ۇسىنىس نەگىزىندە حالىق كوپ جينالاتىن ورىنداردىڭ جۇمىسىن ۋاقىتشا توقتاتۋ تۋرالى شەشىم قابىلدادى. بۇگىنگى كۇنى 4 كينوتەاتر, 9 بالالار ويىن-ساۋىق ورتالىعى جۇمىسىن توقتاتتى. ساۋدا ورىندارى جۇمىستارىن توقتاتقانىمەن, ول عيماراتتارداعى ازىق-ت ۇلىك ساتاتىن سۋپەرماركەتتەر جۇمىس ىستەي بەرەدى. سانيتارلىق-ەپيدەميولوگيالىق قىزمەت تالابىنا سايكەس ءار ەكى ساعات سايىن سانيتارلىق-دەزينفەكتسيالاۋ شارالارىن جۇرگىزۋدە. قالا اۋماعىندا 21 بازارداعى سانيتارلىق-ەپيدەميولوگيالىق قاۋىپسىزدىكتى قامتاماسىز ەتۋ ءۇشىن ءتيىستى قۇرىلىمدىق بولىمشەلەر جانە جەرگىلىكتى اتقارۋشى ورگاندار وكىلدەر ارناۋلى جۇمىس جۇرگىزۋدە, – دەدى قالا اكىمى ابات اباي ۇلى.
ايتا كەتەيىك, قىزمەتى ۋاقىتشا توقتاتىلعان مەكەمە-كاسىپورىن قىزمەتكەرلەرىنە كەمىندە ەڭ تومەنگى ايلىق مولشەرىندە جالاقى تولەنۋى ءتيىس.
ورال قالاسىندا 28 باعىت بويىنشا جولاۋشى تاسىمالىمەن اينالىساتىن 6 اۆتوپاركتىڭ 400-دەي اۆتوبۋسى ءار اينالىم سايىن دەزينفەكتسيالىق بۇقىرلاۋ شارالارىنان وتەدى.
باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسى مۇحامعالي ارىسپاەۆتىڭ ايتۋىنشا, وبلىستا بۇگىنگى تاڭدا ەپيدەميولوگيالىق جاعداي تۇراقتى. كوروناۆيرۋس تىركەلگەن جوق. ينفەكتسيا تارالۋىنىڭ الدىن الۋ ءۇشىن شەتەلدەن كەلگەندەرگە تاۋلىك بويى مونيتورينگ جۇرگىزىلەدى. سوڭعى دەرەك بويىنشا 89 ادام باقىلاۋدا. ونىڭ ىشىندە 1 «ا» ساناتىندا – 6, 1 «ب» ساناتىندا – 50, 2-ساناتتا – 30, 3-سانات بويىنشا – 2 ادام قاداعالاۋعا الىنعان. كوروناۆيرۋستىق ينفەكتسياعا لابوراتوريالىق زەرتتەۋ جۇرگىزۋ ءۇشىن ۇلتتىق ساراپتاما ورتالىعىنىڭ وبلىستىق فيليالىندا قاجەتتى بارلىق جابدىق بار. سونداي-اق 13 ناۋرىزدان باستاپ باتىس قازاقستان وبلىسىمەن شەكتەسەتىن ورىنبور, سامارا, ساراتوۆ باعىتىنداعى شەكارا بەكەتتەرىندە, جانىبەك پەن سايحىن ەلدى مەكەندەرىندەگى اۆتوبەكەت وتكەلدەرىندە ەپيدەميولوگ مامانداردىڭ كەزەكشىلىگى ۇيىمداستىرىلعان.
ءوڭىر باسشىلارى ەرەكشە نازار اۋدارىپ وتىرعان ماسەلە – حالىق ءجيى تۇتىناتىن الەۋمەتتىك ازىق-ت ۇلىك باعاسىنىڭ كوتەرىلۋى.
باتىس قازاقستان وبلىستىق كاسىپكەرلىك جانە يندۋستريالدىق-يننوۆاتسيالىق دامۋ باسقارماسىنىڭ باسشىسى ەرنار بەكەتوۆتىڭ ايتۋىنشا, وڭىردە الەۋمەتتىك ماڭىزى بار تىزىمگە ەنگىزىلگەن 19 ءتۇرلى ازىق-ت ۇلىكتىڭ مولشەرى جەتكىلىكتى. ياعني باعانىڭ كۇرت وسۋىنە ەش نەگىز جوق. بىراق قالا بازارلارىندا قانتتىڭ, پياز بەن كارتوپتىڭ باعاسى كۇرت ءوسىپ كەتكەنى بايقالعان.
