سەنبى, 30 ناۋرىز 2013 2:05
قارۋ-جاراق ساۋداسى رەتتەلە مە؟
بۇۇ كونفەرەنتسياسىنا قاتىسۋشىلار قارۋ-جاراقتىڭ الەمدىك رىنوگىن رەتتەيتىن كەلىسىم-شارت قابىلداۋ ماسەلەسى بويىنشا ءوزارا باتۋاعا كەلە المادى. قارۋ-جاراقتىڭ تەررورشىلار قولىنا ءتۇسۋ ىقتيمالدىعىن تومەندەتۋدى كوزدەيتىن قۇجاتتىڭ ءماتىنىن يران, كحدر جانە سيريا ماقۇلداعان جوق.
سەنبى, 30 ناۋرىز 2013 2:05
قارۋ-جاراق ساۋداسى رەتتەلە مە؟
بۇۇ كونفەرەنتسياسىنا قاتىسۋشىلار قارۋ-جاراقتىڭ الەمدىك رىنوگىن رەتتەيتىن كەلىسىم-شارت قابىلداۋ ماسەلەسى بويىنشا ءوزارا باتۋاعا كەلە المادى. قارۋ-جاراقتىڭ تەررورشىلار قولىنا ءتۇسۋ ىقتيمالدىعىن تومەندەتۋدى كوزدەيتىن قۇجاتتىڭ ءماتىنىن يران, كحدر جانە سيريا ماقۇلداعان جوق.
قارۋ-جاراق ەكسپورتىنا باقىلاۋ جاساۋعا بىرەگەي ەرەجەلەر مەن نورمالار بەلگىلەۋدى كوزدەيتىن تۇڭعىش حالىقارالىق قۇجاتتىڭ ءماتىنى بۇۇ-عا مۇشە ەلدەردىڭ نيۋ-يوركتەگى كونفەرەنتسياسىندا ون كۇن بويى تالقىلاندى. قورىتىندىسىندا 193 ەلدىڭ ۇشەۋى ونى قابىلداۋعا قارسى شىقتى. ولار بۇل كەلىسىم-شارت نەگىزگى قارۋ-جاراق ەكسپورتتاۋشىلارعا وزگە ەلدەرگە ءوز شارتتارىن قويۋعا قۇقىق بەرەدى دەپ ەسەپتەيدى. ەندى كەلىسىم-شارت جوباسىنىڭ بۇۇ باس اسسامبلەياسىنىڭ داۋىس بەرۋىنە قويىلۋى مۇمكىن. بۇل رەتتە قۇجاتتى قابىلداۋعا ۇيىمعا مۇشە مەملەكەتتەردىڭ ۇشتەن ەكىسىنىڭ داۋىسى جەتەتىن بولادى.
سوققى جاساۋ جوسپارىنا قول قويدى
كيم چەن ىن اسكەري باسشىلىقپەن وتكىزىلگەن شۇعىل كەڭەستەن كەيىن كحدر-ءدىڭ ستراتەگيالىق زىمىراندى اسكەرلەرىنىڭ اقش-تىڭ قۇرىلىقتىق بولىگىندەگى, سونداي-اق, گاۆاي, گۋام جانە وڭتۇستىك كورەياداعى اسكەري بازالارىنا سوققى جاساۋ جوسپارىنا قول قويدى.
سول سياقتى, وسى حاباردى تاراتقان اگەنتتىك ەگەر اقش ءوزىنىڭ ستراتەگيالىق كۇشتەرىنىڭ ۇلكەن كونتينگەنتىن جۇمىلدىرىپ, ەسسىز اسكەري ارانداتۋعا باراتىن بولسا وزدەرىنىڭ وسىنداي قادام جاسايتىندىعىن ايتقان كيم چەن ىننىڭ ءسوزىن دە قوسا كەلتىرگەن. سونىمەن بىرگە, كحدر-دا اقش-تىڭ بۇكىل اۋماعىنا راكەتالىق سوققى جاسايتىنداي قاجەتتى رەسۋرستاردىڭ جوق ەكەنىن دە ايتا كەتۋ كەرەك.
