سەناتورلار الدىندا ەلىمىزدىڭ ۇلتتىق بانكى توراعاسىنىڭ ورىنباسارى ولەگ سمولياكوۆ بايانداما جاسادى. زاڭ جوباسىنىڭ نەگىزگى ماقساتى قارجى نارىعىن رەتتەۋ, باقىلاۋ جانە قاداعالاۋ فۋنكتسيالارىن ءبولۋ, تۇتىنۋشىلارعا كرەديت بەرۋ تاۋەكەلدەرىن شەكتەۋ بويىنشا تۇجىرىمدامالىق تاسىلدەردى ازىرلەۋ, جالپىعا بىردەي دەكلاراتسيالاۋدى ەندىرۋ ماسەلەلەرى بويىنشا وزگەرىستەر ەنگىزۋ, سونداي-اق جەكە تۇلعالار ءۇشىن ءوسىمپۇلدى ەسەپتەن شىعارۋ بويىنشا سالىقتىق راقىمشىلىق ەنگىزۋ بولىپ تابىلادى.
قارجى نارىعىن رەتتەۋ, باقىلاۋ جانە قاداعالاۋ فۋنكتسيالارىن بولۋگە قاتىستى زاڭ جوباسىندا قارجى نارىعىن رەتتەۋ مەن دامىتۋ, سونداي-اق تۇتىنۋشىلاردىڭ قۇقىقتارىن قورعاۋ فۋنكتسيالارىن قازاقستان رەسپۋبليكاسىنىڭ پرەزيدەنتىنە تىكەلەي باعىنىستى جانە ەسەپ بەرەتىن ءارى رەسپۋبليكالىق بيۋدجەت قاراجاتى ەسەبىنەن قارجىلاندىرىلاتىن قارجى نارىعى مەن قارجى ۇيىمدارىن رەتتەۋ, باقىلاۋ جانە قاداعالاۋ جونىندەگى جەكە ۋاكىلەتتى ورگانعا بەرۋ كوزدەلگەن.
ۋاكىلەتتى ورگاننىڭ قۇقىقتىق مارتەبەسى, قۇرىلىمى جانە باسقارۋ ورگاندارى ايقىندالدى, ونىڭ فۋنكتسيالارى ناقتىلاندى جانە تولىقتىرىلدى. زاڭ جوباسىمەن ۋاكىلەتتى ورگاننىڭ جۇمىسكەرلەرى لاۋازىمدارىنىڭ قۇرامى, ولاردىڭ قۇقىقتارى, مىندەتتەرى مەن جاۋاپكەرشىلىگى ايقىندالدى. سونىمەن قاتار ۋاكىلەتتى ورگان قىزمەتشىلەرىنىڭ مارتەبەسى ايقىندالدى, وعان سايكەس ولار ۇلتتىق بانكتىڭ قىزمەتشىلەرى ىسپەتتى مەملەكەتتىك قىزمەتشىلەرگە جاتپايدى.
ۋاكىلەتتى ورگانعا قارجى نارىعىن رەتتەۋ مەن دامىتۋ جانە تۇتىنۋشىلاردىڭ قۇقىقتارىن قورعاۋ فۋنكتسيالارى بەرىلەدى, ونىڭ قاتارىنا ميكروقارجىلىق قىزمەتتى جۇزەگە اسىراتىن ۇيىمداردى تىركەۋ جانە ەسەپكە الۋ, قارجى ۇيىمدارىنا قاتىستى ەرەكشە رەتتەۋ رەجيمىن ەنگىزۋ, ەكىنشى دەڭگەيدەگى بانكتەردى ساۋىقتىرۋ جونىندەگى شارالاردى ىسكە اسىرۋ, جەكە تۇلعالاردىڭ يپوتەكالىق تۇرعىن ءۇي قارىزدارىن جانە يپوتەكالىق قارىزدارىن قايتا قارجىلاندىرۋ باعدارلامالارىن ىسكە اسىرۋ فۋنكتسيالارى, سونداي-اق قارجى نارىعىنىڭ اقپاراتتىق قاۋىپسىزدىگى ورتالىعىنىڭ فۋنكتسيالارى كىرەدى.
ۇلتتىق بانك باعا تۇراقتىلىعىن قامتاماسىز ەتۋدى, اقشا-كرەديت ساياساتىن, ۆاليۋتالىق رەتتەۋدى جانە تولەم جۇيەلەرىن دامىتۋدى جۇزەگە اسىرادى.
زاڭ جوباسى قارجىلىق تۇراقتىلىق كەڭەسىن قۇرۋدى كوزدەيدى, ول قارجىلىق تۇراقتىلىق ماسەلەلەرى بويىنشا ۆەدومستۆوارالىق ۇيلەستىرۋدى جۇزەگە اسىراتىن بولادى. ۋاكىلەتتى ورگاننىڭ ۇلتتىق بانكپەن قارجىلىق جۇيەنىڭ تۇراقتىلىعى ماسەلەلەرى بويىنشا ءوزارا ءىس-قيمىلى كوزدەلگەن.
تۇتىنۋشىلارعا كرەديت بەرۋ تاۋەكەلدەرىن شەكتەۋگە قاتىستى زاڭ جوباسىمەن كرەديت بەرۋدىڭ بارلىق سۋبەكتىلەرىنە قاتىستى رەتتەۋ جانە قاداعالاۋ قۇرالدارى ەنگىزىلەدى.
«ميكروقارجىلىق قىزمەتتى جۇزەگە اسىراتىن ۇيىمدار» دەگەن ۇعىم ەنگىزىلەدى, ميكروقارجىلىق قىزمەت تۇرلەرى ايقىندالادى.
