سەيسەنبى, 9 ءساۋىر 2013 2:01
ەكى ۇمىتكەر دە جەڭدىم دەپ ەسەپتەيدى
چەرنوگوريانىڭ جوعارى مەملەكەتتىك لاۋازىمىنان ەكى ۇمىتكەر – ەلدىڭ قازىرگى پرەزيدەنتى فيليپ ۆۋيانوۆيچ پەن وپپوزيتسيادان كانديدات ميودراگ لەكيچ جەكسەنبى كۇنى وتكەن سايلاۋدا وزدەرىنىڭ جەڭىسكە جەتكەندەرى تۋرالى حابارلادى.
سەيسەنبى, 9 ءساۋىر 2013 2:01
ەكى ۇمىتكەر دە جەڭدىم دەپ ەسەپتەيدى
چەرنوگوريانىڭ جوعارى مەملەكەتتىك لاۋازىمىنان ەكى ۇمىتكەر – ەلدىڭ قازىرگى پرەزيدەنتى فيليپ ۆۋيانوۆيچ پەن وپپوزيتسيادان كانديدات ميودراگ لەكيچ جەكسەنبى كۇنى وتكەن سايلاۋدا وزدەرىنىڭ جەڭىسكە جەتكەندەرى تۋرالى حابارلادى.
ۆۋيانوۆيچ تىكەلەي ەفير ارقىلى بارلىق بيۋللەتەندەردى ساناۋ قورىتىندىسىندا ءوزىنىڭ 51,3 پايىز داۋىس جيناعانىن, ال ونىڭ جالعىز قارسىلاسىنىڭ 48,7 پايىز داۋىس العانىن حابارلاعان. ال لەكيچ بولسا ءوزىنىڭ 50,5 پايىز, ال ءۆۋيانوۆيچتىڭ 49,5 پايىز داۋىس العانىن ايتۋدا. وپپوزيتسيادان ۇسىنىلعان كانديدات سونىمەن بىرگە, باسقارۋشى كواليتسيا وكىلدەرىنىڭ قازىرگى ۋاقىتتا جەڭىستى ۆۋيانوۆيچقا اپەرۋ ءۇشىن سايلاۋ وكرۋگتەرىنىڭ بىرىندە داۋىس بەرۋ قورىتىندىلارىن بۇرمالاۋعا تالپىنىس جاساپ جاتقاندىعىن اتاپ كورسەتكەن. چەرنوگوريا سايلاۋ كوميسسياسى بولسا ازىرگە ەشقانداي رەسمي مالىمدەمە جاساعان جوق.
قۇس تۇماۋى باسىلماي تۇر
اسپان استى ەلىنىڭ جيىرما ءبىر ادامىنىڭ قۇس تۇماۋىنىڭ H7N9 اتتى جاڭا ۆيرۋسىن جۇقتىرعانى بەلگىلى بولدى, ولاردىڭ التاۋى قايتىس بولعان كورىنەدى. بۇل تۋرالى قىتاي بۇقارالىق اقپارات قۇرالدارىنا سىلتەمە جاساي وتىرىپ, يتار-تاسس اگەنتتىگى حابارلادى.
انحوي پروۆينتسياسىندا ءتىرى ءۇي قۇستارىن ساتۋمەن اينالىساتىن ەلۋ بەس جاسار ەر ادام ناۋقاستانعان. ول بوچجوۋ قالاسىنىڭ اۋرۋحاناسىنا جەتكىزىلگەن. بىراق, ونىمەن قارىم-قاتىناستا بولعان ادامداردىڭ ەشقايسىسىنان اۋرۋ بەلگىلەرى انىقتالماعان كورىنەدى. كەشە شانحاي بيلىگى جاڭادان ناۋقاستانعان ەكى ادام تۋرالى حابارلاعان. قازىردىڭ وزىندە قالادا 98 مىڭ تاۋىقتىڭ كوزى جويىلىپ, ءۇي قۇستارىن ساتۋعا تىيىم سالىنعان.
