– گاۋحار تورەمۇراتقىزى, عاسىرعا جۋىق ۋاقىت بويى ۇستازداردىڭ بىرنەشە بۋىنىن دايىنداپ شىعارعان ىرگەلى ۋنيۆەرسيتەتتىڭ جەتەكشىسى رەتىندە, قازىرگى كەزدە ەڭ اۋەلى مۇعالىمگە نەنى ۇيرەتۋ كەرەك؟ ال مۇعالىم وقۋشىلارعا نەنى ۇيرەتۋ قاجەت دەپ سانايسىز؟
– قاي زاماندا دا مۇعالىم – ىزگىلىك پەن ءبىلىمنىڭ باستى سيمۆولى. قازاقستاننىڭ ۇلتتىق ءبىلىم بەرۋ جۇيەسىنە ارنالعان ورتا ءبىلىم مازمۇنىن جاڭارتۋ باعدارلاماسى پەداگوگ دايارلايتىن جوعارى وقۋ ورىندارىنا دا, ۇستازدار قاۋىمىنا دا زور مىندەتتەر جۇكتەپ وتىر. ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا اتاپ كورسەتكەندەي, «تابىستى بولۋدىڭ ەڭ ىرگەلى باستى فاكتورى ءبىلىم ەكەنىن ارقايسىسىمىز تەرەڭ ءتۇسىنۋىمىز كەرەك… سەبەبى قۇندىلىقتار جۇيەسىندە ءبىلىمدى بارىنەن بيىك قوياتىن ۇلت قانا تابىسقا جەتەدى».
زامان وزگەرگەن سايىن مۇعالىمگە قويىلاتىن تالاپ تا كۇشەيەتىنى بەلگىلى. بۇرىن مۇعالىمدەرگە قويىلاتىن باستى تالاپ تەرەڭ تەوريالىق ءبىلىم مەن جاقسى ادىستەمەنى يگەرۋ بولاتىن بولسا, قازىرگىدەي جىلدام اقپاراتتار اعىنى زامانىندا مۇعالىمگە تەوريالىق بىلىممەن قوسا, وزىق تەحنولوگيا, ءتۇرلى ەلەكتروندىق قۇرالدار مەن كومپيۋتەردى جەتىك ءبىلۋ ماڭىزدى بولىپ وتىر. سونىمەن قاتار پەداگوگ مەملەكەتتىك ءتىل, ورىس تىلىمەن قوسا, اعىلشىن ءتىلىن تەرەڭ مەڭگەرۋ, ءبىلىم مەنەدجمەنتىنەن دە حاباردار بولۋى قاجەت.
ەكىنشىدەن, مامانداردى جاس ۇرپاقتىڭ رۋحاني ءوسۋى مەن تانىمىنىڭ كەڭەيۋىنە, قازاقستاندىق ءپاتريوتيزمدى دامىتۋعا قاجەتتى بارلىق اقپاراتتى مەڭگەرگەن شىعارماشىل تۇلعا رەتىندە دايارلاپ شىعۋىمىز كەرەك.
ۇشىنشىدەن, زامان وزگەرسە دە, وزگەرمەيتىن قاعيدات – تاربيە ماسەلەسى. ءال-فارابي بابامىز ايتقانداي, «تاربيەسىز بەرىلگەن ءبىلىم – ادامزاتتىڭ قاس جاۋى» قاعيداسى ءالى كۇنگە وزەكتىلىگىن جويعان جوق. قوعامدا بولىپ جاتقان كەيبىر كەلەڭسىزدىكتەردىڭ ءتۇپ تامىرى تاربيەنىڭ جەتىسپەۋىنەن بولىپ جاتقانىن اڭعارۋ قيىن ەمەس. بۇل ماسەلەلەر ارنايى پاندەرمەن قوسا, ءتۇرلى كلۋبتار مەن ۇيىرمە جۇمىستارى, ءتۇرلى كەشتەر مەن ەدۆايزەرلىك ساعاتتار ارقىلى شەشىمىن تابادى دەپ ويلايمىن. مىسالى, كۇنى كەشە عانا ۋنيۆەرسيتەتىمىزدە وتكەن «قىز جىبەك» كلۋبىنىڭ ونلاين فورماتتاعى فورۋمى وزىندىك ازاماتتىق ۇستانىمدارى بار, جەكە ومىردە وتباسىلىق مىندەتتەردى العان بىلىمىمەن ۇشتاستىرا بىلەتىن ۇلتجاندى, پاراساتتى, ۇلتتىق سالت-ءداستۇر مەن مادەنيەتتى دارىپتەيتىن ۇيىم يدەياسىن كەڭىنەن ناسيحاتتاۋ ماقساتىندا ۇيىمداستىرىلدى. G-global پلاتفورماسىندا وتكەن بۇل شارا رەسپۋبليكامىزدىڭ وزگە دە جوعارى وقۋ ورىندارىندا اتالعان ماسەلەگە ايرىقشا نازار اۋدارىلىپ وتىرعاندىعىن كورسەتتى.
