وڭتۇستىك كورەيا باس اسپازدار كەڭەسىنىڭ توراعاسى, ايگىلى اسپاز حان چۋل بە كورەي تاعامدارىن دامىتۋ ينستيتۋتىنىڭ حالىقارالىق باعدارلاماسىن جۇزەگە اسىرۋ ماقساتىمەن الەمنىڭ كوپتەگەن ەلدەرىن ارالاپ, شاكىرت تاربيەلەپ ءجۇر. بىلتىر پحەنچحاندا وتكەن قىسقى وليمپيادا ويىندارى VIP زالىنىڭ باس اسپازى بولعان ول قازاقستاندى ەكىنشى رەت تاڭداپ وتىر. «مۇنداي شەبەرلىك ساباعىن وسىندا بىلتىر دا وتكىزگەنبىز. قازاقستاندىقتاردىڭ كورەي تاعامدارىنا دەگەن قىزىعۋشىلىعى مەن اسپازداردىڭ قاعىلەزدىگى مەنى نۇر-سۇلتان قالاسىنا ەكىنشى رەت الىپ كەلدى. بۇل جولى كورەيالىق ءۇش تانىمال شاكىرتىمدى الا كەلىپ, 20 اسپازعا كورەي تاعامدارىن دايىنداۋدىڭ قىر-سىرىمەن ءبولىسىپ جاتىرمىن. ونىڭ ىشىندە ىستىق, سۋىق جانە ءتاتتى تاعامدار دا بار», دەيدى حان چۋل بە.
كورەي تاعامدارىن حاس شەبەردىڭ وزىنەن ۇيرەنۋ ورايىنا يە بولعان باس قالا اسپازدارى قۋانىشتارىن جاسىرمادى. «كەز كەلگەن اسپاز بۇكىل الەمنىڭ تاعامىن ءپىسىرۋدى ۇيرەنگىسى كەلەدى. كورەي تاعامدارىنىڭ ءدامىن ءدال وزدەرىندەي ەتىپ دايىنداۋ وڭاي ەمەس. ولار تاماققا شوپتەر مەن ءشوپتىڭ تامىرلارىن كوبىرەك قوسادى. مىسالى ءوزىم جەنشەننىڭ ءدامىن ءبىرىنشى رەت تاتتىم. بىراق حان چۋل بە ۇستاز بىزگە وتە مۇقياتتىلىقپەن ۇيرەتۋدە. وسىنداي تانىمال اسپازدان ساباق العانىما قۋانىشتىمىن. الداعى ۋاقىتتا ۇيرەنگەنىمىزدى ءوزىمىزدىڭ اس مازىرىمىزگە قوسۋعا كۇش سالامىز», دەيدى Astana Marriott قوناقۇيىنىڭ اسپازى نۇرلىبەك بالابەك.
فەستيۆال كەزىندە حان چۋل بەنىڭ قولىنان شىققان قاراقۇمىق قۇيماعى, مەرگيا (جەنشەن) قوسىلعان تاۋىق سورپاسى, كوكونىس قوسىلعان پيبيمپاب, سۋە-كالبيگۋي, چاپچە قاتارلى ءبىر قانشا ءمازىر جەلىسىنىڭ ءدامىن تاڭداپ تاتۋعا مۇمكىندىك بار. «مەن شىعىس تاعامدارىن ءسۇيىپ جەيمىن. سونىڭ ىشىندە كورەي اسىن ايرىقشا جاقسى كورەمىن. كورەيالىق ايگىلى اسپاز حان چۋل بەنىڭ قولىنان بىلتىر دا ءدام تاتقانمىن. بيىلعى اس ءمازىرى دە مەنىڭ ەرەكشە كوڭىلىمنەن شىقتى. ءدامى ءتىل ۇيىرەدى», دەيدى استانالىق سىمبات يبراگيموۆا.
تاعام مادەنيەتىن عاسىردان-عاسىرعا شىپ-شىرعاسىن شىعارماي جالعاپ كەلگەن كورەيلىكتەردىڭ بۇل ءىسى ءبىزدى دە ءتانتى ەتتى. بۇگىن سول ەلدىڭ تانىمال تاماعىنا تامسانساق, ەرتەڭ ساياحاتتاپ بارىپ ءوز قولدارىنان ءدام تاتۋعا تىرىساتىنىمىز انىق. «ۇلتتىق تاعامىمىزدى ءوز ەلىمىزدە دۇرىس ۇلىقتاي الماي وتىرعان ءبىز اس-سۋىن الىس-جاقىن شەتەلدەرگە ۇيرەتىپ, تانىتىپ جۇرگەن مەملەكەتتەردىڭ قاراسىنا قاشان ىلەسەدى ەكەنبىز» دەگەن كۇپتى وي كوڭىلدە قالدى...