جيتس پروفيلاكتيكاسى جانە وعان قارسى كۇرەس جونىندەگى وبلىستىق ورتالىق ءباسپاسوز قىزمەتىنىڭ حابارلاۋىنشا, بيىل ەسەپتە تۇرعان بالالاردىڭ سانى بىردەن تورتە ەسەگە ارتقان. بۇل ساناتتاعى سىرقاتتاردىڭ كوبەيۋىنە ەلىمىزدىڭ باسقا وڭىرلەرىنەن, ونىڭ ىشىندە وڭتۇستىك قازاقستان وبلىسىنان كوشىپ كەلۋى سەبەپ بولعان.
«ۆيچ جۇققان بالالاردىڭ ەڭ ۇلكەنى 12-دە. وتباسىنىڭ تۇڭعىشى. اتا-اناسىمەن تۇرادى, جالپى ءبىلىم بەرەتىن مەكتەپتە وقيدى. انتيرەتروۆيرۋستى تەراپيادان ءوتىپ, قاجەتتى ءدارى-دارمەكتى الىپ تۇرادى», دەيدى ورتالىقتىڭ ەمدەۋ-پروفيلاكتيكالىق جۇمىستار جانە ديسپانسەريزاتسيا ءبولىمىنىڭ مەڭگەرۋشىسى ولگا شيلكينا.
ۆيچ جۇقتىرعان العاشقى بالا قىزىلجار اۋدانىندا تىركەلگەن. قىز بالا ماسكەۋ قالاسىندا ەم قابىلداعانىمەن, كەسەلدىڭ اسقىنۋى سالدارىنان 13 جاسىندا بالالار ۇيىندە قايتىس بولىپتى. ۆيچ سىرقاتىنان ساقتانۋ شارالارى رەسپۋبليكالىق, قوعامدىق ۇيىمداردىڭ باستاماسىمەن وتەتىن سەمينار-ترەنينگتەردە جان-جاقتى ايتىلعانىمەن, ءمان بەرمەۋشىلىكتىڭ اقىرى قايعىلى جاعدايلارعا ۇشىراتىپ جاتادى.
ينفەكتسيا سابيلەرگە كوپ جاعدايدا اناسىنان بەرىلسە, جاسوسپىرىمدەر ەسىرتكى قابىلداۋ بارىسىندا جانە ەرتە جاستان قورعانىشسىز جىنىستىق قاتىناسقا تۇسكەندە جۇقتىراتىن كورىنەدى. ەكىقابات ايەلدەن ينفەكتسيا تابىلعان جاعدايدا بىردەن انتيرەتروۆيرۋس تەراپياسىنان وتەدى. سابيگە دە ۆيچ-كە قارسى دارىلەر ونىڭ سالماعىنا قاراي سيروپپەن بەرىلەدى.