ال مۇعالىم وقۋشىلارعا پاندىك ءبىلىم بەرۋمەن شەكتەلە المايدى. ويتكەنى جاڭارتىلعان ءبىلىم بەرۋ باعدارلاماسىنىڭ باستى قاعيداتى – جالپىادامزاتتىق جانە ەتنومادەني قۇندىلىقتارعا نەگىزدەلگەن, وقۋشىلارعا ومىردەگى پروبلەمالاردى شەشۋىنە مۇمكىندىك بەرەتىن ءبىلىم بەرۋ, ءار وقۋشىنىڭ قابىلەتىن اشىپ, ونى تۇلعا رەتىندە قالىپتاستىرۋ. مىسالى, وقۋشى «قازاق ءتىلى» نە «ورىس ءتىلى» پانىندە بۇرىنعىداي ەرەجەلەردى جاتتاپ, ونى مىسالدان ىزدەمەيدى. كەرىسىنشە ءوزىنىڭ كۇندەلىكتى ومىرىنە قاتىستى «كيىم. ءسان. تالعام», «بوس ۋاقىت جانە حوببي» سياقتى ءتۇرلى تاقىرىپتار اياسىندا ءارى وزىنە قاجەتتى ءبىلىم الادى, گرامماتيكالىق فورمالاردى وسىنداي ماتىندەردەگى قولدانىسىنا قاراپ يگەرەدى.
ءبىلىم بەرۋ پروتسەسىندەگى وقۋشى مەن مۇعالىمنىڭ رولىندە دە ايتارلىقتاي وزگەرىستەر بار. بۇگىندە «مۇعالىم – ۇيرەتۋشى, وقۋشى – ۇيرەنۋشى» پوزيتسياسىنان «مۇعالىم – باعىتتاۋشى, وقۋشى – «جاڭالىقتى» ىزدەپ تابۋشى» رولىنە اۋىستى. وقۋشى ءوزىنىڭ مەكتەپ قابىرعاسىندا العان ءبىلىمىن ومىرىندە قاجەتكە اسىرا ءبىلۋى كەرەك. بۇل ماسەلەلەر مۇعالىمگە, جوعارى وقۋ ورىندارىنا جاڭاشا ءبىلىم بەرۋدى, جاڭاشا ىزدەنۋگە ۇمتىلۋدى تالاپ ەتەدى.