- ءبىز بۇل جايتتاردىڭ ارقايسىسىن تەكسەرۋ جۇرگىزىپ, انىقتايمىز. بۇعان دەيىن وبلىس اۋماعىنداعى باعا تۇراقتىلىعىن قامتاماسىز ەتۋ جونىندە اپتا سايىن تۇراقتى مونيتورينگ جۇرگىزىلسە, ەندى كۇندەلىكتى مونيتورينگ جاساۋدى قولعا الدىق. ساۋدانى جۇزەگە اسىراتىن بارلىق مەكەمەگە ارنايى ەسكەرتۋ حات جىبەرىلدى. ەگەر باعانىڭ نەگىزسىز ءوسۋى انىقتالاتىن بولسا, ناقتى شارالار قابىلداناتىن بولادى. ونداي ساۋدا ورىندارىنا 100 اەك كولەمىندە ايىپپۇل سالىنادى. قازىر وبلىس بويىنشا الەۋمەتتىك ماڭىزى بار تاۋارلار ءوندىرىسىنىڭ بالانسى جاساقتالدى. نەگىزگى الەۋمەتتىك ماڭىزى بار تاۋارلارعا تاپشىلىق جوق. رەسپۋبليكانىڭ باسقا دا وڭىرلەرىمەن تىعىز بايلانىس ۇستاپ وتىرمىز. مىسالى, ءبىزدىڭ وڭىردە وندىرىلمەيتىن, وسپەيتىن كەيبىر تاۋاردى, مىسالى, قانت پەن قاراقۇمىقتى وزگە وڭىردەن جەتكىزۋ ماسەلەسى كەلىسىلىپ جاتىر, – دەدى ەرنار بەكەتوۆ.
قازاقستان رەسپۋبليكاسى پرەزيدەنتىنىڭ 15 ناۋرىزداعى توتەنشە جاعدايدى ەنگىزۋى تۋرالى جارلىعىنا بايلانىستى ءىرى ساۋدا نىساندارىنىڭ جۇمىس ۋاقىتى شەكتەلىپ, سانيتارلىق شارالار كۇشەيتىلۋى ءتيىس. ازىق-ت ۇلىك دۇكەندەرى, سۋپەرماركەتتەرى, بازارلارى جانە اۆتوكولىكتەرگە جانارماي قۇيۋ بەكەتتەرى مەن مەديتسينالىق تاۋارلاردى تاراتاتىن نىساندار ادەتتەگى رەجيمدە جۇمىس ىستەيدى. نان جانە كونديتەرلىك ونىمدەر قاپتالعان كۇيدە عانا ساتىلادى. بۇدان بولەك جايما بازارلاردىڭ جۇمىسى 11.00-دەن 17.00-گە دەيىن, ءدامحانا-مەيرامحانا جانە قوعامدىق تاماقتانۋ ورىندارىنىڭ جۇمىسى 22.00-گە دەيىن شەكتەلەدى. ءارى ءدامحانا-مەيرامحانالارعا كەلەتىندەردىڭ سانى 50-دەن اسپاۋى كەرەك. توتەنشە جاعدايدىڭ ەنگىزىلۋىنە وراي بەكىتىلگەن تالاپتى ورىنداماعاندار 10 اەك كولەمىندە ايىپپۇل تولەيدى نەمەسە 15 تاۋلىككە قاماققا الىنباق.
باتىس قازاقستان وبلىسى رەسەي فەدەراتسياسىنىڭ 5 وبلىسىمەن شەكتەسەتىنى ءمالىم. وسىعان وراي ەكى ەل اراسىندا قارىم-قاتىناس ءجيى بولاتىنى تۇسىنىكتى. «توتەنشە جاعداي جاريالانۋىنا بايلانىستى ەندى شەكارادان ءوتۋ تەك شەتەلدىك تولقۇجات ارقىلى جۇرگىزىلەدى» دەگەن قاۋەسەت شىعىپ, ورال قالاسىنداعى حالىققا قىزمەت كورسەتۋ ورتالىعىنىڭ تولقۇجات بولىمىنە كەلۋشىلەر ءنوپىرى تىم كوبەيىپ كەتكەن. بۇگىن باتىس قازاقستان وبلىستىق كوشى-قون قىزمەتى باسقارماسىنىڭ باستىعى بەكبول ورتاەۆ توتەنشە جاعدايعا بايلانىستى ەكى ەل اراسىندا ازاماتتاردىڭ شەكارادان وتۋىنە ۋاقىتشا شەكتەۋ قويىلاتىنىن, سوندىقتان شەتەلدىك تولقۇجات الۋدىڭ قاجەتى جوقتىعىن ءتۇسىندىردى. ال حقكو ورىندارىندا حالىقتىڭ تىم كوپ شوعىرلانۋىن بولدىرماس ءۇشىن ورال قالاسىنداعى 20 مەكتەپتە حالىقتىڭ ءوز-وزىنە ەلەكتروندى فورماتتا (e.gov پورتالى) قىزمەت كورسەتۋ سەكتورى ۇيىمداستىرىلعانى حابارلاندى. بۇل جەرلەردە «ەلەكتروندى كىلتى» بار كەز كەلگەن تۇرعىن وزىنە كەرەكتى انىقتامانى ەش كەزەكسىز الا الادى.
باتىس قازاقستان