جاپونيا سوققىنىڭ بەتىن قايتارۋعا دايىن
جاپونيا قورعانىس ءمينيسترى ينتسۋنوري ونودەرا ەگەر جاپونوياعا قاتەر توندىرەر بولسا, سولتۇستىككورەيالىق زىمىرانداردى ورتا جولدا اتىپ قۇلاتۋ جونىندە بۇيرىق بەرگەن.
وسى ورايدا كحدر-دىڭ تاياۋ كۇندەرى زىمىران ۇشىرۋ جونىندە ۋادە بەرىپ وتىرعاندىعىن ايتا كەتۋ كەرەك. جاپونيا AEGIS اڭدۋ جۇيەسىمەن جانە الىس قاشىقتىققا ارنالعان SM-3 زىمىراندارىمەن جاراقتانعان جاۋىنگەرلىك كەمەلەرىن شىعارا باستادى. سويتە تۇرا, جاپون ساراپشىلارى سولتۇستىك كورەيانىڭ زىمىران ۇشىرارلىق مۇمكىندىگى ونشا ەمەس دەپ ەسەپتەيدى, دەگەنمەن توكيو كەز كەلگەن كۇتپەگەن جاعدايعا دايىن.
ون ءبىر بالا قازا تاپتى
اۋعان بيلىگىنىڭ وكىلدەرى مەن كۋاگەرلەردىڭ ايتۋلارىنا قاراعاندا, ناتو كۇشتەرىنىڭ اۋعانستاننىڭ شىعىسىنا جاساعان اۋە سوققىسى سالدارىنان ون ءبىر بالا قازا تاپقان. سول سياقتى, تاعى ءبىر ايەلدىڭ اجال قۇشىپ, التى ادامنىڭ جاراقات العانى تۋرالى دا اقپارات بار.
اۋعانستان پرەزيدەنتى حاميد كارزاي بەيبىت تۇرعىنداردى اجال قۇشتىرعانداردى ايىپتادى. ونىڭ اكىمشىلىگى شىعارعان مالىمدەمەدە ەل پرەزيدەنتىنىڭ بەيبىت تۇرعىندار مەكەن ەتكەن اۋدانداردا اۋە سوققىلارىن جاساۋعا تىيىم سالاتىن جارلىققا قول قويعانى تۋرالى ايتىلعان. اۋە سوققىسىنا ۇشىراعان دەرەۆنيانىڭ تۇرعىندارى مەن بيلىك وكىلدەرى ادامداردىڭ ءوز ۇيلەرىندە وتىرعان كەزدە قازا تاپقاندارىن حابارلاپ وتىر.
ەكس-پرەزيدەنت ءىسى تەرگەلۋدە
برازيليا وكىمەتى بەلگىلى ساياساتكەر, ەلدىڭ بۇرىنعى پرەزيدەنتى لۋيس يناسيۋ لۋلا دا سيلۆاعا قاتىستى تەرگەۋ ءىسىن باستادى. 2003-2011 جىلدارى مەملەكەت باسشىسى بولعان ادامعا سىبايلاس جەمقورلىققا باردى دەگەن ايىپ تاعىلىپ وتىر.
تەرگەۋدىڭ ەكس-پرەزيدەنتتىڭ ساياساتتاعى بولاشاعىنا تەرىس اسەر ەتۋى مۇمكىن. تەرگەۋ ءىسىنىڭ باستالۋىنا Portugal Telecom كومپانياسى ل. لۋلا دا سيلۆا پرەزيدەنت بولعان ءبىرىنشى مەرزىمدە «ەڭبەكشىلەر پارتياسىنا» پارا بەردى دەگەن كۇمان سەبەپ بولىپ وتىر. ەكس-پرەزيدەنت اتالمىش پارتياعا ول قۇرىلعان 1980 جىلدان باستاپ مۇشە بولىپ تابىلادى.