– «پەداگوگ مارتەبەسى» تۋرالى زاڭ ازىرلەنىپ جاتىر. ءسىزدىڭ ويىڭىزشا قانداي ماسەلەلەردى ەسكەرۋ كەرەك؟
– «پەداگوگ مارتەبەسى تۋرالى» ارنايى زاڭ قابىلداۋ قاجەتتىگى تۋرالى ەلباسى ۇسىنىسىن پەداگوگتار قاۋىمى زور قۋانىشپەن قابىلدادى. شىنىن ايتۋ كەرەك, قازىرگى قوعامدا ۇستازداردىڭ الەۋمەتتىك جاعدايى, مۇعالىم مەن اتا-انا اراسىنداعى قارىم-قاتىناس, قاعازباستىلىق سياقتى كوپتەگەن پروبلەمالار قوردالانىپ قالعانى جاسىرىن ەمەس. پەداگوگ كادرلاردى دايارلايتىن جوعارى وقۋ ورنى رەتىندە ءبىز دە بۇل ماسەلەنى تالقىلاپ, ءتيىستى ۇسىنىستارىمىزدى جىبەردىك. سولادىڭ بىرقاتارىنا توقتالار بولسام, الدىمەن, جاس پەداگوگتاردى قولداۋ ماسەلەسى. ارينە, ۇلتتىق بىلىكتىلىك تەستىسىن ۇيىمداستىرۋ ولاردىڭ جالاقى ماسەلەسىندە بىرقاتار وڭ قادام جاساۋعا سەپتىگىن تيگىزەدى. بىراق ولاردىڭ كاسىبي تۇرعىدا شىڭدالۋى ءۇشىن جاس پەداگوگ-عالىمدارىنىڭ ديالوگ الاڭىن قۇرۋ, اعا بۋىن تاراپىنان شەبەرلىك مەكتەپتەرىن قالىپتاستىرۋ, جاڭا باستامالارىنا, مانساپتىق وسۋىنە قولداۋ كورسەتۋ, جاس بالالى انالارعا جەڭىلدەتىلگەن جۇمىس گرافيگىن قاراستىرۋ, سونداي-اق ورتا جانە اعا بۋىن پەداگوگتاردىڭ دا الەۋمەتتىك ماسەلەلەرىن, تۇرعىن ۇيمەن قامتاماسىز ەتۋ ءۇشىن ارنايى بانكتەردىڭ جەڭىلدەتىلگەن نەسيە ءبولۋى, زەينەتكەرلىك جاسى مەن ەمدەۋ-ساۋىقتىرۋعا قاتىستى ماسەلەلەر دە زاڭنان كورىنىس تابادى دەپ سەنەمىز.
سونداي-اق ۇستاز مارتەبەسى دەگەن ماسەلەدە تەك مەكتەپ مۇعالىمدەرى عانا ەمەس, ءبىلىم بەرۋدىڭ بارلىق بۋىندارى, اتاپ ايتساق, مەكتەپكە دەيىنگى مەكەمەلەردەن باستاپ, جوعارى وقۋ ورىندارىندا قىزمەت ەتەتىن پەداگوگتاردىڭ دا قۇقىقتىق مارتەبەسى نازاردان تىس قالماۋى ءتيىس. بىرقاتار شەتەلدىك مەملەكەتتەردە, اتاپ ايتساق, فرانتسيا, اقش, اۆستريا, بەلگيا, يتاليا, پورتۋگاليا, فينليانديا, كانادا سياقتى ەلدەردە مۇعالىمدەر مەملەكەتتىك قىزمەتكەر بولىپ سانالادى. شەتەل تاجىريبەسىنە سۇيەنىپ, مۇعالىمدەردى مەملەكەتتىك قىزمەتكەر ساناتىنا جاتقىزۋ ماسەلەسى دە قاراستىرىلار دەگەن ۇمىتتەمىز.
– «جوعارى وقۋ ورىندارى الدىنا ءوز تۇلەكتەرىن جۇمىسپەن قامتاماسىز ەتۋ جونىندە ماسەلە قويۋ كەرەك. ەگەر تۇلەكتەرى جۇمىس تاپپاسا, وندا وقۋ ورنى ءوزىنىڭ مىندەتىن اتقارماي وتىر دەگەن ءسوز» دەپ نازارباەۆتىڭ بىلتىر ايتقانى بار. ءسىزدىڭ ۋنيۆەرسيتەت سول مىندەتتى قانشالىقتى دۇرىس ورىنداپ كەلەدى؟
– ەلباسىنىڭ وتاندىق جوعارى وقۋ ورىندارى الدىنا ءوز تۇلەكتەرىن جۇمىسپەن قامتاماسىز ەتۋ جونىندە ماسەلە قويۋى وتە ورىندى دەپ ويلايمىن. بۇگىندە «اتامەكەن» ۇلتتىق كاسىپكەرلەر پالاتاسىنىڭ جوعارى وقۋ ورىندارىنىڭ الدىنا قويعان تالاپتارىنا سايكەس جانە ءبىلىم بەرۋ باعدارلامالارىنىڭ سوڭعى 5 جىلدا جىل سايىن 30 پايىزعا جاڭارتىلۋىنا جۇمىس بەرۋشىنىڭ تىكەلەي قاتىسۋى تۇلەكتەردىڭ جۇمىسقا ورنالاسۋىنا ءوز ىقپالىن تيگىزەدى.
