تاۋەلسىزدىككە تارتۋ: شىمكەنتتىك جاستارعا پاتەر كىلتى تابىستالدى

پاتەر كىلتىن جاستارعا قالا اكىمى ەرلان ايتاحانوۆ سالتاناتتى تۇردە تابىستاپ, ەلىمىزدىڭ بولاشاعى جاستاردىڭ ءوسىپ, وركەندەۋى ءۇشىن مەملەكەت تاراپىنان كوپتەگەن قولداۋلار كورسەتىلىپ جاتقاندىعىن اتاپ ءوتتى.

«بۇل باعدارلامانىڭ ەرەكشىلىگى جاستارعا ءوزىنىڭ بولاشاقتاعى جەكە مەنشىك ءۇيىنىڭ باستاپقى جارناسىن جيناقتاۋعا مول مۇمكىندىك بەرەتىنى. ياعني, جاستارىمىز پاتەردەن-پاتەرگە كوشىپ, اي سايىنعى نارىقتاعى پاتەراقىنىڭ ورنىنا 5-7 مىڭ تەڭگە كولەمىندەگى تولەماقىنى تولەيدى», - دەدى ەرلان قۋانىش ۇلى.

بۇل كۇنى قالامىزداعى دارىگەرلەر, مۇعالىمدەر, ينجەنەرلەر, كوممۋنالدىق جانە قۇقىق قورعاۋ ورگاندارى مەن ەنەرگەتيكا, مادەنيەت, سپورت سالاسىنىڭ قىزمەتكەرلەرى, كاسىپورىن جۇمىسشىلارىنان قۇرالعان جاستار قۇرىلىس جۇمىستارى اياقتالعان ۇيدەن سۋ جاڭا پاتەر كىلىتتەرىن الدى. وسىلايشا قايىرىمدى قالادا جاستار جىلى اياسىندا قوعامنىڭ ءار سالاسىندا ەڭبەك ەتىپ جۇرگەن 30 جاس باسپانالى (1 بولمەلى - 25, 2 بولمەلى 5 پاتەر بار) بولدى.

ءارى, شاھارداعى جىل سوڭىنا دەيىن بەرىلەتىن 904 پاتەردىڭ كىلتتەرىن تابىستاۋ كەزەڭى تاۋەلسىزدىك كۇنىمەن تۇسپا-تۇس باستالىپ كەتتى.

اقنازار حان كوشەسىندەگى ساتىپ الۋ قۇقىعىنسىز پايدالانۋعا بەرىلگەن كوپقاباتتى تۇرعىن ۇيدەگى پاتەرلەردىڭ جالپى اۋدانى 1137 شارشى مەتردى قۇرايدى. وسى ءۇيدىڭ قۇرىلىسى بارىسىندا 200-دەن استام جاس جۇمىسپەن قامتاماسىز ەتىلگەن.

ايتا كەتەرلىگى, ەلىمىزدەگى جوعارى وقۋ ورىندارى مەن جاستار ءجيى شوعىرلانعان مەگاپوليستە الداعى ەكى جىلدا جاستار ءۇشىن 900-دەن استام  پاتەر بەرىلەتىن بولادى. وسىلايشا باعدارلاما اياسىندا 2704 جاس جالدامالى ۇيمەن قامتاماسىز ەتىلمەك.

 شىمكەنت