ەجەلدەن كارتوپ وسىرۋمەن داڭقى شىققان نارىنقول ءوڭىرىنىڭ شارۋالارى بيىل دا تابىسقا كەنەلۋدە. جەكە اۋدان بولىپ قۇرىلعانىنا جىلدان اسا ۋاقىت بولسا دا, رايىمبەك وڭىرىندە وسى كارتاپ ەگىستىگىنىڭ كولەمى 10 ەسەگە ءوسىپتى. بۇل جەرگىلىكتى جۇرتتىڭ جاپپاي جەر ەمىپ, نەسىبەسىن ەڭبەكتەن تابۋعا جۇمىلعانىن كورسەتەدى. قازىر اۋىلداعى اعايىن كارتوپ ەگىستىگىنىڭ كولەمىن 700 گەكتارعا ۇلعايتىپ, جينالاتىن ءونىمدى 380 تسەنتنەرگە دەيىن جەتكىزىپ وتىر.
رايىمبەك اۋداندىق اۋىل شارۋاشىلىعى ءبولىمىنىڭ باسشىسى نۇرلان ورالقۇلوۆتىڭ ايتۋىنشا, بيىل اۋداندا كارتوپ 6 مىڭ گەكتارعا سەبىلىپ, ودان 123 مىڭ توننا ءونىم الۋ جوسپارلانىپ وتىر. بىلتىر وبلىستىق اكىمدىك كومەگىمەن 240 توننا گوللانديالىق «سانتە» جانە «اگريا» سورتتارى ساتىپ الىنعان, سول سورتتاردىڭ تۇقىمدارى بىلتىر 70 گەكتارعا سەبىلسە, بيىل بۇل كورسەتكىش 10 ەسەگە ءوسىپ, 700 گەكتارعا جەتكىزىلدى. جاڭا تۇقىمنىڭ, جاڭا تەحنولوگيانىڭ ارقاسىندا ونىمدىلىك تە ارتتى. بۇرىن ءار گەكتارىنان 170-180 تسەنتنەردەن كارتوپ الىناتىن بولسا, قازىر بۇل كورسەتكىش 380 تسەنتنەرگە جەتكەن.
كارتوپ ءوسىرۋدىڭ تابىستى بولۋىنا اۋدانداعى سەرۆيستىك دايىنداۋ ورتالىقتارىنىڭ كوپ كومەگى ءتيىپ وتىر ەكەن. سونىڭ ءبىرى تەكەس اۋىلىنداعى سەرۆيستىك دايىنداۋ ورتالىعى. وتكەن جىلى وبلىس بيۋدجەتىنەن كارتوپ ءوندىرىسىن دامىتۋ ءۇشىن ارنايى ورتالىق قۇرىپ, تەحنيكا الۋعا 500 ملن تەڭگە بولىنگەن بولاتىن. سول كومەكتىڭ ارقاسىندا 3 سدو جاساقتالىپ, 458 ملن تەڭگەگە جالپى سانى 87 بىرلىك تەحنيكا ساتىپ الىنعان, سونىڭ ىشىندە 21 تراكتور, 5 كومباين بار. قالعان سوماعا الداعى ۋاقىتتا تەحنيكالار تاعى دا تولىقتىرىلاتىن بولادى.
كارتوپتان مول ءونىم الۋعا اۋدانداعى «وركەن» جانە «ميراس» شارۋا قوجالىقتارى قول جەتكىزىپ وتىر. قازىر شارۋلار دايىن ءونىمدى وتكىزۋدىڭ جولدارىن قاراستىرۋدا. «وركەن» شارۋا قوجالىعنىڭ باسشىسى تالعات نۇسىپقوجاەۆتىڭ ايتۋىنشا, «سانتە» سورتىن وڭدەۋگە چيپسى شىعاراتىن كاسىپورىنمەن كەلىسسوزدەر جۇرگىزىلۋدە. سونىمەن بىرگە وسى اۋداندا كارتوپتى وڭدەپ, كراحمال دايىندايتىن زاۋىت اشۋعا ۇسىنىس تۇسكەنى جانە ونى جۇزەگە اسىرۋدىڭ مۇمكىندىكتەرى قاراستىرىلىپ جاتقانى ايتادى. ياعني, شيكىزاتتى مول ءارى ساپالى وندىرەتىن ايماقتىق وڭدەۋشىلەر وزدەرى ىزدەپ كەلەتىن كۇنگە جەتىپ قالعانىمىز انىق.
- جاڭا اۋدانداعى جۇمىس قارقىندى. حالىققا قىزمەت كورسەتەتىن ءتۇرلى مەكەمەلەر سالىنىپ, بار عيماراتتاردى قايتا جاڭعىرتىپ, جاڭالاپ جاتىرمىز. نارىنقول اۋىلىن كوگالداندىرۋعا, جولداردى جوندەۋگە, كوشەنى جارىقتاندىرۋعا, بالالاردىڭ ويىن الاڭدارى مەن سپورتتىق الاڭدارىن سالۋعا, تۇرعىن ۇيلەردىڭ اۋلالارىن كوركەيتۋگە, قاي جاعىنان بولسىن اۋدان ازاماتتارى, وبلىستىڭ ءاربىر اۋدان, قالاسى ءوز ۇلەستەرىن قوسۋدا. نارىنقول ءوڭىرىنىڭ, اسىرەسە, اۋىل شارۋاشىلىعىنداعى مۇمكىندىگى كوپ. رايىمبەك اۋدانىنا كارتوپتى وندىرىستىك ماسشتابتا وسىرۋگە جاساعان مەملەكەت قولداۋى ءوز ناتيجەسىن بەرىپ وتىر. جاس ماماندار تۋعان جەرگە ورالۋدا. تەحنيكالار جاڭاردى, تولىقتى. وبلىس بويىنشا يرريگاتسيالىق جۇيەلەردى قالپىنا كەلتىرۋ جۇمىسىنا كىرىستىك. سونىڭ ناتيجەسىندە ءبىر عانا رايىمبەك اۋدانىنىڭ وزىندە 6 مىڭ گەكتار جەر قالپىنا كەلتىرىلەدى. ياعني كارتوپ ءوندىرىسىن ودان ءارى دامىتۋعا مۇمكىندىك مولايادى دەگەن ءسوز. ءبىز ءوز تاراپىمىزدان اۋىلدىڭ ەڭبەككەر حالقىنا قولداۋ كورسەتىپ, اۋىل شارۋاشىلىعىن وركەندەتۋدى جالعاستىراتىن بولامىز,- دەيدى وبلىس اكىمى اماندىق باتالوۆ.
الماتى وبلىسى