ياعني, جۇمىس بەرۋشى نارىقتاعى سۇرانىسقا بايلانىستى نۇسقاۋلىقتار بەرەدى. جىل سايىن جاڭا وقۋ جىلى قارساڭىندا ءبىلىم باعدارلامالارى دايىندالعاندا ۋنيۆەرسيتەتتە قۇرامىندا جوعارعى وقۋ ورنى وقىتۋشىلارى, نازارباەۆ زياتكەرلىك مەكتەبى, جالپى ءبىلىم بەرۋ مەكەمەلەرى مەن جۇمىس بەرۋشىلەر بار ارنايى جۇمىس توبى قۇرىلادى. ءبىلىم باعدارلامالارى ەڭبەك نارىعىنىڭ سۇرانىسى بويىنشا تالقىلانىپ, جاسالادى. سايكەسىنشە, ۋنيۆەرسيتەت ءوز كەزەگىندە جۇمىس بەرۋشىلەردىڭ سۇرانىسىن ەسكەرىپ مامان دايىندايدى. وسىلاي تۇلەكتەردىڭ بىلىكتىلىگى جەتىلدىرىلىپ كەلەدى.
ايتا كەتەيىن, بۇگىندە ەلىمىزدە مەكتەپ مۇعالىمدەرىنە دەگەن سۇرانىس جوعارى. ال ءبىزدىڭ ۋنيۆەرسيتەت پەداگوگ ماماندارىن دايىندايتىن بولعاندىقتان تۇلەكتەرىمىز جۇمىسپەن تولىقتاي قامتىلادى. جوعارى وقۋ ورنىنا دەيىنگى ءبىلىم بەرۋ مەن مانساپ ءبولىمى تۇلەكتەرمەن تىعىز بايلانىس ورناتقان. بۇل بولىمدە تۇلەكتەردىڭ جانە ەڭبەك نارىعىندا سۇرانىس جاسايتىن ءبىلىم مەكەمەلەرىنىڭ بازاسى قالىپتاسقان. ەلىمىزدىڭ تۇكپىر-تۇكپىرىندە ورنالاسقان مەكتەپتەردەن ءپان مۇعالىمدەرىنە سۇرانىس تۇسكەن جاعدايدا, ۋنيۆەرسيتەت تۇلەكتەرىنە بىردەن جاڭا اقپارات بەرىلىپ, حابارلاندىرۋ جىبەرىلىپ وتىرادى.
– جۇمىسقا ورنالاسۋ دەمەكشى, قازىرگى كۇندە قىزدار ۋنيۆەرسيتەتىنىڭ ءبىتىرۋشى تۇلەكتەرىن جۇمىسپەن قامتۋ بويىنشا قانداي شارالار جۇرگىزىلىپ جاتىر؟
– ۋنيۆەرسيتەتتە تۇلەكتەردى جۇمىسپەن قامتاماسىز ەتۋگە باعىتتالعان بوس جۇمىس ورىندارى جارمەڭكەسى تۇراقتى تۇردە ۇيىمداستىرىلادى. شارا وتاندىق پەداگوگيكالىق جوعارى وقۋ ورىندارىنىڭ بىرىڭعاي قازاقستاندىق ءبىلىم بەرۋ كەڭىستىگىن قالىپتاستىرۋ, جاستاردى جۇمىسقا ورنالاستىرۋ ماسەلەسى بويىنشا ورتاق ديالوگ الاڭىن قۇرۋ, ولارعا جۇمىسقا ورنالاسۋ مۇمكىندىكتەرى تۋرالى اقپارات بەرۋ جانە تۇلەكتەردى تۇراقتى جۇمىسپەن قامتۋعا جاردەمدەسۋ ماقساتىندا قولعا الىنعان. ەلباسى نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا جوعارى وقۋ ورنىنىڭ تابىستىلىعىن باعالاۋدىڭ باستى كريتەريى – وقۋ بىتىرگەن ستۋدەنتتەردىڭ جۇمىسپەن قامتىلۋى, جالاقىسى جوعارى جۇمىسقا ورنالاسۋى ەكەندىگىن اتاپ ءوتتى. وسى ورايدا پەداگوگيكالىق ماماندىقتار بويىنشا بوس جۇمىس ورىندارى جارمەڭكەسى جاستار اراسىندا جۇمىسسىزدىق ماسەلەسىن وڭتايلى شەشۋدىڭ مەحانيزمى