بيىلعى جاز ماۋسىمىندا تەمىر جول جانە اۋە جولدارى ارقىلى قاتىناعان قازاقستاندىقتار بيلەتتىڭ قىمباتتىعىنا بايلانىستى ءبىراز قيىندىقتارعا تاپ بولعانى بەلگىلى. وسىعان وراي مەملەكەت باسشىسى پىكىر ءبىلدىرىپ, ءتيىستى ۆەدومستۆولارعا ماسەلەنى تەزدەتىپ رەتتەۋگە تاپسىرما بەرگەن ەدى. يندۋستريا جانە ينفراقۇرىلىمدىق دامۋ مينيسترلىگى ارنايى بريفينگ وتكىزىپ, جولاۋشىلار تاسىمالى نارىعىنداعى بۇگىنگى احۋالدى ءتۇسىندىردى.
بيىلعى جازعى دەمالىسىن كەيبىر ازاماتتار بىرازعا دەيىن ۇمىتپاس. سەبەبى كوپشىلىگىنىڭ ۋاقىتى اۋەجاي مەن تەمىر جول ۆوكزالى ماڭىندا بيلەت ىزدەپ, سابىلۋمەن ءوتتى. بۇل جاعداي جولاۋشىلاردىڭ جۇيكەسىن اجەپتاۋىر توزدىردى. اقىرى قولدان جاسالعان تاپشىلىق جانە قىمباتشىلىق ماسەلەسى جوعارى جاققا دەيىن جەتتى. وكىنىشتىسى سول, بىزدەگى مەملەكەتتىك باسقارۋداعى ولقىلىقتىڭ ءبىرى پرەزيدەنت, ءيا بولماسا ۇكىمەت باسشىسى تاپسىرما بەرمەيىنشە جاۋاپتى ورگاندار ءتيىستى مىندەتتەرىن اتقارۋعا قاۋقارسىز.
كەشەگى ءباسپاسوز ءماسليحاتىندا يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ توراعاسى ايبەك ءالجانوۆ قىمباتشىلىقتىڭ نەگىزگى سەبەبى ۇشاقتاردىڭ جەتىسپەۋشىلىگى مەن اۆياوتىن باعاسىنىڭ كۇرت شارىقتاۋى ەكەنىن العا تارتتى.
– مەملەكەت باسشىسىنىڭ قازاقستان حالقىنا ارناعان جولداۋىنداعى تاپسىرمالاردى جۇزەگە اسىرۋ ماقساتىندا جالپىۇلتتىق شارالار جوسپارى ازىرلەنۋدە. جولداۋدا اۋە بيلەتتەرىنىڭ قىمباتتىعى جونىندە دە ايتىلدى. مۇنىڭ نەگىزگى سەبەبى – ۇشاقتاردىڭ جەتىسپەۋشىلىگى مەن جانار-جاعارماي باعاسىنىڭ قىمباتتاۋىندا. احۋالدى رەتتەۋ ءۇشىن جانە تاريف قۇنىن تومەندەتۋ ماقساتىندا 1-مامىردان باستاپ «FlyArystan» لوۋكوستەرىن ىسكە قوستىق. ەندى بيلەت باعاسىن ءتۇسىرۋ ءۇشىن «سامۇرىق-قازىنا» اق-پەن بىرلەسىپ, اۆياپاركتى جاڭا ۇشاقتارمەن تولىقتىرۋ جوسپارلانعان. ەنەرگەتيكا مينيسترلىگىمەن سۇيىق وتىن باعاسىن ءتۇسىرۋ بويىنشا كەلىسسوزدەر جالعاسادى. وتاندىق مۇناي وڭدەۋ زاۋىتتارى تولىق جۇمىسىنا كىرىسكەن سوڭ, سۇرانىسىمىز وتەلۋى ءتيىس, دەدى ا.ءالجانوۆ.
ال تەمىر جول بيلەتتەرىنىڭ تاپشىلىعى تۋراسىندا يندۋستريا جانە ينفراقۇرىلىمدىق دامۋ مينيسترلىگى كولىك كوميتەتى توراعاسىنىڭ ورىنباسارى جانىبەك تايجانوۆ ءتۇسىندىرىپ بەردى. ول بۇل ماسەلەنىڭ ۋشىعۋىنا الىپساتارلاردىڭ تىكەلەي قاتىسى بار ەكەنىن جوققا شىعارمادى.
– قولدان جاسالعان بيلەت تاپشىلىعى – وزەكتى ماسەلەنىڭ ءبىرى. الىپساتارلارمەن كۇرەس كۇشەيتىلىپ, جاعىمسىز ديناميكانى ءتۇسىرۋ بويىنشا جۇمىس قولعا الىندى. تەمىر جول تاسىمالىنداعى تۇرمىستىق جەمقورلىقتىڭ الدىن الۋ ءۇشىن جول كارتاسى قابىلداندى, دەدى ج.تايجانوۆ.
سپيكەر بيىل 63 جولاۋشىلار ۆاگونى ساتىپ الىنعانىن ايتتى. ونىڭ 41-ءى ەلگە جەتكىزىلدى. قىركۇيەكتىڭ سوڭىنا دەيىن تاعى 23 ۆاگون اكەلىنبەك. جاۋاپتى ورگان وكىلى «نۇرلى جول» باعدارلاماسى بويىنشا 2025 جىلعا دەيىن جىل سايىن 150 ۆاگوننان ساتىپ الۋ قاراستىرىلعانىن جەتكىزدى.