قازاقستان پرەزيدەنتى نۇرسۇلتان نازارباەۆ بەلگيا كورولى البەرت II-گە جانە ونىڭ ۇلى فيليپپكە جوعارى بيلىكتىڭ رەسمي تۇردە بەرىلۋىنە بايلانىستى قۇتتىقتاۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى.
جەدەلحاتتا قازاقستان پرەزيدەنتى بەلگيانىڭ ۇلتتىق مەرەكەسى – كورولدىڭ انت بەرۋ كۇنىمەن قۇتتىقتاپ, بۇل كۇنى بيلىكتىڭ بەرىلۋىنىڭ سيمۆولدىق ءمانى بارىن جانە ماڭىزدى تاريحي وقيعا بولىپ سانالاتىنىن اتاپ ءوتتى.
«وكىلەتتىگىڭىزدى ۇلىڭىزعا بەرۋىڭىز بەلگيا حالقىنىڭ ەسىندە قالاتىن تاريحي ماڭىزى زور وقيعا بولماق. مەن بريۋسسەلدە ءوتكەن ەكىجاقتى كەزدەسۋلەردى ىقىلاسپەن ەسكە الامىن. ەلدەرىمىز اراسىنداعى دوستىق پەن ەكىجاقتى جانە كوپجاقتى پىشىندەگى ىنتىماقتاستىقتى نىعايتۋعا باعىتتالعان يگى قادامدار ءسىزدىڭ جەكە قولداۋىڭىزدىڭ ارقاسىندا ىسكە اسىرىلعانى انىق», – دەپ اتاپ وتىلگەن كورول البەرت II-ءنىڭ اتىنا جولدانعان قۇتتىقتاۋ جەدەلحاتىندا.
نۇرسۇلتان نازارباەۆ حانزادا ءفيليپپتىڭ قازاقستانعا 2010 جىلعى قازانداعى ساپارىن دا جىلى سەزىممەن ەسكە الاتىنىن جەتكىزگەن.
«ءبىزدىڭ ەلدەرىمىز اراسىندا قالىپتاسقان ءوزارا قارىم-قاتىناستار ءسىزدىڭ قولداۋىڭىزبەن الدا دا ەكى ەل حالىقتارىنىڭ يگىلىگى ءۇشىن دوستىق جانە ءوزارا تۇسىنىستىك رۋحىندا ودان ءارى داميتىنىنا سەنەمىن», – دەلىنگەن جەدەلحاتتا.
سوڭىندا مەملەكەت باسشىسى البەرت II-گە جانە كورول فيليپپكە زور دەنساۋلىق, قىزمەتتەرىنە مول تابىس, ال بەلگيا حالقىنا باق-بەرەكە مەن يگىلىك تىلەگەن.