بيىلعى وقۋ جىلىنىڭ قورىتىندىسىمەن №1 ورتا مەكتەپتىڭ «تۇلپار» قوعامدىق ۇيىمى قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆ قورىنىڭ 1 ميلليون تەڭگە گرانتىن جەڭىپ العان بولاتىن. بالالاردىڭ باستاماشىلدىعىمەن بۇل قارجىنى ارشالى اۋىلىنداعى جيىرما جىل بويى قاراۋسىز قالعان دەمالىس پاركىن تارتىپكە كەلتىرىپ, جاڭعىرتۋعا جۇمساۋ تۋرالى شەشىم قابىلداندى.
يگى ىسكە جۇمىلا كىرىسكەن وقۋشىلار مەن وزگە دە ەرىكتىلەر جازعى كانيكۋل كۇندەرى بەلسەنە جۇمىس اتقارىپ, اۋماعى ەكى گەكتارلىق ساياباقتى ادام تانىماستاي وزگەرتتى. بالالار باستاماسى اۋىل جاستارى, جەرگىلىكتى اكىمشىلىك, كوممۋنالدىق شارۋاشىلىق قىزمەتى تاراپىنان قىزۋ قولداۋ تاۋىپ, شارباقتار ورناتىلىپ, گۇلزارلار ەگىلدى, ۇلكەن ساحنا بوي كوتەرىپ, جارىق تارتىلدى. ويىن الاڭىنا قاجەتتى جابدىقتار, سپورتتىق قوندىرعىلار ساتىپ الىندى. جەرگىلىكتى كاسىپكەرلەر دە قاراپ قالماي, التىباقان, بالالار اتكەنشەكتەرىن, ءتىپتى پەينتبول الاڭىن سىيعا تارتتى.
ارشالىلىقتار جاڭا ساياباققا «قۋانىش ورداسى» دەگەن ات بەردى.
باقبەرگەن امالبەك,
«ەگەمەن قازاقستان».
اقمولا وبلىسى.