سەيسەنبى, 29 قاڭتار 2013 7:31
ساياسي ۇنقاتىسۋعا كەلىستى
ءۇش كۇنگە سوزىلعان تارتىپسىزدىكتەردەن كەيىن ەگيپەت پرەزيدەنتى وپپوزيتسيامەن ساياسي ۇنقاتىسۋعا كەلىستى
ەگيپەت پرەزيدەنتى مۋحاممەند مۋرسي تارتىپسىزدىكتەردىڭ توقتاماۋىنا بايلانىستى ەلدىڭ ءۇش پروۆينتسياسىندا توتەنشە جاعداي رەجىمىن ەنگىزۋگە ءماجبۇر بولدى. بۇرىنعى رەجىمدى قۇلاتۋدىڭ ەكىنشى جىلدىعىنا تۋرا كەلگەن نارازىلىق اكتسيالارىن ول كونتررەۆوليۋتسيا جۇرگىزۋگە تالپىنىس دەپ اتادى.
سەيسەنبى, 29 قاڭتار 2013 7:31
ساياسي ۇنقاتىسۋعا كەلىستى
ءۇش كۇنگە سوزىلعان تارتىپسىزدىكتەردەن كەيىن ەگيپەت پرەزيدەنتى وپپوزيتسيامەن ساياسي ۇنقاتىسۋعا كەلىستى
ەگيپەت پرەزيدەنتى مۋحاممەند مۋرسي تارتىپسىزدىكتەردىڭ توقتاماۋىنا بايلانىستى ەلدىڭ ءۇش پروۆينتسياسىندا توتەنشە جاعداي رەجىمىن ەنگىزۋگە ءماجبۇر بولدى. بۇرىنعى رەجىمدى قۇلاتۋدىڭ ەكىنشى جىلدىعىنا تۋرا كەلگەن نارازىلىق اكتسيالارىن ول كونتررەۆوليۋتسيا جۇرگىزۋگە تالپىنىس دەپ اتادى. توتەنشە جاعدايدىڭ ەنگىزىلۋىنە جاۋاپ رەتىندە ەگيپەتتىكتەر «تۇنگى قىدىرىس» ۇيىمداستىردى. بىرقاتار وڭىرلەردە ءۇش كۇنگە سوزىلعان تارتىپسىزدىك سالدارىنان ونداعان ادام قازا تاپتى. مۋرسي ءوزىنىڭ ساياسي قارسىلاستارىن تۇراقتىلىق پەن قاۋىپسىزدىككە قول جەتكىزۋ ءۇشىن ۇنقاتىسۋعا شاقىرىپ وتىر.
تيمبۋكتۋ قالاسىن شابۋىلداماق
ماليدە ۇكىمەت ارمياسىنىڭ سولداتتارى مەن فرانتسۋز بولىمشەلەرى تيمبۋكتۋ باعىتىنا قاراي جىلجۋدا. كەيبىر مالىمەتتەرگە قاراعاندا, اسكەر يسلاميستەر تاراپىنان ەشقانداي قارسىلىق كەزدەستىرمەي وتىر.
وتكەن دەمالىس كۇندەرى فرانتسۋز اۆياتسياسى سودىرلاردىڭ تيمبۋكتۋ جانە گاو اۋداندارىنداعى پوزيتسيالارىنا ونداعان سوققىلار جاسادى. سەنبى كۇنى مالاي جانە فرانتسۋز اسكەريلەرى گاو قالاسىن باقىلاۋعا الدى. باماكودان 1,2 شاقىرىم جەردە ورنالاسقان گاو ءماليدىڭ سولتۇستىگىندەگى يسلاميستەردىڭ تىرەك قالاسىنىڭ ءبىرى بولىپ تابىلادى. سونىمەن بىرگە, چاد پەن نيگەردىڭ اسكەري كونتينگەنتتەرى دە جەرگىلىكتى اۋەجايعا كەلە باستادى. ولار گاو قالاسىنا باقىلاۋ ورناتۋى ءتيىس.
ەكس-پرەمەر ەس جيناي باستادى
يزرايلدە مەديتسينالىق ورتالىق ماماندارى زەرتتەۋ بارىسىندا ەلدىڭ بۇرىنعى پرەمەر-ءمينيسترى اريەل شاروننىڭ ميىنداعى نەيرونداردىڭ ايتارلىقتاي بەلسەندىلىك تانىتا باستاعانىن بايقاعان.
بۇل ادەتتەگى تەستىلەر بولاتىن, بىراق ونىڭ ناتيجەلەرى كۇتكەندەگىدەن ەداۋىر وزگەشە بولىپ شىقتى. وڭ كورسەتكىشتەردىڭ بار ەكەندىگى بايقالدى, دەپ اتاپ كورسەتكەن شاروننىڭ بۇرىنعى كومەكشىسى راانان گيسسين. دارىگەرلەر بۇرىنعى پرەمەر-ءمينيستردىڭ ميىنا ەكى ساعاتتىق ماگنيتتى-رەزوناستى توموگرافيا جاساپ, ونىڭ بارىسىندا وتباسى مۇشەلەرىنىڭ فوتوسۋرەتىن وعان كورسەتكەن. سونداي-اق, مەديكتەر شاروننىڭ مي نەيروندارىنىڭ رەاكتسياسىن تەكسەرۋ ءۇشىن ونىڭ ۇلى گيلادتىڭ داۋىسىن دا تىڭداتقان. قورىتىندىسىندا ماماندار 2006 جىلدان بەرى كومادا جاتقان ەكس-پرەمەردىڭ بەلگىلى ءبىر دارەجەدە ەس جيناۋ نىشاندارىن بايقاعان.
