اقش بيلىگى بۇل كومپانياعا بىرنەشە ايىپ تاعىپ وتىر. ءبىرىنشى, Huawei ءوز سمارتفوندارى ارقىلى اقش-تا بارلاۋ قىزمەتىن جۇرگىزگەن. ەكىنشى, يرانعا سانكتسيا سالىنعانىنا قاراماي, بۇل ەلدە بيزنەسىن جالعاستىرعان. ءۇشىنشى, ءوزىنىڭ باسەكەلەسى T-Mobile كومپانياسىنان تەحنولوگيالىق اقپارات ۇرلاعان. ۆاشينگتوننىڭ پىكىرىنشە, مۇنىڭ بارلىعى امەريكانىڭ ۇلتتىق قاۋىپسىزدىگىنە قاتەر ءتوندىرەدى. سوندىقتان 15 مامىر كۇنى دونالد ترامپتىڭ جارلىعىنا سايكەس Huawei جانە وعان قاتىسى بار 70 كومپانيا قارا تىزىمگە ەندى. بۇل قىتايدىڭ تەلەكوممۋنيكاتسيالىق كاسىپورىندارىنا قاتىستى العاشقى شەكتەۋ ەمەس. بىلتىر ZTE كومپانياسىنىڭ تاۋارلارىن ساتىپ الۋعا تىيىم سالىنعان ەدى. وسى سەبەپتى بۇل برەندتەرمەن بارلىق امەريكالىق كومپانيالار كەلىسىمشارتتارىن توقتاتىپ جاتىر. ولاردىڭ قاتارىندا Google, Intel, Qualcomm جانە باسقالارى بار.
دەگەنمەن, بارلىعى ءبىر تىيىممەن شەشىلە سالاتىن وڭاي ءىس ەمەس ەكەن. اق ءۇيدىڭ اكىمشىلىك-بيۋدجەتتىك باسقارماسى جاعدايدى زەرتتەپ, Huawei كومپانياسىنا قاتىستى كەيبىر سانكتسيالاردى 2 جىلعا شەگەرگەندىگى تۋرالى كونگرەسكە حات جولداعان. سەبەپ بىرەۋ – امەريكالىق كومپانيالار اياقاستى Huawei كومپانياسىنىڭ قىزمەتىنەن نەمەسە تاۋارلارىنان باس تارتا المايدى. 2 جىل ىشىندە ولار Huawei كومپانياسىن الماستىرا الاتىن باسقا ارىپتەس تابا الادى. الايدا, بۇدان بولەك, Google كومپانياسى Huawei-گە سانكتسيا سالۋ قاتە شەشىم ەكەنىن, مۇنداي شەكتەۋلەردەن اقش-تىڭ ءوزى زارداپ شەگەتىنىن ايتىپ, دالەلدەۋگە تىرىستى. ولاردىڭ ءۋاجى مىناداي. Huawei كومپانياسىنىڭ سمارتفوندارى Google-دىڭ Android وپەراتسيالىق جۇيەسىندە جۇمىس ىستەيدى. ەندى سانكتسيا سالىنعان سوڭ الگى سمارتفونداردا Google-دىڭ ەشبىر ءونىمى قىزمەت ەتپەيدى. سوندىقتان Huawei امالسىز ءوزىنىڭ جاڭا وپەراتسيالىق جۇيەسىن جاساۋعا تىرىسادى. ول ساپاسىز بولۋى مۇمكىن. سايكەسىنشە, حاكەرلەر ونداي سمارتفون, دەۆايستاردى ءاپ-ساتتە بۇزىپ, ونداعى مالىمەتتەردى جىمقىرىپ كەتەدى. ال اقش پەن الەمدە بۇل كومپانيانىڭ سمارتفوندارى ميلليونداپ ساتىلعان جانە جىل وتكەن سايىن Huawei الەمدىك سمارتفون نارىعىن جاۋلاپ كەلەدى. ماسەلەن, 2019 جىلدىڭ العاشقى ءۇش ايىندا الەمدىك سمارتفون نارىعىنداعى كومپانيالار ۇلەسى مىناداي: Samsung 72 ملن, Huawei 59 ملن, Apple 42 ملن, Xiaomi 27 ملن, Oppo 25 ملن جانە vivo 23.9 ملن دانا سمارتفون ساتقان. Google كومپانياسىنىڭ پىكىرىنشە, Huawei سمارتفوندارىن قولداناتىن امەريكالىق ازاماتتار از ەمەس جانە ولار ەرتەڭ حاكەرلىك شابۋىلعا ۇشىراۋى مۇمكىن.
نuawei كومپانياسىنىڭ وكىلى دجوي كەللي ۆاشينگتوننىڭ جوعارىدا اتالعان شەكتەۋلەرىن سىنعا الدى: «ءبىزدىڭ كومپانيانى قارا تىزىمگە ەنگىزۋ ءوزىن-ءوزى اقتامايتىن ارەكەت. سوندىقتان مۇنى دوعارۋ قاجەت. بۇل شارانىڭ سالدارىنان عالام نارىعىنا تەلەفون جەتكىزۋ تەجەلىپ, ودان دۇنيە جۇزىندە تالاي كومپانيا مەن مىڭداعان ادام زيان كورمەك. ال ول ادامداردا امەريكا پاسپورتى جوق. وسىنىڭ ءبارى ءادىل ءىس پە؟ ءبىزدىڭ ويىمىزشا بۇل قاتە شەشىم».