بولىپ وتىر, بۇگىندە. باستى ەسكەرەتىن نارسە, اتالعان شارا تىرناقشانىڭ ىشىندە عانا ءوتىپ قويمايدى, ۋنيۆەرسيتەت تۇلەكتەرى شىن مانىسىندە جارمەڭكەدەن «ەكى قولعا ءبىر كۇرەك تاۋىپ», ولارعا جۇمىس بەرۋشىلەر تاراپىنان ناقتى سۇرانىس تۇسەدى. بيىلعى جىلعى جارمەڭكەگە 700-گە جۋىق ستۋدەنت پەن 150-دەن استام جۇمىس بەرۋشى قاتىستى. قازاقستان رەسپۋبليكاسىنىڭ ءبىلىم جانە عىلىم مينيسترلىگى مەن قىزدار ۋنيۆەرسيتەتىنىڭ ۇيىتقى بولۋىمەن جارمەڭكە پەداگوگيكالىق ماماندىقتار بويىنشا ءبىلىم العان تۇلەكتەردى جۇمىسپەن قامتۋعا ارنالعان. باستاما جاستارعا بۇگىندە ءبىلىم بەرۋ وشاقتارىندا قاي سالا ماماندارىنا سۇرانىس كوپ نەمەسە تاپشى ەكەندىگىن جانە ەڭبەك ءوتىلىنسىز جۇمىسقا ورنالاسۋعا بولاتىندىعىن انىقتاۋعا سەپتەسەدى. سونداي-اق شارا «ديپلوممەن – جۇمىسقا» جوسپارىن جۇزەگە اسىرۋعا مۇمكىندىك بەرمەك. جارمەڭكەدە جۇمىس بەرۋشىلەر ءوز مەكەمەلەرىندەگى بوس جۇمىس ورىندارىن ۇسىندى. ستۋدەنتتەر بۇل مۇمكىندىكتى پايدالانىپ تۇيىندەمەلەرىن جولدادى. سونداي-اق ءبىلىم, عىلىم, ونەر جانە سپورتتاعى جەتىستىكتەرى جايلى ارنايى پورتفوليولار كورمەسىن وتكىزىپ, پرەزەنتاتسيا جاسادى.
وسى ورايدا ايتا كەتەيىن, وتكەن وقۋ جىلىندا ۋنيۆەرسيتەتتى 1548 ستۋدەنت ءتامامداپ, ولاردىڭ 95 پايىزى جۇمىسقا ورنالاسقان. ال 2017 جىلى «ەكى قولعا ءبىر كۇرەك تاپقانداردىڭ» ۇلەس سالماعى 88 پايىزدى قۇرايدى.
– ۋنيۆەرسيتەتتەرگە اكادەميالىق دەربەستىك بەرىلدى. وسىلايشا تالاپتى كۇشەيتتى. وسىدان كەيىن وقۋ ورىندارىنىڭ جۇمىسىندا وڭ وزگەرىس بار دەپ سانايسىز با الدە قازىرگى تاڭدا قاندايدا ءبىر ناتيجە جايلى ايتۋ ەرتەرەك پە؟
– اكادەميالىق دەربەستىك – ارنايى ءوز سالاسى بويىنشا ءبىلىم بەرۋ باعدارلامالارىنا ستۋدەنتتەردىڭ, جۇمىس بەرۋشىنىڭ سۇرانىستارىن ەسكەرە وتىرىپ, حالىقارالىق ستاندارتتارعا تەز جاقىنداسۋىنا مۇمكىندىك بەرەدى. بۇل دەگەنىمىز – بولون جۇيەسى بويىنشا ماماندىقتاردى قايتا قاراستىرۋ, ستۋدەنتتەر مەن جاس وقىتۋشىلار قۇرامىنىڭ اكادەميالىق ۇتقىرلىق جانە تاجىريبە الماسۋىنىڭ جەڭىلدەۋى جانە ۋنيۆەرسيتەتتىڭ ناقتى نارىقتىق تالاپتارعا بەيىمدەلۋى. بىلايشا ايتقاندا, باسەكەلەستىكتىڭ ارتۋى. مىسالى, قازىرگى جەكەمەنشىك ۋنيۆەرسيتەتتەردىڭ قۇرىلىمدىق, اكىمشىلىك, وقۋ ۇدەرىسى مەيلىنشە باتىستىڭ جوعارى وقۋ ورىندارىنىڭ ۇدەرىسىنە جاقىن.