باندەرانىڭ ەسكەرتكىشى قۇلاتىلدى
ۋكراينانىڭ لۆوۆ وبلىسىندا ۋكراين ۇلتشىلى ستەپان باندەراعا ورناتقان ەسكەرتكىش قۇلاتىلعان. وقيعا اتالمىش وبلىستىڭ كامەنكا-بۋز اۋدانىنداعى ۆەليكوسيلكي سەلوسىندا ورىن العان.
الدىن الا بەلگىلى بولعان مالىمەت بويىنشا, بۇزاقىلار تۇندە قاناتتىڭ جانە اۆتوماشينانىڭ كومەگىمەن ءبيۋستتى تۇعىرىنان ءتۇسىرىپ العان. قۇقىق قورعاۋ ورگاندارى قازىرگى كەزدە وقيعانىڭ قالاي بولعانىن تەكسەرۋدە. وسى رەتتە وقيعانىڭ مۋنيتسيپالدىق سايلاۋ كۇنى ورىن العانىن دا ايتا كەتۋ قاجەت.
داۋلى ارالدارعا تۋريستەر باراتىن بولدى
قىتاي بيلىگى وڭتۇستىك-قىتاي تەڭىزىندەگى داۋلى سانالاتىن سيشا ارالدارىنا تۋريستەردىڭ بارۋىنا رۇقسات بەردى. بۇل ارالدار قىتاي, ۆەتنام جانە تايۆان ەلدەرى اراسىنداعى داۋلى اۋماق بولىپ تابىلادى, دەگەنمەن 1974 جىلدان بەرى ءىس جۇزىندە كحر بيلىگىنىڭ قۇزىرىنا جاتادى.
ارالداردا نەبارى ءبىر عانا قوناق ءۇي بولعاندىقتان, تۋريستەرگە كەمەلەردە ءومىر سۇرۋگە تۋرا كەلەدى. سونىمەن بىرگە, مۇندا اۋىز سۋ پروبلەماسىنىڭ بار ەكەنىن دە ايتۋ كەرەك. 2000 جولاۋشىعا ارنالعان كەمە تۋريستەردى ارالعا اكەلىپ تۇراتىن بولادى. تاياۋ ۋاقىتتا وسىنداي تاعى ءبىر كەمە جاسالماقشى. العاشقى تۋر مامىر مەرەكەلەرىنە وراي جاسالادى دەپ كۇتىلۋدە.
ەكۆادور پرەزيدەنتى ءوز ەڭبەكاقىسىن قىسقارتتى
ەكۆادور پرەزيدەنتى رافاەل كوررەا مەملەكەتتىڭ ءبىرىنشى تۇلعالارىنىڭ ەڭبەكاقىلارى مولشەرىن شەكتەپ تاستاۋ تۋرالى جارلىققا قول قويدى. بۇل شارانىڭ ۆيتسە-پرەزيدەنتتەر مەن مينيسترلەردىڭ دە ەڭبەكاقىلارىنا قاتىسى بار.
ءسوزىمىزدى ناقتى ىسپەن دالەلدەيتىن بولايىق, دەپ اتاپ كورسەتكەن كوررەا مىرزا. بۇل شارا مەملەكەت باسشىسى مەن بۇتىندەي العاندا اتقارۋشى بيلىكتى ۇستاۋعا كەتەتىن شىعىنداردى قىسقارتۋعا باعىتتالىپ وتىر. كوررەا بيلىككە كەلگەن 2007 جىلى مەملەكەت باسشىسىنىڭ ەڭبەكاقىسى ايىنا 8 مىڭ دوللاردى قۇرايتىن, بىراق ول ونى ەكى ەسە قىسقارتىپ, ەڭ تومەنگى ەڭبەكاقىمەن بايلانىستىرۋ جونىندە شەشىم قابىلداعان ەدى.
ينتەرنەت ماتەريالدارى نەگىزىندە ازىرلەندى.