قوس تاراپتىق اۋقىمدى جوبا اياسىندا وتكەن حالىقارالىق عىلىمي-پراكتيكالىق سەميناردا اگروتەحپاركىنىڭ عىلىمي جۇمىس باعىتتارى, بىرلەسكەن زەرتتەۋلەردىڭ ناتيجەسى, اۋىل شارۋاشىلىعى داقىلدارىنىڭ جاڭا سۇرىپتارىن ءوسىرۋ, اۋدانداستىرۋ ماسەلەلەرى تالقىلاندى. جيىنعا سولتۇستىك- باتىس اۋىل شارۋاشىلىعى جانە ورمان شارۋاشىلىعى ۋنيۆەرسيتەتىنىڭ وقىتۋشىلارى, پروفەسسورلار Zhan Zhengmao, Hu Yingang, Guo Dongwei, وقۋ ورىندارىنىڭ قىزمەتكەرلەرى مەن ستۋدەنتتەرى, جەرگىلىكتى عالىمدار, نازارباەۆ زياتكەرلىك مەكتەبىنىڭ وكىلدەرى قاتىسىپ, ءوز ويلارىن ورتاعا سالدى.
«بىلتىر سقمۋ بازاسى نەگىزىندە اگروتەحپارك اشىلىپ, شەتەلدىك جانە وتاندىق سەلەكتسيانىڭ اۋىل شارۋاشىلىق داقىلدارى ەگىلىپ, سىناقتان وتۋدە. ونداعى ماقسات–سۋىققا, ءتۇرلى وسىمدىك اۋرۋلارىنا ءتوزىمدى, ونىمدىلىگى جوعارى بيدايدىڭ جاڭا سۇرىبىن ويلاپ تابۋ. ونىمەن اگروتەحنولوگيالىق فاكۋلتەت ستۋدەنتتەرى مەن وقىتۋشىلار اينالىسادى», دەيدى اگروتەحنيكالىق فاكۋلتەتتىڭ دەكانى التىن شاياحمەتوۆا.
كەيىن مۇندا كارتوپتىڭ بىرنەشە سۇرىپتارى بۋدانداستىرىلاتىن بولادى.
قىتايلىق مەيماندار 5 گەكتار اۋماققا ورنالاسقان اگروتەحپاركتى ارالاپ, زەرتتەۋ ناتيجەلەرىمەن تانىستى. سولتۇستىك-باتىس اۋىل جانە ورمان شارۋاشىلىعى ۋنيۆەرسيتەتىنىڭ پروفەسسورى جانگ دجينماونىڭ ايتۋىنشا, جوباعا ستۋدەنتتەر مەن وقىتۋشىلاردىڭ قىزىعۋشىلىعى جوعارى. اتقارىلعان شارۋا قىرۋار. 18 سورت سىنالعان. 13-ءى-نە تەرىسكەيدىڭ كليماتىنا ءتوزىمدى دەگەن باعا بەرىلگەن. كەلەسى جىلى سۇرىپتاردىڭ سانى كوبەيتىلمەكشى.
6 جەرگىلىكتى ستۋدەنت سولتۇستىك-باتىس ۋنيۆەرسيتەتىندە وقىپ كەلىپتى. قازىرگى تاڭدا اگروتەحنولوگيالىق فاكۋلتەتتىڭ 1 ماگيسترانتى مەن 3 وقىتۋشىسى قىتايدا تەگىن ءبىلىم الىپ جاتىر.