قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى اسقار شاكىروۆ بۇۇ باس حاتشىسىنىڭ جول قوزعالىسى قاۋىپسىزدىگى جونىندەگى ارناۋلى ۋاكىلى جان تودتپەن كەزدەستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
تاراپتار جول قوزعالىسىنىڭ قاۋىپسىزدىگىن ارتتىرۋ جونىندەگى جان-جاقتى ىنتىماقتاستىقتى تالقىلادى. پارلامەنت سەناتى توراعاسىنىڭ ورىنباسارى اسقار شاكىروۆ حالىقارالىق ساراپشىلاردىڭ ۇسىنىستارى ۇلتتىق زاڭنامانى جەتىلدىرۋگە, قۇقىق قولدانۋ تاجىريبەلەرىن جاقسارتۋعا جانە قازاقستاننىڭ ينستيتۋتتىق الەۋەتىن نىعايتۋعا ىقپال ەتەتىنىن اتاپ ءوتتى.
جان تودت ءوز كەزەگىندە بۇۇ-نىڭ جول قوزعالىسى قاۋىپسىزدىگى جونىندەگى بارلىق كونۆەنتسيالارىن قولداعانى جانە بۇۇ ەۋروپالىق ەكونوميكالىق كوميسسياسى الاڭىنداعى جۇمىس توپتارىنىڭ قىزمەتىنە بەلسەندى قاتىسقانى ءۇشىن قازاقستانعا العىسىن ءبىلدىردى. وتكەن جىلدارمەن سالىستىرعاندا قازاقستانداعى جول قاۋىپسىزدىگىن دامىتۋداعى ەلەۋلى وزگەرىستەردى ەرەكشە اتاپ ءوتتى.
بۇۇ-نىڭ ارناۋلى ۋاكىلى ىنتىماقتاستىق تۋرالى ايتا كەلىپ, الەمدەگى جول قوزعالىسى قاۋىپسىزدىگى ماسەلەلەرىن قوزعادى. ول قازىرگى تاڭدا جۇرگىزۋشىلەردىڭ جول ۇستىندەگى كىشىگىرىم قاتەلىكتەردەن تۇراتىن ءتارتىپ بۇزۋشىلىقتارى بار ەكەنىن اتاپ ءوتتى. بۇل – جول قوزعالىسى دەڭگەيىن ءتيىستى دەڭگەيدە باقىلاماۋ; قاۋىپسىزدىك بەلدىكتەرى سياقتى ءتيىستى قۇرىلعىلاردى پايدالانۋدى ەسكەرمەۋ; ماس كۇيدە كولىك جۇرگىزۋ; ءجۇرۋ كەزىندە SMS جىبەرۋ جانە تاعى باسقا ماسەلەلەر بولىپ وتىر. مۇنداي جاعدايلاردى بولدىرماۋ مەن قاراپايىم قاۋىپسىزدىك ەرەجەلەرىن ساقتاۋ جول-كولىك وقيعالارىنىڭ سانىن كەم دەگەندە ەكى ەسەگە قىسقارتادى.
كەزدەسۋ بارىسىندا سەنات توراعاسىنىڭ ورىنباسارى قازاقستاننىڭ ترانزيتتىك الەۋەتىن دامىتۋدىڭ مەملەكەتتىك باعدارلاماسىن ىسكە اسىرۋ, كولىك جولدارىن كەڭەيتۋ مەن ساپاسىن جاقسارتۋ, سونداي-اق جول قوزعالىسى سالاسىنا تارتىلعان بارلىق قۇرىلىمداردىڭ جانە ادامداردىڭ قۇقىقتارى مەن مىندەتتەرىنىڭ ناقتى جۇيەسىن رەتتەيتىن «جول ءجۇرىسى تۋرالى» زاڭىنىڭ ىسكە اسۋى تۋرالى ايتىپ بەردى.
بۇۇ باس حاتشىسىنىڭ جول قوزعالىسى قاۋىپسىزدىگى جونىندەگى ارناۋلى ۋاكىلى جان تودت 2020 جىلعى 19-20 اقپاندا ستوكگولمدە وتەتىن جول قوزعالىسى قاۋىپسىزدىگى جونىندەگى ءۇشىنشى دۇنيەجۇزىلىك مينيسترلەر كونفەرەنتسياسىنا قاتىسۋعا قازاقستاندى شاقىردى.