ميكروكرەديت بەرۋ جونىندەگى قىزمەتتى جۇزەگە اسىراتىن ميكروقارجىلىق ۇيىمدار قارىز تارتۋعا, مەنشىكتى اكتيۆتەرىن باعالى قاعازدارعا جانە وزگە دە قارجى قۇرالدارىنا ينۆەستيتسيالاۋعا, ليزينگتىك قىزمەتتى جانە وزگە دە وپەراتسيالاردى جۇزەگە اسىرۋعا قۇقىلى.
جەكە تۇلعاعا بانكتىك قارىز بەرۋمەن جانە بەرىلگەن بانكتىك قارىزعا قىزمەت كورسەتۋمەن بايلانىستى كوميسسيالار مەن وزگە دە تولەمدەر تىزبەسىن ۋاكىلەتتى ورگان بەكىتەتىن بولادى.
زاڭ جوباسىندا جالپىعا بىردەي دەكلاراتسيالاۋ كەزەڭ-كەزەڭمەن ەنگىزىلەتىنى ايقىندالدى جانە ەنگىزۋ مەرزىمىن توقتاتا تۇرۋ كوزدەلەتىن بولدى.
ءبىرىنشى كەزەڭدە جالپىعا بىردەي دەكلاراتسيالاۋدىڭ ەنگىزىلۋىن 2020 جىلعى 1 قاڭتاردان 2021 جىلعى 1 قاڭتارعا اۋىستىرۋ ۇسىنىلادى. وسى كەزەڭدە دەكلاراتسيالاۋعا جاۋاپتى مەملەكەتتىك لاۋازىمدى اتقاراتىن ادامدار مەن ولاردىڭ جۇبايلارى (زايىپتارى), مەملەكەتتىك فۋنكتسيالاردى ورىنداۋعا ۋاكىلەتتى ادامدار مەن ولاردىڭ جۇبايلارى (زايىپتارى), مەملەكەتتىك فۋنكتسيالاردى ورىنداۋعا ۋاكىلەتتى ادامدارعا تەڭەستىرىلگەن ادامدار مەن ولاردىڭ جۇبايلارى (زايىپتارى) جانە قازاقستان رەسپۋبليكاسىنىڭ زاڭناماسىنا سايكەس دەكلاراتسيا تاپسىرۋ جونىندەگى مىندەت جۇكتەلگەن ادامدار جاتاتىن بولادى.
ەكىنشى كەزەڭدە 2023 جىلعى 1 قاڭتاردان باستاپ مەملەكەتتىك مەكەمەلەردىڭ قىزمەتكەرلەرى مەن ولاردىڭ جۇبايلارىن (زايىپتارىن), سونداي-اق كۆازيمەملەكەتتىك سەكتور سۋبەكتىلەرىنىڭ قىزمەتكەرلەرى مەن ولاردىڭ جۇبايلارىن (زايىپتارىن) باستاپقى دەكلاراتسيالاۋ كوزدەلەدى.
ءۇشىنشى كەزەڭدە 2024 جىلعى 1 قاڭتاردان باستاپ زاڭدى تۇلعالاردىڭ باسشىلارى مەن قۇرىلتايشىلارىن جانە ولاردىڭ جۇبايلارىن (زايىپتارىن), جەكە كاسىپكەرلەر مەن ولاردىڭ جۇبايلارىن (زايىپتارىن) باستاپقى دەكلاراتسيالاۋ كوزدەلەدى.
ءتورتىنشى كەزەڭدە 2025 جىلعى 1 قاڭتاردان باستاپ حالىقتىڭ بارلىق ساناتتارىن جالپىعا بىردەي دەكلاراتسيالاۋعا تولىعىمەن كوشۋ قامتاماسىز ەتىلەدى.
بۇدان باسقا, جەكە تۇلعالار 2019 جىلدىڭ سوڭىنا دەيىن نەگىزگى بورىشىن وتەگەن جاعدايدا, 2019 جىلدىڭ 1 قاڭتارىنا دەيىنگى سالىقتىق كەزەڭنىڭ سالىقتىڭ مىندەتتەمەلەرى بويىنشا ولاردىڭ ءوسىمپۇلدارىن ەسەپتەن شىعارۋ كوزدەلەدى. بۇل رەتتە م ۇلىك سالىعى مەن جەر سالىعى بويىنشا ءوسىمپۇلداردى تولەۋ مەرزىمى 2019 جىلعى 1 قازانعا دەيىن ەكەنىن ەسكەرە وتىرىپ, 2018 جىلدىڭ 1 قاڭتارىنا دەيىنگى سالىقتىق كەزەڭنىڭ مىندەتتەمەلەرى بويىنشا ەسەپتەن شىعارۋ ۇسىنىلادى.
تۇركىستان وبلىسىنان سايلانعان سەناتور ءالي بەكتاەۆ, اتىراۋ وبلىسىنان سايلانعان عۇمار دۇيسەمباەۆ جانە الماتى وبلىسىنان سايلانعان نۇرلان قىلىشباەۆ قارجى نارىعىن رەتتەۋگە, باقىلاۋ جانە قاداعالاۋ فۋنكتسيالارىن بولۋگە, تۇتىنۋشىلارعا نەسيە بەرۋدەگى قاۋىپتەردى تومەندەتۋ قاجەتتىگىنە, جەكە تۇلعالار ءۇشىن ءوسىمپۇلدى ەسەپتەن شىعارۋ جونىندەگى سالىقتىق راقىمشىلىق ەنگىزۋگە قاتىستى سۇراقتار قويدى.
زاڭ جوباسى پالاتانىڭ قاراۋىنا جىبەرىلدى.