بىلتىرعى ماۋسىمنىڭ قورىتىندىسى بويىنشا قازاقستان ۇلتتىق قۇراماسى مەن الماتىنىڭ «قايرات» كلۋبىنىڭ مۇشەسى يگيتا ەڭ ۇزدىك قاقپاشى اتانۋى مۇمكىن.
«Futsal Planet Awards» كونكۋرسىنىڭ ەڭ ۇزدىك قاقپاشى اتاعىنان ۇمىتكەرلەر قاتارىندا يگيتادان بولەك, گۋيتتا («سپورتينگ», پورتۋگاليا), ميودراگ اكسەنتيەۆيچ (اتستسس, فرانتسيا), كارلوس باررون («پالما», يسپانيا), دجوني مەندەش («پاتو», برازيليا), لۋكاس فاراح («بوكا حۋنيورس», ارگەنتينا), حۋانحو («بارسەلونا», يسپانيا), موحاممادي («گازپروم-يۋگرا», رەسەي) جانە يۋشي سەكيگۋچي («ناگويا وۋشەنس», جاپونيا) سىندى ساڭلاقتار بار.
33 جاستاعى برازيليانىڭ ريو-دە-جانەيرو قالاسىنىڭ تۋماسىنىڭ شىن ەسىمى – لەوناردو دە مەلو ۆيەيرا لەيتە. يگيتا دەگەن لاقاپ اتپەن تانىلعان فۋتزال شەبەرى 2009-2010 جىلدارى قاراعاندىنىڭ «تۇلپارىندا» ويناسا, 2011 جىلدان بەرى «قايراتتىڭ» ساپىندا جاسىنداي جارقىرادى. 2013 جىلى قازاقستاننىڭ ازاماتتىعىن الىپ, ءتۇرلى حالىقارالىق دودالاردا ەل نامىسىن ابىرويلى قورعاۋدا. 2015, 2016 جانە 2018 جىلدارى يگيتا الەمنىڭ ەڭ ۇزدىك قاقپاشىسى اتاندى.