قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى جاڭا جىل قارساڭىندا الماتىداعى قالالىق قارتتار ۇيىندە كونتسەرت قويدى. قاريالار وزدەرى ءۇشىن دايىندالعان توسىنسىيعا بالاشا قۋانىپ, ونەرپازدارعا ءوز ريزاشىلىقتارىن جاۋدىرعان. بۇل تۋرالى وركەستردىڭ ءباسپاسوز قىزمەتى حابارلادى.
ونەر ۇجىمى كۇللى الەم حالقى اسىعا كۇتەتىن ەرەكشە مەيرام الدىندا قارتتار ۇيىندەگى قاريالاردى قۇتتىقتاپ قانا قويماي, ولار ءۇشىن ارنايى كەش ۇيىمداستىرۋدى ۇيعارعان.
«قۇرمانعازى وركەسترى جاڭا جىل قارساڭىندا الماتىداعى قالالىق قارتتار ۇيىندە كونتسەرت قويدى. ارنايى ۇيىمداستىرىلعان مەرەكەلىك شارادان سوڭ قاريالار ەرەكشە قۋانىشقا بولەنىپ, العىستارىن جاۋدىردى. قازىنالى قارتتارىمىز امان بولسىن», - دەيدى ۇيىمداستىرۋشىلار.
بۇل كونتسەرتتە قۇرمانعازى وركەسترى قازاققا بەلگىلى تاتتىمبەت, داۋلەتكەرەي, ىقىلاس سىندى كۇيشىلەر مەن شەتەلدىك كومپوزيتورلاردىڭ تانىمال شىعارمالارىن ورىنداعان.
الماتى قالاسىنداعى مامىر اۋدانىندا ورنالاسقان قارتتار ءۇيىنىڭ جاۋاپتى ماماندارى وركەستر ۇجىمىنا بارشا ارداگەرلەر اتىنان راحمەت ايتىپ, العىس حات تابىستادى.
جاقىندا قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى وزبەكستاندا ونەر كورسەتكەن ەدى. مادەنيەت جانە سپورت مينيسترلىگىنىڭ ۇيىمداستىرۋىمەن وتكەن «وزبەكستانداعى قازاقستان جىلىنىڭ جابىلۋىنا ارنالعان گالا-كونتسەرتكە» قۇرمانعازى وركەسترىمەن بىرگە وزگە دە وتاندىق ونەر ۇجىمدارى مەن تانىمال انشىلەر قاتىستى.