اقش Huawei كومپانياسىنىڭ سوڭىنا شىراق الا تۇسكەندەي. تەك ءوز نارىعىن جاۋىپ قانا قويماي, باسقا ەلدەردە ەركىن جۇمىس ىستەۋىنە دە كەدەرگى كەلتىرىپ جاتىر. ماسەلەن, ۇلىبريتانيا, اۋستراليا, جاڭا زەلانديا سەكىلدى ءوزىنىڭ وداقتاستارىنا 5G بايلانىس جەلىسىن ورناتۋدا Huawei كومپانياسىنىڭ ءونىمدەرىن قولدانباۋعا شاقىرىپ, ديپلوماتيالىق قىسىم جاساۋعا كىرىستى. بۇل ەلدەردەگى كەيبىر كومپانيالار ۆاشينگتوننىڭ تالابىنا امالسىز كونىپ, اتالعان برەندتەن باس تارتىپ جاتىر. ءبىراق قىتاي تاراپى دا قاراپ قالعان جوق. كەلىسسوزدەر ارقىلى بريتانيا نارىعىندا قالۋعا ءمۇمكىندىك الدى. بۇدان بولەك, Android جۇيەسىن الماستىرۋ ءۇشىن نە وزىندىك, نە رەسەيلىك اۆرورا وپەراتسيالىق جۇيەسىنە اۋىسۋ ماسەلەسى قارالىپ جاتىر. جاقىندا قىتاي توراعاسى سي تسزينپين رەسەيگە بارعان مەملەكەتتىك ساپارىندا وسى تاقىرىپ تالقىلانعان. اۆرورا جۇيەسى رەسەيلىك دەپ اتالعانىمەن, ونى Nokia-نىڭ بۇرىنعى قىزمەتكەرلەرى Jolla كومپانياسىندا جاساپ شىققان. ال رەسەيلىك ميللياردەر گريگوري بەرەزكين Jolla كومپانياسىن ساتىپ العان. ءسويتىپ وپەراتسيالىق جۇيە رەسەيلىك بولىپ كەتتى.
وعان قوسا, ەگەر قىسىم جالعاسا بەرسە, وندا قىتاي جاۋاپ رەتىندە ايفونداردى ءوندىرۋشى Apple كومپانياسىنىڭ ءوز جەرىندەگى بارلىق زاۋىت-فابريكالارىن جابۋى مۇمكىن دەگەن بولجام بار. ال ول كەزدە بۇل ارپالىستان امەريكانىڭ ءوزى زارداپ شەگەدى. دەگەنمەن, بەيجىڭ بۇل قادامعا بارا قويۋى قيىنداۋ. سەبەبى بۇل زاۋىتتاردا جۇمىس ىستەيتىن قىتايلىق ازاماتتار از ەمەس جانە ولار كويلەك, سومكە, ەتىك تىگىپ جاتقان جوق, جوعارى دەڭگەيدەگى تەحنولوگيا ءونىمىن شىعارىپ جاتىر.
بىلتىردان بەرى اقش پەن قىتاي اراسىنداعى تاۋار سوعىسى وسىلايشا تەحنولوگيالىق كۇرەسكە ۇلاسىپ كەتتى. جالپى بۇل سانكتسيالار مەن شەكتەۋلەردىڭ ارتىندا ۇلتتىق قاۋىپسىزدىكتەن بۇرىن اقش-تىڭ جاڭا تەحنولوگيالار نارىعىنداعى ءوز ۇستەمدىگىن قىتايعا بەرمەۋ نيەتى جاتىر دەيدى ساراپشىلار. سەبەبى تاريحقا قاراساق, تەحنولوگيا قاي ەلدە وركەندەسە, سول ەل الەمدىك دامۋدىڭ الدىندا بولعان. ماسەلەن, XVIII عاسىرداعى ونەركاسىپتىك رەۆوليۋتسيا انگليانى الەمدىك ارەنادا العا شىعاردى. ال 5G بايلانىس ستاندارتى قازىر الەمدىك كوممۋنيكاتسيانى جاڭا دەڭگەيگە شىعاراتىن كەلەسى دەڭگەي بولۋى مۇمكىن. ماسەلەن, 5G ستاندارتى 4G-عا قاراعاندا 20 ەسە جىلدام, 5G جىلدامدىعى 20 گبيت/س بولسا, 4G - 1 گبيت/س. ال بۇل سالادا ازىرگە الەم بويىنشا Huawei كومپانياسىنىڭ تاۋارلارى كوبىرەك ورناتىلۋدا. بالكىم, اقش-تى قاتتى الاڭداتىپ وتىرعانى وسى ماسەلە بولار.
ازىرگە اقش ءوزىنىڭ Google, Facebook, Microsoft, Amazon كومپانيالارى جانە سيليكون القابى ارقىلى جاھاندىق تەحنولوگيالىق كوشباسشىلىقتى قولىندا ۇستاپ تۇر. بىراق قىتاي كومپانيالارى ولاردى تابانداپ نارىقتان ىعىستىرۋعا ارەكەت جاساپ جاتىر. دونالد ترامپ ەندى وعان جول بەرگىسى كەلمەيتىندەي. سول ءۇشىن قىتايدىڭ Huawei, ZTE جانە باسقا دا كومپانيالاردىڭ مۇمكىندىكتەرىن شەكتەپ تاستاۋعا تىرىسۋدا دەپ ايتۋعا نەگىز بار. يا, ادىلەتسىزدەۋ. ءادىل بيزنەس زاڭىنا قارسى. بىراق ترامپ امەريكا ءبىرىنشى دەپ ۇران تاستاپ, ءوز ەلىنىڭ مۇددەسىن بارىنەن دە جوعارى قويىپ وتىر. سەبەبى الەمدىك تەحنولوگيالىق نارىق ول جۇزدەگەن ميلليارد دوللار اينالىپ جۇرگەن الىپ بازار, قۇندى كاسىبي ماماندار شوعىرلانعان ورتا, سوڭعى عىلىمي جەتىستىكتەر جۇزەگە اساتىن ۇلكەن زەرتحانا.