وبلىستىڭ تارباعاتاي, زايسان, اباي اۋداندارى مەن سەمەي قالاسىندا كۇن كۇرت جىلىپ, اۋىل-اۋىلداردى سۋ الا باستاسا, كۇرشىمدە, كەرىسىنشە, وسىدان بىرەر كۇن بۇرىن 30, ءتىپتى كەي جەرلەردە 60 سانتيمەترگە دەيىن قار جاۋىپ, قاۋىپتى ودان ءارى كۇشەيتىپ وتىر. كۇرشىم مەن ۇلكەن نارىن, كۇرشىم-قالجىر-تەرەكتى اۋىلدارىنا جول 7 ناۋرىزدان بەرى جابىق. تارباعاتاي اۋدانىنىڭ جەتىارال اۋىلىنا سۋ قاپتادى. قىزىلكەسەك, قارعىبا, تانامىرزا, قاروي, باسقا اۋىلداردى دا سۋ باسۋ قاۋپى بار. زايسانعا قاراي كۇرەجولدىڭ جابىلعانىنا ءبىراز ۋاقىت ءوتتى. ءبىر اپتادان سوڭ كەشە جول ارەڭ تازالاندى. كەيبىر اۋىلداردا ەلەكتر جارىعى جوق, ونىڭ ۇستىنە “شىعىسەنەرگوترەيد” كومپانياسى جارىقتى ءجيى وشىرۋدە.
وبلىس اكىمى ب.ساپارباەۆ الداعى ۋاقىتتا جارىقتى سەبەپسىز ءوشىرگەن جاعدايدا ولارمەن اڭگىمەنىڭ قىسقا بولاتىنىن قاتاڭ ەسكەرتتى. وبلىستىق اكىمدىكتە وتكىزىلگەن شۇعىل كەڭەستە تاسقىننىڭ الدىن-الۋ جونىندە ءسوز بولدى.
تارباعاتاي اۋدانىندا ەكى مىڭنان استام ادام قاۋىپسىز جەرلەرگە كوشىرىلدى. 19 مىڭ تۇرعىن سۋ باسۋ قاۋپى ايماعىندا تۇر. زايسان اۋدانىنىڭ تاسباستاۋ اۋىلىنداعى ءبىراز تۇرعىندار دا قاۋىپسىز جەرلەرگە كوشىرىلگەن. اۋداننىڭ باسقا اۋىلدارىن دا سۋ باسۋ قاۋپى كەتە قويعان جوق. كەندى التايدىڭ ءۇرجار, اياگوز, باسقا دا بىرنەشە اۋداندارىنداعى كوپتەگەن ەلدى مەكەندەر سۋ تاسقىنىنىڭ الدىن الۋ ءۇشىن كۇندىز-ءتۇنى تىنباي قاۋىپسىزدىك شارالارىن اتقارىپ جاتىر. وبلىس اكىمى ب.ساپارباەۆ سوڭعى جيىندا اۋدان, قالا اكىمدەرىنە قاداۋ-قاداۋ تاپسىرما بەرىپ, ەگەر وزدەرى باسقاراتىن ەلدى مەكەندەردە اپاتقا جول بەرىپ السا, قاتاڭ جازا قولداناتىنىن شەگەلەپ ەسكەرتتى.
وڭداسىن ەلۋباي.