ۋنيۆەرسيتەتتىڭ اكادەميالىق دەربەستىگى ءبىلىم جۇيەسىندە باسەكەلەستىكتىڭ جوعارىلاۋىنا دا ءوز اسەرىن بەرەدى. باسەكەلەستىك بار جەردە ءبىلىم ساپاسىنىڭ جوعارىلايتىنى, سول ارقىلى بىلىكتى مامانداردىڭ ەڭبەك نارىعىنا كەلەتىنى قۋانتادى.
– ءسىز باسقارىپ وتىرعان ۋنيۆەرسيتەتكە بىلتىر «ۇلتتىق» دەگەن مارتەبە بەرىلدى. «ۇلتتىق» دەگەن ۇعىمعا لايىقتى بولۋدىڭ قازاقستاندىق ولشەمى قانداي دەپ ويلايسىز؟
– قازاق ۇلتتىق قىزدار پەداگوگيكالىق ۋنيۆەرسيتەتى – الەمدەگى بىردەن-ءبىر تەك قىزدار وقيتىن جوعارى وقۋ ورنى. ەكىنشى دۇنيەجۇزىلىكتىڭ اۋمالى-توكپەلى ۋاقتىسىندا – 1944 جىلى اشىلعان ءبىلىم ۇياسى 75 جىلعا جۋىق ۋاقىت ارالىعىندا ۇزدىكسىز جوعارى بىلىكتى مۇعالىم ماماندارىن دايارلاپ كەلەدى. حالقىمىزدىڭ قابىرعالى قالامگەرى مۇحتار اۋەزوۆ: «ءتاڭىر جازسا, بۇل ينستيتۋت بولاشاق قازاق قىزدارىنىڭ شامشىراعىنا اينالادى. وسى شامشىراقتىڭ جارىق ساۋلەسى سونبەسىن دەيىك» دەپ ايتقانىنداي, قىزدار ۋنيۆەرسيتەتى بۇگىندە راسىندا دا وتاندىق جوعارى ءبىلىم بەرۋدىڭ كوشباسشىسىنا اينالىپ وتىر. بۇل سوزىمىزگە ايقىن دالەل – ۋنيۆەرسيتەتكە «ۇلتتىق» مارتەبەسىنىڭ بەرىلۋى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ 2018 جىلعى 25 جەلتوقسانداعى جارلىعىمەن قازاق مەملەكەتتىك قىزدار پەداگوگيكالىق ۋنيۆەرسيتەتىنە «ۇلتتىق» مارتەبەسىنىڭ بەرىلۋى وقۋ ورنىنىڭ دامۋىنا زور سەرپىن بەرەدى جانە ۇجىم الدىنا زور جاۋاپكەرشىلىك جۇكتەيدى. بۇل مارتەبە – تاريحى تەرەڭ قاراشاڭىراقتىڭ الەمدىك ءبىلىم كەڭىستىگىندەگى بەدەلىنىڭ ارتۋىنا دا سەپتىگىن تيگىزبەك.
نۇرسۇلتان نازارباەۆ ۋنيۆەرسيتەتىمىزگە كەلگەن ساپارىندا «ءبىر قىزدى تاربيەلەۋ – ءبىر ۇلتتى تاربيەلەۋمەن بىردەي» دەپ اتاپ ءوتىپ, وقۋ ورنى ۇجىمىنىڭ الدىنا ناقتى مىندەتتەر قويعان بولاتىن. وسى ورايدا تاعىلىمدى تاربيە مەن ءورىستى ءبىلىمنىڭ ىرگەلى ورداسى اتانعان قىزدار ۋنيۆەرسيتەتى ءوز قىزمەتىندە قازاقستاندىق ءپاتريوتيزمدى, ەلباسىنىڭ «ماڭگىلىك ەل» جالپىۇلتتىق يدەياسىن باستى باعدار رەتىندە ۇستايدى. سونىمەن قاتار وقۋ ۇردىسىندە ۇلتتىق سالت-ءداستۇرىمىز بەن حالقىمىزدىڭ مەنتاليتەتىن پايدالانۋ ءبىزدىڭ ۋنيۆەرسيتەتتىڭ باستى ەرەكشەلىگى دەپ ايتار ەدىم.
– اڭگىمەڭىزگە راقمەت!
سۇحباتتاسقان جاندار اسان