ناتو باسشىلىعىنداعى وزگەرىس
سولتۇستىكاتلانتيكالىق كەڭەس امەريكالىق گەنەرال فيليپ بريدلاۆتىڭ ناتو-نىڭ ەۋروپاداعى بىرلەسكەن كۇشتەرىنىڭ باس كومانداشىسى لاۋازىمىنا تاعايىندالۋىن بەكىتتى.
بۇل تۋرالى بەيسەنبى كۇنى كەشكىلىك اليانستىڭ ءباسپاسوز قىزمەتى حابارلاعان. ەندى بريدلاۆتىڭ كانديداتۋراسىن اقش سەناتى بەكىتۋى ءتيىس. ول بۇل قىزمەتتە ادميرال دجەيمس ءستاۆريديستى الماستىراتىن بولادى. قازىرگى ۋاقىتتا 54 جاستاعى ءتورت جۇلدىزدى گەنەرال بريدلاۆ اقش-تىڭ ەۋروپاداعى اۋە كۇشتەرى قولباسشىسى مىندەتىن اتقارادى. ناتو-نىڭ ەۋروپاداعى بىرلەسكەن كۇشتەرىنىڭ باس قولباسشىسى لاۋازىمى ءداستۇرلى تۇردە اقش وكىلىنە بەكىتىلگەن.
سيريادا سوعىسقان اقش ازاماتى ۇستالدى
ۆاشينگتون اۋەجايىندا ەرەۋىلشىلەر جاعىندا بولىپ سيرياداعى قاقتىعىستارعا قاتىسقان اقش ازاماتى تۇتقىندالدى. بۇل تۋرالى «Associated Press» اگەنتتىگى حابارلاعان.
فەدەرالدىق تەرگەۋ بيۋروسىنىڭ مالىمەتتەرى بويىنشا, 2012 جىلدىڭ قاراشاسىندا بۇعان دەيىن اقش ارمياسىندا ءۇش جىل قىزمەت ەتكەن 30 جاسار ەريك حاررۋن «ەرىكتى سيريا ارمياسى» ەرەۋىلشىلەرىنىڭ قاتارىنا قوسىلماق نيەتپەن تۇركيا ارقىلى سيرياعا كەلگەن. اقىرىندا ول اقش-تا تەررورلىق ۇيىم رەتىندە تانىلعان «ءال-نۋسرا مايدانى» توبىنا بارىپ قوسىلعان. وعان جاپپاي قىرىپ-جوياتىن قارۋ قولداندى دەگەن ايىپ تاعىلىپ وتىر. ەگەر كىنالى دەپ تانىلسا ول ءومىر بويى باس بوستاندىعىنان ايىرىلۋى مۇمكىن.
جالعان ادۆوكات 14 جىلعا سوتتالدى
لوندون سوتى كوپتەگەن بەلگىلى ادامداردى قورعاعان الاياق ادۆوكاتتى 14 جىلعا باس بوستاندىعىنان ايىردى, دەپ حابارلادى «نوۆوستي» اقپارات اگەنتتىگى.
«ءىبىلىستىڭ ادۆوكاتى» اتاعىنا يە يتاليالىق دجوۆانني دي ستەفانو زاڭگەرلىك ءبىلىمىنىڭ جانە ادۆوكاتتىق تاجىريبەنى جۇزەگە اسىرۋعا ليتسەنزياسىنىڭ بولماعانىنا قاراماستان ءوزىن تابىستى ادۆوكات رەتىندە كورسەتە بىلگەن. كەزىندە دي ستەفانو كوپتەگەن قىلمىسكەرلەردى, سونداي-اق, يراكتىڭ بۇرىنعى ۆيتسە-پرەمەرى تاريك ءازيزدى جانە وسى ەلدىڭ تاعىنان قۇلاتىلعان كوسەمى ساددام حۋسەيندى سوت پروتسەسى بارىسىندا قورعاعان بولاتىن. جالعان ادۆوكات ءوز كليەنتتەرىنەن وتە ۇلكەن قالاماقىلار الىپ تۇرعان.
سلوۆەنياعا كيپرلىك ستسەناري قاتەرى تونۋدە
سلوۆەنيانىڭ ەۋروپاداعى بانك داعدارىسىنىڭ جاڭا تولقىنىنىڭ كيپردەن سوڭعى قۇربانى بولۋى مۇمكىن, دەپ جازادى «ربك daily» گازەتى.
