اتىراۋ گاز-حيميا كەشەنى – ونىڭ قۇرىلىسى 2021 جىلى اياقتالادى

«سامۇرىق-قازىنا» ۇلتتىق ءال-اۋقات قورى» باسقارما تور­اعاسى احمەتجان ەسىموۆ باتىس وڭىرىنە جاساعان ساپارىندا «ۇلتتىق يندۋستريالىق مۇ­ناي-حيميا تەحنوپاركى» ارنايى ەكو­نو­­­مي­كالىق ايماعىنىڭ اۋما­عىن­دا ور­نالاسقان كەشەننىڭ قۇ­رى­لىس الاڭدارىن ارالاپ كوردى. 

بۇل جوبا تۇڭعىش پرەزي­دەنت – ەلباسى نۇرسۇلتان نازار­باەۆ­تىڭ تاپسىرماسىنا وراي سالىنىپ جاتىر. شامامەن 10 جىل بۇرىن كومىرسۋتەك شيكىزاتىن تەرەڭ وڭدەۋ جانە پوليەتيلەن شىعارۋ بو­يىن­شا مۇناي-حيميا وندىرىستەرىن قۇرا­تىن ينتەگراتسيالانعان گاز-حيميا كەشەنىن سالۋ تۋرالى ەلباسى تاپسىرماسىنان كەيىن,  «سامۇرىق-قازىنا» قورى باس­شى­لىعىنىڭ شەشىمىمەن 2018 جىلدىڭ ماۋسىم ايىندا جوبا «قازمۇنايگاز» سەنىمگەرلىك باسقارۋىنا بەرىلگەن بولاتىن.  2019 جىلدىڭ سوڭىنا قاراي جوبانى ىسكە اسىرۋ قارقىنى 53%-دى قۇراماق. جوباعا جاڭا مەنەدجمەنت, ياعني «سامۇرىق-قازىنا» توبى كەلگەنگە دەيىن,  بۇل كورسەتكىش 6% دەڭگەيىندە بول­عانىن ايتا كەتۋ كەرەك.

«نىساننىڭ قۇرىلىسى 2021 جىلى اياقتالادى دەپ جوسپارلانىپ وتىر. جوبا جىلىنا 500 مىڭ توننا پوليپروپيلەن ون­دىرۋ­گە مۇمكىندىك بەرەدى. اتال­عان جو­بانىڭ قۇرىلىس الاڭدارى 2 مىڭ­نان استام ادامدى جۇمىس ورىندارىمەن قامتاماسىز ەتىپ وتىر.  كەشەن قۇرىلىسىندا وڭ ىلگەرىلەۋ بار, بۇل جوبا مۇناي-حيميا سالاسىن دامىتۋدىڭ باستاماسى بولماق. ەل ءۇشىن دە ماڭىزى زور كەشەن», دەدى ساپار كەزىندە احمەتجان ەسىموۆ.

بۇدان وزگە, جۇمىس ساپارى كەزىندە قور توراعاسى پروپان-پرو­پيلەن بولۋگە ارنالعان ءىرى كولەم­دى سپليتتەر كولونناسى قۇرى­لى­سى­نىڭ اياقتالۋ سال­تانا­تىنا ار­نال­عان راسىمگە قاتىس­تى. دايىن كو­لوننانىڭ سالماعى 1 100 تون­نا­نى قۇرايدى, ۇزىندىعى 105 مەتر, ديامەترى 8 مەتردەن اسادى, سون­داي-اق جەتى بولەك سەكتسياسى بار.

كولوننا  Kazakhstan Petro­che­mical Industries ينتەگرە­تسيالانعان گاز-حيميا كەشەنى قۇرىلىس الا­ڭىنا دەيىن اتىراۋ-دوسسور تراس­ساسىنىڭ بويىمەن ءۇش تاۋلىك ىشىندە ارنايى جۇك كولىگىمەن تا­سى­مالدانادى. مارشرۋتتىڭ جالپى ۇزىندىعى – 45 شاقىرىم.

سونىمەن قاتار احمەتجان ەسىموۆ قۋاتى 310 مۆت گاز تۋربينالى ەلەكتر ستانساسىن  ىسكە قوسۋ سالتاناتىنا قاتىس­تى. بۇل ەلەكتر ستانسالارى  «ۇلت­تىق ين­دۋستريالىق مۇناي – حي­ميا تەحنوپاركى» ارنايى ەكونو­مي­كالىق ايماعىنداعى نىسان­دار­دى ەلەكتر قۋاتىمەن, سونداي-اق  جوعارى قىسىمدى بۋمەن قام­تا­ما­سىز ەتۋگە باعىتتالعان.