يران ەۋرووداققا مۇناي مەن گاز ساتۋدى توقتاتتى
يران ءوزىنىڭ مۇنايى مەن گازىن ەۋروپاعا ساتۋدى توقتاتتى. يران مۇنايى مەن گازىن ەكسپورتتاۋعا سالىنعان تىيىم ەو دۇشپاندىق شەشىمدەر قابىلداۋىن توقتاتقانعا دەيىن ساقتالماق.
يراننىڭ مۇنايى مەن گازىن ەۋرووداق ەلدەرىنە ەكسپورتتاۋدى توقتاتۋ ەۋروپا مەملەكەتتەرى مەن اقش-تىڭ تەگەرانعا قاتىستى ەنگىزگەن ەكونوميكالىق سانكتسيالارىنا جاۋاپ رەتىندە جۇزەگە اسىرىلىپ وتىر. بۇل تۋرالى يراننىڭ مۇناي مينيسترلىگىنىڭ وكىلى اليرەزا نيكزاد-راحبار حابارلاعان. ەۋرووداق سانكتسيا ەنگىزگەنگە دەيىن ەو-عا يمپورتتالاتىن يران مۇنايىنىڭ كولەمى بۇكىل ەل يمپورتىنىڭ 18 پايىزىن قۇراعان ەدى. ايتا كەتۋ كەرەك, 21 جەلتوقساندا ەۋرووداق يرانعا قاتىستى سانكتسيالاردىڭ اناعۇرلىم قاتاڭ پاكەتىن قابىلداعان بولاتىن.
بەرلۋسكوني ءمۋسسولينيدى ماقتادى
سيلۆيو بەرلۋسكوني تاعى دا داۋ-جانجالداردىڭ ورتاسىندا قالدى. بۇل جولى يتاليالىق ساياساتكەر ميلاندا وتكەن حولوكوست قۇرباندارىن ەسكە الۋ سالتاناتىندا ادەپسىز ءسوز ايتقان كورىنەدى.
سيلۆيو بەرلۋسكوني وسى وتكەن سالتاناتتا بەنيتو مۋسسوليني رەجىمىن جانە ونىڭ جەكە باسىن ماقتاعان. ساياساتكەردىڭ پىكىرىنشە, ونىڭ ەل ءۇشىن كوپ جاقسىلىقتار جاساعانى سونداي, ونىڭ ەۆرەي حالقىن كونتسلاگەرلەرگە دەپورتاتسيالاۋ تۋرالى بۇيرىعى سونشالىقتى ءبىر ماڭىزدى قىلمىس بولىپ تابىلمايدى. وسى سوزدەن كەيىن ونىڭ اتىنا كوپتەگەن قوعام جانە ساياسي قايراتكەرلەر تاراپىنان سىن ايتىلسا دا, بەرلۋسكونيدىڭ ازىرگە كەشىرىم سۇراۋعا اسىعاتىن ءتۇرى جوق.
حيللاري كلينتوننىڭ ەكىۇشتى جاۋابى
اقش-تىڭ مەملەكەتتىك حاتشىسى حيللاري كلينتون 2016 جىلى وتەتىن اقش پرەزيدەنتى سايلاۋىندا ءوز كانديداتۋراسىن پرەزيدەنت لاۋازىمىنا ۇسىنا ما دەگەن جۋرناليستەر ساۋالىنا جاۋاپ قايتارماعان كورىنەدى.
پرەزيدەنت باراك وبامامەن بىرگە امەريكالىق CBS تەلەارناسىنا بەرگەن سۇحباتىندا ول مەنى جانە پرەزيدەنتتى ءبىزدىڭ ەلىمىزدى نە كۇتىپ تۇرعانى الاڭداتادى. ءبىز ەرتەڭ نە بولارىن, الداعى جىلى نە بولارىن الدىن الا ايتا الامىز دەپ ويلامايمىن دەپ جاۋاپ بەرگەن. حيللاري كلينتون ءوزىنىڭ ءالى دە مەملەكەتتىك حاتشى ەكەنىن, ساياساتقا ارالاسپايتىنىن ايتىپ, ونداي ساۋالداردى تىڭداعىسى دا كەلمەيتىنىن جەتكىزگەن.
قىز الىپ قاشقاندارعا جازا قاتاڭ
قىرعىزستاندا ايەلدى نەكەگە وتىرۋعا ماجبۇرلەگەنى ءۇشىن جازانى قاتايتتى. سوعان وراي ەل وكىمەتى قىلمىستىق كودەكسكە تۇزەتۋ ەنگىزۋ تۋرالى زاڭ قابىلداعان.
قۇجاتقا سايكەس رەسپۋبليكادا قىزدى الىپ قاشىپ, ەركىنەن تىس نەكەگە تۇرۋعا ماجبۇرلەگەنى ءۇشىن 5 جىلدان 7 جىلعا دەيىن باس بوستاندىعىنان ايىرۋ تۇرىندە قىلمىستىق جاۋاپكەرشىلىك ەنگىزىلەتىن بولادى. ەگەر جاسى 17-گە تولماعان قىزدى نەكەگە ماجبۇرلەيتىن بولسا «كۇيەۋ بالا» 7 جىلدان 10 جىلعا دەيىن باس بوستاندىعىنان ايىرىلۋى مۇمكىن.
ينتەرنەت ماتەريالدارى نەگىزىندە ازىرلەندى.