قازاقستان رەسپۋبليكاسى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى «بىرگە – تازا قازاقستان» ەكولوگيالىق اكتسياسىنا قولداۋ ءبىلدىرىپ, ءار وڭىردەگى مەكەمەلەرىنە ۇندەۋ تاستاعان ەكەن. بۇگىن رەسپۋبليكالىق چەللەندجگە مينيسترلىككە قاراستى «ازاماتتارعا ارنالعان ۇكىمەت» مەملەكەتتىك كورپوراتسياسى اق, «ۇلتتىق اقپاراتتىق تەحنولوگيالار» اق, «قازاقتەلەكوم» اق, »قازاقتەلەراديو», اق, «مەملەكەتتىك راديوجيىلىك قىزمەتى» رمك بقو فيليالدارىنىڭ قىزمەتكەرلەرى قاتىستى.
«ازاماتتارعا ارنالعان ۇكىمەت» مەملەكەتتىك كورپوراتسياسى اق باتىس قازاقستان وبلىسى بويىنشا فيليالىنىڭ ديرەكتورى مارات باسساروۆتىڭ ايتۋىنشا, ماڭىزدى ەكولوگيالىق شارانى مەملەكەتتىك كورپوراتسيانىڭ بارلىق ايماقتاعى فيليالدارى مەن قر ءتسدياو مينيسترلىگىنە قاراستى مەكەمەلەر قولداعان.
- بۇگىن ءبىز ارىپتەستەرىمىزبەن جايىق وزەنىنىڭ جاعالاۋىن, 1 جانە 2 ساياجاي ايماعىن تازالاپ شىقتىق. قىزمەتكەرلەرىمىز تۋعان جەردى كوركەيتۋگە وزىندىك ۇلەس قوسىپ جاتىر. اسىرەسە عاسىرلار بويى شىرىمەي جاتا بەرەتىن پلاستيك سياقتى قوقىستى جيناۋ وتە ماڭىزدى. ءوڭىر تۇرعىندارىن وسىنداي تازالىق اكتسياسىن قولداۋعا, اينالانى تازا ۇستاپ, قالدىقتاردى تاستاماۋعا شاقىرامىن, – دەيدى ديرەكتور.
ايتا كەتەيىك, باتىس قازاقستان وبلىسىندا جوعارىدا اتالعان مەكەمەلەردە قىزمەت ەتەتىن 300 ادام جۇمىلعان. ولاردىڭ جيناعان قوقىسى 3000 تونناعا جەتكەن.
باتىس قازاقستان