«سامۇرىق-قازىنا» ۇلتتىق ءال-اۋقات قورىنىڭ باسقارما باسشىسى احمەتجان ەسىموۆ ماڭعىستاۋ وبلىسىنداعى قاراجانباس كەن ورنىنا بارىپ, سۋدى تۇششىلاندىراتىن جاڭا زاۋىتتىڭ ىرگەتاسىن قالاپ, ەسكى كەن ورىندارىنان مۇناي الۋ كوەففيتسيەنتىن ارتتىرۋ بويىنشا كەڭەس وتكىزدى.
الدىمەن احمەتجان ەسىموۆ «قازمۇنايگاز» ۇك» اق باسقارما توراعاسى اليك ايدارباەۆپەن بىرگە كولەمى تاۋلىگىنە 17 مىڭ تەكشە مەتر بولاتىن سۋ قاباتىن وڭدەۋگە, پايدالانۋعا جانە تۇششىلاندىرۋعا ارنالعان زاۋىتتىڭ ىرگەتاسىن قالاۋعا قاتىستى. جاڭا زاۋىت بۇعان دەيىن اتالعان وڭىردە قوردالانىپ كەلگەن بىرقاتار ماسەلەلەردىڭ الدىن الىپ, سۋ ماسەلەسىن تولىق شەشۋگە باعىتتالىپ وتىر.
– بىرىنشىدەن, زاۋىت قۇرىلىسى كەن ورنى ءۇشىن ۇلكەن ماڭىزعا يە. كۇن سايىن استراحاننان اتىراۋ وبلىسى ارقىلى ماڭعىستاۋعا دەيىن سوزىلاتىن 17 مىڭ تەكشە مەتر سۋ ساتىپ الىنادى. اتالعان زاۋىتتى كەلەسى جىلدىڭ سوڭىنا قاراي اياقتاۋ جوسپارلانىپ وتىر. ونىڭ قۇرىلىسى تولىق اياقتالعاننان كەيىن اتالعان كەن ورىندارىنا قاجەتتى سۋ مولشەرىن تۇتىنۋ قاجەتتىلىگى جويىلادى جانە بۇل كولەم وسى ەكى وبلىستا باسقا ماقساتتارعا جۇمسالادى. سونداي-اق زاۋىت مۇناي ءوندىرۋدى 750 مىڭ تونناعا ارتتىرۋعا جانە ەلەكتر ەنەرگياسىنا شىعىنداردى قىسقارتۋعا مۇمكىندىك بەرەدى. بۇل ەكونوميكالىق ءتيىمدى جوبا بولماق, – دەدى قور توراعاسى احمەتجان ەسىموۆ.
سونىمەن قاتار اقتاۋعا بارار جولدا احمەتجان ەسىموۆ قاراجانباس كەن ورنى جانىنداعى ۆاحتالىق كەنتتە بولىپ, جۇمىسشىلاردىڭ تۇرمىس-تىرشىلىگىمەن تانىستى. سونىمەن قاتار, اقتاۋ قالاسىنداعى «قازمۇنايگاز» ۇك» اق-تىڭ عىلىمي نىساندارىن ارالادى. سودان كەيىن «سامۇرىق-قازىنا» ۇلتتىق ءال-اۋقات قورىنىڭ باسقارما باسشىسى ەسكى كەن ورىندارىن دامىتۋ جونىندە كەڭەس وتكىزدى.
كەڭەس بارىسىندا قاتىسۋشىلار ەسكى كەن ورىندارىنان مۇناي الۋ كوەففيتسيەنتىن ارتتىرۋ بويىنشا ماسەلەلەردى تالقىلادى. مىسال رەتىندە ماڭعىستاۋ وبلىسىنداعى وزەن كەنى كورسەتىلدى. بۇل كەن ورنى 1960 جىلدان بەرى پايدالانىلىپ كەلەدى. ءتيىستى انىقتاۋ شارالارىنىڭ ناتيجەسىندە بۇگىندە وزەن كەنى ورنىنداعى مۇنايدىڭ سارقىلۋى بايقالادى. مىسالى, بۇعان دەيىن كەن ورنىندا جىلىنا 15 ملن توننا مۇناي وندىرىلسە, قازىرگى ۋاقىتتا بۇل كولەم 6 ملن توننادان كەم ەكەنى انىقتالىپ وتىر. كەڭەس بارىسىندا سويلەگەن سوزىندە احمەتجان ەسىموۆ كەن ورىندارىنىڭ سارقىلۋى سياقتى جاعدايلاردا رەسەي فەدەراتسياسىنىڭ تاجىريبەسىن زەرتتەپ, زەردەلەۋدى جالعاستىرۋ كەرەكتىگىن اتاپ ءوتتى.
– كورشى رەسەيدە ءبىزدىڭ «وزەنگە» ۇقساس كەن ورىندارى ءۇشىن ەرەكشە شارتتار بەكىتىلىپ, ءتيىستى زاڭ قابىلداندى. مۇنداي تاجىربيەنى قازىرگى ۋاقىتتا ەگجەي-تەگجەيلى قاراستىرىپ جاتىرمىز, – دەپ اتاپ ءوتتى احمەتجان ەسىموۆ.
سونىمەن قاتار قور توراعاسى جۇمىس ورىندارىن جانە مۇناي ءوندىرۋ قۇرىلىمىن ساقتاۋ ماقساتىندا رەسەيدە قابىلدانعان وسىنداي ماسەلەلەردى شەشۋگە, اتاپ ايتقاندا ءوندىرىستى دامىتۋعا ينۆەستيتسيا قۇيۋعا مۇمكىندىك بەرۋ ءۇشىن ەسكى كەن ورىندارىنا سالىقتىق پرەفەرەنتسيالار بەرۋگە قول جەتكىزۋ قاجەتتىگىن اتاپ ءوتتى.
قور توراعاسى بۇعان دەيىن ەل پرەزيدەنتى قاسىم-جومارت توقاەۆتىڭ قاتىسۋىمەن اتىراۋدا وتكەن كەڭەستە كەن ورىندارىنا قاتىستى ماسەلەنىڭ كوتەرىلگەنىن جانە وعان قولداۋ كورسەتكەنىن مالىمدەدى.
سونداي-اق احمەتجان ەسىموۆ «قازمۇنايگاز» ۇك» اق-قا وسى ماسەلەنى تۇبەگەيلى زەرتتەۋگە جانە سارقىلاتىن كەن ورىندارىنىڭ قورلارى بويىنشا بىرقاتار تاپسىرمالار جۇكتەدى. قور توراعاسى سونىمەن قاتار «قازمۇنايگاز» ۇك» اق كومپانيالار توبىنىڭ ءوندىرىستىڭ تيىمدىلىگىن ارتتىرۋ ارقىلى جانە جاڭا تەحنولوگيالاردى ەنگىزۋ ءۇشىن «تاتنەفت» جانە Baker Hughes سياقتى شەتەلدىك جەتەكشى كومپانيالارمەن ىنتىماقتاستىقتى جالعاستىرۋ قاجەتتىلىگىن اتاپ ءوتتى.