كەلەر جىلدان باستاپ حالىقارالىق پوشتا جونەلتىلىمدەرىمەن جىبەرىلەتىن, سونداي-اق تاسىمالداۋشى جەتكىزەتىن جەكە پايدالانۋعا ارنالعان تاۋارلاردى باجسىز اكەلۋ نورمالارىنا وزگەرىس ەنگىزىلمەك.
قارجى مينيسترلىگى مەملەكەتتىك كىرىستەر كوميتەتىنىڭ حابارلاۋىنشا, 1 قاڭتاردان باستاپ ونىڭ كولەمى 31 كيلونى جانە 200 ەۋرونى قۇرايتىن بولدى. تاۋار كولەمى بۇل نورمادان اسقان جاعدايدا تاۋار قۇنىنان 15 پايىزدىق, سالماقتىڭ 1 كيلوگرامى ءۇشىن كەمىندە 2 ەۋرو مولشەرلەمەسى بويىنشا كەدەندىك تولەمدى تولەۋگە مىندەتتى. ءبىر اتاپ وتەرلىگى, ازاماتتاردىڭ تاۋار اكەلۋ, پوشتا ارقىلى الۋ جيىلىگىنە قاتىستى مەرزىمدىك شەكتەۋلەر الىنىپ تاستالادى.
قازىر ەۋرازيالىق ەكونوميكالىق وداقتىڭ كەدەندىك اۋماعىنا كەدەندىك باجداردى, سالىقتاردى تولەمەي اكەلىنەتىن, جەكە پايدالانۋعا ارنالعان تاۋارلاردىڭ نورمالارى ءار ازاماتقا 1 اي ىشىندە 500 ەۋرو جانە سالماعى 31 كيلو ەكەنىن ايتا كەتەيىك. جاڭا نورما بويىنشا ازاماتتاردىڭ 1 اي ىشىندە 1 مارتە ەمەس, كۇن سايىن تاۋار تاسىسا نەمەسە پوشتا جونەلتىلىم ارقىلى الۋىنا دا مۇمكىندىگى بار.
قاراپايىم مىسالمەن تۇسىندىرەر بولساق, باعاسى 300 ەۋرو بولاتىن ينتەرنەت-دۇكەندەردەن تاپسىرىس بەرىلگەن جىبەرىلىم ءۇشىن جولاۋشىلارعا ارنالعان كەدەندىك دەكلاراتسيا تاپسىرىلىپ, قۇندىق نورماسىنان اساتىن بولىگى دە كەدەندىك تولەمدەر قۇنىنىڭ 15%-دىق مولشەرى بويىنشا دەكلاراتسيالانادى. ياعني 100 ەۋرو ءۇشىن ونىڭ 15%-نا تەڭ قاراجات تولەنۋى كەرەك. ال جىبەرىلگەن زاتتىڭ قۇنى 200 ەۋرودان اسپاسا, بىراق سالماعى 35 كيلو بولىپ مەجەدەن 4 كيلوعا اسىپ كەتسە, وندا سول 4 كيلو ءۇشىن كەدەندىك باج سالىنادى.