الماتى قالاسىندا قازاقستاننىڭ حالىق ءارتىسى, قۇرمەت وردەنىنىڭ يەگەرى, پروفەسسور, بەلگىلى كۇيشى-كومپوزيتور تۇياقبەردى شامەلوۆتى ەسكە الۋ كەشى ءوتتى.
وسى شاراعا ارنايى قاتىسقان قازاقستان رەسپۋبليكاسى مادەنيەت جانە سپورت ۆيتسە ءمينيسترى نۇرعيسا داۋەشوۆ, اۋەزوۆ اۋدانىنىڭ اكىمى سايران سايفەدەنوۆ, باتىس قازاقستان وبلىستىق عاريفوللا قۇرمانعاليەۆ اتىنداعى فيلورمونيانىڭ ديرەكتورى اسحات تاراس ۇلى, دومبىراشى, ۇستاز, فولكلورتانۋشى, قر ەڭبەك سىڭىرگەن ونەر قايراتكەرى كاريما ساحارباەۆا كۇيشى تۋرالى ەستەلىكتەرىمەن ءبولىستى.
- ءبىزدىڭ باتىس قازاقستان وبلىستىق تاريحي-ولكەتانۋ مۋزەيىنىڭ قورىندا تۇياق اعامىزدىڭ ءوزى تۇتىنعان بۇيىمدارى, كونتسەرتتىك كيىمدەرى مەن ماراپاتتارى ساقتاۋلى تۇر. وسى كەزدەسۋگە تۇياق اعامىز قۇرمانعازى وركەسترىندە باس كونتسەرتمەيستەر بولعان كەزدە كيگەن ساحنالىق كيىمىن, ءوزىنىڭ قولىنىڭ تابى تيگەن دومبىراسىن, نۇرسۇلتان قالاسىندا ت.شامەلوۆتىڭ 60 جىلدىق مەرەيتويىنا بايلانىستى وتكىزىلگەن كونتسەرتتە باتىس قازاقستان وبلىستىق داۋلەتكەرەي اتىنداعى وركەسترى سىيعا بەرگەن شاپانىن, جاڭاقالا اۋدانىنىڭ قۇرمەتتى ازاماتى اتاعىن العاندا بەرىلگەن ماراپاتىن, ءىى رەسپۋبليكالىق ءا.ەسقاليەۆ اتىنداعى كۇي سايىسىنا قاتىسقانى ءۇشىن 2012 جىلى بەرىلگەن توسبەلگىسىن, كۇي جيناعى جيناقتالعان ءۇن تاسپالارىن ورالدان ارنايى الىپ كەلدىك. الماتىلىق اعايىنعا, كۇيشىنىڭ ونەرىن سۇيگەن كورەرمەندەرگە وسى جادىگەرلەردى كورسەتىپ, تاريحىن تۇسىندىرگەنىمدى وزىمە زور مارتەبە دەپ ءبىلدىم, - دەيدى بقو تاريحي-ولكەتانۋ مۋزەيىنىڭ ديرەكتورى ميربولات ەرساەۆ.
تۇياقبەردى اعانىڭ رۋحىنا ارنالعان شارا شىن مانىندە تالانتقا تاعزىمنىڭ, دارىنعا قۇرمەت كورسەتۋدىڭ, اسىلدى ارداق تۇتۋدىڭ ۇلگىسى بولدى. شىنايى تالانتىمەن ورتاسىن مويىنداتقان كۇيشى, پايىمى تەرەڭ ازامات, ءومىر بويى بيىك ونەردىڭ قامىن جەگەن قايراتكەر تۇياقبەردى شامەلوۆ تۋرالى ارىپتەستەرى مەن كەيىنگى ءىزباسار شاكىرتتەرى جۇرەكجاردى ويلارىن ورتاعا سالدى.
اقىن قادىر مىرزا ءالى ايتقانداي, ساۋساعىنان مىڭ تۇياقتىڭ ءدۇبىرىن شىعارىپ, دومبىرانى ادامشا سويلەتكەن تۇياقبەردى اعامىز ومىردەن ەرتە كەتكەنىمەن, كوپشىلىك كوڭىل بىرلەتكەن وقيعاعا كۋا بولدى. كۇيشىنىڭ ۇرپاعى, 7 جاسار دامير سوفيەۆ حالىق كۇيى «تەپەڭ كوكتى» كەرەمەت ورىنداپ بەردى. كىشكەنتاي ونەرپازدىڭ جۇرت الدىندا قىسىلماي شىعىپ ونەر كورسەتكەنىنە جينالعان قاۋىم ريزا بولىپ, «ورنىندا بار وڭالار» دەستى.
كەش سوڭىندا كۇيشىنىڭ جارى جانساۋلە شامەلوۆا ەرىنىڭ ەسىمىن ۇلىقتاپ, تۇلعالىق قاسيەتىن دارىپتەپ, شاراپاتتى شارانى ۇيىمداستىرعان ازاماتتارعا, الماتى قالاسىنىڭ اكىمدىگىنە, كۇيشىنىڭ شاكىرتتەرى نۇرعيسا مۇرات ۇلىنا, قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ ديرەكتورى قۋانىشبەك جانبولات ۇلىنا العىس ايتتى.