بيىل قاراعاندى وبلىسىندا «نۇرلى جەر» باعدارلاماسى اياسىندا كولەمى 10,1 ميلليارد تەڭگە بولاتىن تۇرعىن ءۇي, ياعني 4,3 مىڭ ءپاتەر قۇرىلىسىن قارجىلاندىرۋ قاراستىرىلعان. جالپى, تۇرعىن ءۇي قۇرىلىسى تەك وبلىس ورتالىعىندا عانا ەمەس, ءوڭىردىڭ باسقا دا قالالارىندا بەلسەندى تۇردە جۇرگىزىلۋى ءتيىس دەپ سانايدى جەرگىلىكتى بيلىك. مىسالى, ءوڭىردىڭ جەزقازعان, تەمىرتاۋ جانە بالقاش سياقتى قالالارىندا تۇرعىن ۇيگە دەگەن سۇرانىس وتە جوعارى.
قاراعاندى وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى تايحان قالماحانوۆ كەلتىرگەن دەرەكتەر بويىنشا, بيىل قاڭتار-ءساۋىر ايلارى ارالىعىندا 136,6 مىڭ شارشى مەتر تۇرعىن ءۇي پايدالانۋعا بەرىلگەن. وسى كولەمنىڭ 38,5%-عا جۋىعى جەكەمەنشىك ۇيلەرگە تيەسىلى بولسا, كوممەرتسيالىق باسپانانىڭ ۇلەسى 37,8%-دى قۇرايدى. ال 23,6%-ى مەملەكەتتىك سەكتورداعى تۇرعىن ءۇيدىڭ ەنشىسىندە.
بيىل رەسپۋبليكالىق بيۋدجەتتەن ارەندالىق باسپانا قۇرىلىسىنا 2,1 ملرد تەڭگە ءبولىندى. سالىنۋعا ءتيىس 520 پاتەردىڭ 260-ى قازىردىڭ وزىندە پايدالانۋعا بەرىلگەن. اتاپ ايتقاندا, ساران قالاسىندا – 120, تەمىرتاۋدا – 50, پريوزەرسك قالاسىندا 24 ءپاتەر ءوز يەلەرىن تاپتى. سونىمەن قاتار بۇقار جىراۋ اۋدانىندا – 32, اقتوعايدا – 6, جاڭاارقادا – 16, ال شەت اۋدانىندا 12 ءپاتەردە قونىس تويى تويلاندى. بۇدان بولەك بيىل قايتالاما نارىقتا 204 پاتەر ساتىپ الۋ ءۇشىن رەسپۋبليكالىق بيۋدجەتتەن 1,5 ملرد تەڭگە بولىنبەكشى.
قازىرگى تاڭدا جەرگىلىكتى بيۋدجەتتەر ەسەبىنەن قۇرىلىس قارقىندى جۇرگىزىلىپ جاتىر. سونىڭ ناتيجەسىندە بيىل 1 مامىرعا دەيىن كوپ بالالى 27 وتباسى ارەندالىق پاتەر كىلتىنە يە بولدى. ال ايدىڭ سوڭىنا تامان تاعى دا 106 كوپ بالالى وتباسى باسپاناعا يە بولىپ, قونىس تويىن تويلادى.
سونىمەن قاتار بيىل جىلدىق ءوسىمى بار-جوعى 2% بولاتىن جەڭىلدەتىلگەن نەسيەنى «تۇرعىنۇيقۇرىلىسجيناقبانكى» ارقىلى راسىمدەۋ ءۇشىن وبلىستىق بيۋدجەتتەن 1 ميلليارد تەڭگە قارجى بولىنەدى. ياعني, «7-20-25» باعدارلاماسى بويىنشا باستاپقى جارناسىز يپوتەكالىق نەسيە بەرىلگەندە, ونىڭ 10%-ى تۇرعىن ءۇي سەرتيفيكاتى ارقىلى جابىلادى. ال جوعارىدا ايتىلعان 1 ملرد تەڭگە سوماعا 159 جەڭىلدەتىلگەن يپوتەكالىق زايم ءراسىمدەۋ جوسپاردا بار.
جالپى, بيىل قاراعاندى وبلىسى بويىنشا تۇرعىن ءۇي كەزەگىندە 700 كوپ بالالى جانە از قامتىلعان وتباسى باسپانالى بولۋ باقىتىن سەزىنەدى. بۇل يگى ىستەن جەرگىلىكتى كاسىپكەرلەردىڭ دە شەت قالماي, كومەك قولىن سوزعانىن ايتا كەتۋ ءلازىم. مىسالى, جوعارىدا ايتىلعان 700 وتباسىنا بۇيىراتىن باسپانانىڭ ۇشتەن ءبىرى بيزنەس وكىلدەرىنىڭ دەمەۋشىلىگى ارقاسىندا مۇمكىن بولماقشى.
سالا ماماندارىنىڭ ايتۋىنشا, قازىرگى ۋاقىتتا وبلىستا تاپسىرىس بەرۋشىلەر تاراپىنان ەمحانالار مەن جالپى ءبىلىم بەرەتىن جانە سپورتتىق مەكتەپتەر, سونداي-اق تۇرعىن ءۇي قۇرىلىستارىنا دەگەن سۇرانىس مول. بىلتىر وڭىردە قۇرىلىس جۇمىستارىنىڭ كولەمى 185 ملرد تەڭگەگە ورىندالدى. بۇل دەگەنىڭىز, 416 مىڭ شارشى مەتردى قۇرايتىن تۇرعىن ءۇي پايدالانۋعا بەرىلدى دەگەن ءسوز. ياعني, ءتورت مىڭ پاتەردە قونىس تويى تويلاندى. مۇنداي قارقىن باسقا ايماقتارمەن سالىستىرعاندا باياۋلاۋ بولعانىمەن, قاراعاندى وبلىسىندا قۇرىلىس جۇمىستارىنىڭ بارىنشا قىزۋ جۇرگىزىلىپ جاتقانىن ايتا كەتكەن ءجون.
قاراعاندى وبلىسى