باسىلىم وسى ەلدىڭ بانك سەكتورىنداعى «قايتارىمسىز كرەديتتەر» ۇلەسىنىڭ قاۋىرت ۇلعايىپ كەتكەنىن اتاپ كورسەتكەن «Capital Economics» ساراپشىلارىنا سىلتەمە جاساعان. ورتاشا ەسەپپەن سلوۆەنيا بانكتەرىندەگى جامان بورىشتار كولەمى قازىردىڭ وزىندە 15 پايىزعا جەتكەن. سلوۆەنيانىڭ ەڭ ءىرى كرەديتورى بولىپ تابىلاتىن Nova Ljubijanska Banka مەملەكەتتىك قارجى ۇيىمى 2012 جىلدى 275 ملن. ەۋرو شىعىنمەن اياقتاپ وتىر. Moody’s اگەنتتىگى اپتانىڭ باسىندا بانكتىڭ ۇزاق مەرزىمدى دەپوزيتتىك رەيتينگىن «تەرىس» بولجام بويىنشا تومەندەتتى.
كونگوعا بىتىمگەرشىل كۇشتەر ەنگىزىلمەك
بۇۇ-نىڭ بىتىمگەرشىلىك كۇشتەرى شابۋىلداۋشى وپەراتسيالارعا ماندات الدى. بۇۇ قاۋىپسىزدىك كەڭەسى ەرەۋىلشىل توپتاردى بەيتاراپتاندىرۋ مەن قارۋسىزداندىرۋدا شەكسىز قۇقىق بەرە وتىرىپ, اسكەري كونتينگەنتتىڭ كونگو دەموكراتيالىق رەسپۋبليكاسىنا كىرۋ جوسپارىن بەكىتتى.
قاراردا ءىس-شارانىڭ ايىرىقشا سيپاتقا يە ەكەنى جانە بۇۇ-نىڭ بىتىمگەرشىلىك قاعيداتتارىن وزگەرتۋگە جول بەرىلمەيتىنى ناقتىلانعان. قۇجاتتىڭ كۇشىندە بولاتىن مەرزىمى – ءبىر جىل. كونگوعا جىبەرىلەتىن اسكەري قىزمەتشىلەر سانى 2,5 مىڭ ادامدى قۇراماق. بۇل ءىس-شارانىڭ دۇرىستىعىنا كۇمانمەن قاراۋشىلار دا جوق ەمەس. وندايلار وزگە ەلدىڭ اۋماعىنا باسىپ كىرۋ داعدىلى سيپات الىپ كەتپەي مە دەپ قاۋىپتەنەدى.
سودىرلار ۋنيۆەرسيتەتتى اتقىلادى
سيريالىق سودىرلار مينومەتتەن داماسك ۋنيۆەرسيتەتىن اتقىلاپ, سونىڭ سالدارىنان 12 ادام قازا تاپقان. نەگىزگى قۇرباندار ستۋدەنتتەر بولىپ وتىر.
سناريادتار استانالىق جوعارى وقۋ ورنىنىڭ ارحيتەكتۋرا فاكۋلتەتى ورنالاسقان عيماراتقا بارىپ تيگەن. سونىڭ سالدارىنان ون ەكى ادام قازا تاۋىپ, جيىرما ادام دەنە جاراقاتتارىن العان كورىنەدى. بۇل سودىرلاردىڭ داماسكىنى سوڭعى ۋاقىتتارداعى ءبىرىنشى اتقىلاۋى ەمەس. بۇعان دەيىن «داماسك شابۋىلى» شەڭبەرىندە باشار اسادقا قارسىلار پرەزيدەنت سارايىن, ۋماياد الاڭىن جانە باسقا دا ماڭىزدى عيماراتتاردى اتقىلاعان بولاتىن. ازىرگە سودىرلارعا قالانى باسىپ الۋدىڭ ءساتى تۇسكەن جوق. ۇكىمەت اسكەرلەرى سيريا توڭىرەگىندەگى پوزيتسيالاردى بەرىك ۇستانىپ, قارسىلاستارىنا ەلەۋلى سوققىلار جاساۋدا.
ينتەرنەت ماتەريالدارى نەگىزىندە ازىرلەندى.