احمەتجان ەسىموۆ اتىراۋ ماڭىندا سالىنىپ جاتقان «Kazakhstan Petrochemical Industries» اتتى گاز-حيميا كەشەنىن ارالاپ, كەشەندەگى مەنەدجمەنت اۋىسقاننان كەيىنگى قۇرىلىس بارىسىن وڭ باعالاعان. قازىرگى تاڭدا پوليپروپيلەن زاۋىتىنىڭ قۇرىلىس قارقىنى 34%-دى قۇرايدى. ال 2017 جىلدىڭ 27 قاراشاسى مەن 2018 جىلدىڭ 28 ماۋسىمى ارالىعىندا جوبانىڭ جۇزەگە اسىرىلۋ جىلدامدىعى نەبارى 6% بولاتىن.
«قازىر زاۋىتتىڭ باس جوسپارى مەن تەحنولوگيالىق سىزباسى ازىرلەنگەن. جوسپار بويىنشا, جوبا قۇرىلىسى 2021 جىلدىڭ ورتاسىنا قاراي تولىق اياقتالادى», – دەپ حابارلادى قوردىڭ باسپاسوز قىزمەتى.
سونىمەن قاتار «سامۇرىق-قازىنا» باسشىسى «قاشاعان» كەن ورنىنداعى تەڭىز كەشەنى ارالىن ارالاپ, نىساننىڭ قازىرگى جاعدايىنان حاباردار بولدى. كەشەندى جوندەۋدەن وتكەن قاشاعاننان قازىر الىنىپ وتىرعان مۇناي كولەمى كۇنىنە 400 مىڭ باررەلگە جەتكەن.
بىلتىر كەن ورنى جىلىنا 11,3 ملن توننا مۇناي الۋ جوسپارىن العا قويعان. 2018 جىلى جوسپاردى اسىرا ورىنداعان «قاشاعان» قىزمەتكەرلەرى بىلتىر 13,2 ملن توننا مۇناي ءوندىردى.
ساپار اياسىندا احمەتجان ەسىموۆ ماڭعىستاۋ وبلىسىنىڭ اكىمى سەرىكباي ترۇموۆپەن كەزدەسىپ, قوردىڭ كومپانيالار توبىمەن اراداعى ءوزارا ىنتىماقتاستىق تۋرالى كەڭەس وتكىزدى. ايتا كەتەرلىگى, قورعا قاراستى ۇلتتىق كومپانيالار ماڭعىستاۋ وبلىسى بيۋدجەتىنىڭ 38%-دان استامىن قالىپتاستىرىپ وتىر.
كەڭەس بارىسىندا ەكى تاراپ قازىرگى وڭىردەگى جوبالاردىڭ, سونىڭ ىشىندە قايىرىمدىلىققا قاتىستى جوبالاردىڭ دامۋ بولاشاعىن تالقىلادى.