نۇر-سۋلتان, 2019 جىلعى 21 ماۋسىم - ەكونوميكالىق ديپلوماتيانى ىسكە اسىرۋ اياسىندا شەتەلدىك ينۆەستيتسيالاردى تارتۋدىڭ جاڭا جۇيەسى قۇرىلىپ, بۇل باعىتتاعى جۇمىس ۇنەمى جەتىلدىرىلۋدە. وسى جانە باسقا دا ينۆەستيتسيالىق ىنتالاندىرۋ شارالارى تۋرالى بۇگىن قر ۇكىمەتى الاڭىندا وتكەن ءباسپاسوز كونفەرەنتسياسىندا قازاقستان سىرتقى ىستەر مينيسترلىگىنىڭ ورىنباسارى ەرمەك كوشەرباەۆ ايتىپ بەردى.
2018 جىلدىڭ قورىتىندىسى بويىنشا تىكەلەي شەتەلدىك ينۆەستيتسيالاردىڭ جالپى اعىنى 15,8%-عا ءوسىپ, 24,3 ملرد. اقش دوللارىن قۇرادى.
ە. كوشەرباەۆتىڭ ايتۋىنشا, 2018 جىلى نەگىزگى ينۆەستور ەلدەر قاتارىنا كىرگەن - نيدەرلاند - 7,3 ملرد. اقش دوللار (30,3%), اقش - 5,3 ملرد. (22%), شۆەيتساريا - 2,5 ملرد. (10,5%), رەسەي - 1,5 ملرد. (6,2%), قىتاي - 1,5 ملرد. (6,1%), بەلگيا - 1,0 ملرد. (4,3%), فرانتسيا - 0,9 ملرد. (3,8%), ۇلىبريتانيا - 0,6 ملرد. (2,4%) جانە كورەيا رەسپۋبليكاسى - 0,5 ملرد.
ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تاپسىرماسى بويىنشا, وتكەن جىلدىڭ جەلتوقسان ايىندا ينۆەستيتسيالار تارتۋ قىزمەتى سىرتقى ىستەر مينيسترلىگىنە بەرىلدى.
ينۆەستيتسيالار تارتۋدىڭ جاڭا جۇيەسىنىڭ الدىڭعى جۇيەدەن ايىرماشىلىعى تۋرالى سۇراققا جاۋاپ بەرگەن سىرتقى ىستەر ءمينيسترىنىڭ ورىنباسارى بۇل ەڭ الدىمەن شەتەلدىك مەكەمەلەرمەن ءوزارا ءىس-قيمىلدى نىعايتۋ جانە وسى ينفراقۇرىلىمدى ينۆەستيتسيا تارتۋدىڭ نەگىزگى قۇرالدارىنىڭ ءبىرى رەتىندە پايدالانۋ ەكەنىن اتاپ ءوتتى. وسىلايشا, قازىرگى تاڭدا ينۆەستورمەن جانە جوبامەن ناقتى جۇمىس ىستەۋگە مۇمكىندىك بەرەتىن شەتەلدىك مەكەمەلەر-ورتالىق-ءوڭىر فورماتىندا ءۇش دەڭگەيلى جۇيە قۇرىلدى. مۇنداي مەحانيزم جاڭا جوبالار مەن ينۆەستورلاردى انىقتاۋعا مۇمكىندىك بەرەدى, جوبانى باستاماشىلىق ەتۋ مەن ونى ىسكە اسىرۋ اراسىنداعى جولدى قىسقارتادى.
سونىمەن قاتار, جىل باسىنان بەرى قازاقستاننىڭ شەتەلدىك مەكەمەلەرى شەتەلدىك كومپانيالارمەن 140-عا جۋىق كەزدەسۋلەر وتكىزىپ, ىسكە اسىرۋعا الەۋەتى جوعارى 128 جوبانى انىقتاعانى اتاپ ءوتىلدى.
وسى باعىتتا ۇكىمەتتىڭ اتىنان بىرىڭعاي كەلىسسوزشى رەتىندە ارەكەت ەتەتىن جانە ينۆەستورلاردى يدەيادان جوبانى ىسكە اسىرۋعا دەيىن سۇيەمەلدەيتىن «Kazakh Invest» ۇلتتىق كومپانياسى دا ماڭىزدى ءرول اتقارادى. سونداي-اق, «استانا» حالىقارالىق قارجى ورتالىعى ءتيىستى قارجى قۇرالدارىمەن جانە حالىقارالىق دەڭگەيدەگى قىزمەتتەرىمەن ءوز الاڭىن ۇسىنادى.
باياندامادا سونداي-اق ءىرى جوبالاردى ىسكە اسىرۋ ءۇشىن رەزەرۆتەر بار باسىم سەكتورلار اتاپ ءوتىلدى. بۇل ازىق-ت ۇلىك ونەركاسىبى, اگروحيميا, اۋىلشارۋاشىلىق تەحنيكاسى, گاز حيمياسى, اقپاراتتىق-كوممۋنيكاتسيالىق تەحنولوگيالار, تاۋ-كەن مەتاللۋرگيالىق كەشەنى.
قازاقستانداعى ينۆەستيتسيالىق كليماتتى جاقسارتۋ جونىندەگى جۇمىس تۋرالى ە. كوشەرباەۆ «ءسىم-ءنىڭ ينۆەستورلارعا تەك اقپارات پەن كەڭەس قانا ەمەس, سونداي-اق مەملەكەتتىك قىزمەت كورسەتۋگە ارنالعان بىرىڭعاي الاڭ بولاتىن فرونت-كەڭسەلەردى قۇرۋ بويىنشا جۇمىستار جۇرگىزىپ جاتىر», - دەپ اتاپ ءوتتى. سونىمەن قاتار, ول قازىرگى ۋاقىتتا ينۆەستيتسيالىق زاڭنامانى جەتىلدىرۋ بويىنشا جۇمىستىڭ جۇرگىزىلىپ جاتقانىن اتاپ ءوتتى.
ءسوز سوڭىندا ە. كوشەرباەۆ ينۆەستيتسيالىق كليماتتى جاقسارتۋ جونىندەگى جۇمىستىڭ جالعاساتىندىعىن جانە جاڭا ينۆەستورلاردى تارتۋ جانە ارەكەت ەتەتىن ينۆەستورلاردى ۇستاپ قالۋ ءۇشىن بارلىق قاجەتتى شارالار قابىلداناتىنىن اتاپ ءوتتى.