مەترولوگيا – ولشەۋ بىرلىگىن قامتاماسىز ەتەتىن ادىستەر مەن قۇرالدار جانە كەرەكتى دالدىككە جەتۋ تاسىلدەرى تۋرالى عىلىم. قازاقستاننىڭ ءۇشىنشى جاڭعىرۋى, يندۋستريالاندىرۋ باعدارلاماسى سياقتى كوپتەگەن مەملەكەتتىك باعدارلامالاردى جۇزەگە اسىرۋ مەترولوگيانىڭ كومەگىنسىز مۇمكىن ەمەس. ويتكەنى ولشەمدەر عىلىمي اقپارات كوزى رەتىندە عانا ەمەس, ماتەريالدىق رەسۋرستاردا, ىشكى جانە سىرتقى ساۋدادا, ءونىمنىڭ ساپاسىن, ەڭبەك قاۋىپسىزدىگىن جانە تەحنولوگيالاردى قامتاماسىز ەتۋدە قولدانىلادى. سوندىقتان يندۋستريا جانە ينفراقۇرىلىمدىق دامۋ مينيسترلىگىنىڭ تەحنيكالىق رەتتەۋ جانە مەترولوگيا كوميتەتى مەترولوگيا سالاسىنداعى وزەكتى ماسەلەلەردى تالقىلاۋ مەن شەشۋدىڭ جولدارىن قاراستىرۋ ماقساتىندا جىل سايىن ەلىمىزدەگى مەترولوگتەردىڭ باسىن قوسىپ كەلەدى. سونداي-اق جاس مامانداردى ىنتالاندىرۋعا ارنالعان «ۇزدىك جاس مەترولوگ» جانە وتاندىق وندىرۋشىلەردىڭ باسەكەگە قابىلەتتىلىگىن ارتتىرۋعا باعىتتالعان «ۇزدىك ولشەۋ قۇرالى» بايقاۋى ءوتىپ كەلەدى.
«قازاقستان مەترولوگيا ينستيتۋتى» رمك ۇيىمداستىرعان بۇل جولعى جيىنعا جينالعان جاستاردىڭ قاتارى كوپ بولدى. «قازاقستان مەترولوگيا ينستيتۋتى» رمك باس ديرەكتورى توقتابەك توقانوۆ سەميناردىڭ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندەگى ستۋدەنتتەردىڭ قاتىسۋىمەن ءوتىپ جاتقانىنا ەرەكشە ماڭىز بەردى. «بۇگىنگى مەيرامنىڭ وسى ۋنيۆەرسيتەتتە ۇيىمداستىرىلۋىندا ءمان بار. ءبىز بۇرىننان جوو تۇلەكتەرىمەن تىعىز بايلانىستا بولىپ, ولاردى جۇمىسقا ورنالاستىرىپ, مەترولوگيا ماماندىعىن كەڭەيتۋگە اتسالىسىپ كەلەمىز. بيىلعى جاستار جىلىنىڭ جاريالانۋى بۇل جۇمىسىمىزدى ەسەلەي ءتۇستى. ياعني بۇگىن وسى سالادا ءبىلىم الىپ جاتقان جاستارمەن جۇزدەسۋگە مۇمكىندىك تۋىپ وتىر. ءبىزدىڭ ينستيتۋت تەك قانا قاتىسۋشى ەمەس, جاس مەترولوگتەردىڭ بىلىكتىلىگىن ارتتىرۋعا, ستۋدەنتتەردىڭ تاجىريبەدەن وتۋىنە جول اشىپ كەلەدى. سوندىقتان دا ستۋدەنتتەر مەن ماگيسترانتتار جىل سايىن وتەتىن «ۇزدىك جاس مەترولوگ» بايقاۋىنا قاتىسادى», دەگەن ت.توقانوۆ ەلىمىزدەگى بىردەن-ءبىر مەترولوگيا سالاسىندا قىزمەت ەتەتىن مەكەمەنىڭ مۇمكىندىكتەرىمەن, جەتىستىكتەرىمەن تانىستىردى.
«ەۇۋ-دە مەترولوگيا ماماندىعى بويىنشا ءبىلىم بەرۋ 2010 جىلى باستالدى. 2017 جىلى «ستاندارتتاۋ, مەترولوگيا جانە سەرتيفيكاتتاۋ» ماماندىعى «ستاندارتتاۋ جانە سەرتيفيكاتتاۋ», «مەترولوگيا» بولىپ جەكە-جەكە ماماندىق رەتىندە تۇلەكتەر قابىلدادى. كافەدرادا تەحنيكا عىلىمدارىنىڭ دوكتورلارى, كانديداتتارى مەن ماگيسترانتتارى بار. سوڭعى جىلدارى ارنايى شاقىرىلعان شەتەلدىك پروفەسسورلار دا ساباق بەرىپ كەلەدى. ستۋدەنتتەرىمىز «ۇزدىك جاس مەترولوگ» بايقاۋىندا تالاي رەت توپ جارىپ شىقتى», دەدى سەميناردا ءسوز العان ستاندارتتاۋ جانە سەرتيفيكاتتاۋ كافەدراسىنىڭ مەڭگەرۋشىسى, پروفەسسور باقىتگۇل بايحوجاەۆا. الايدا باكالاۆريات تۇلەكتەرىنىڭ بىلىكتىلىگىن ارتتىرۋدا اتقارىلار جۇمىستىڭ كوپ ەكەنىنە توقتالعان تەحنيكا عىلىمدارىنىڭ دوكتورى ب.بايحوجاەۆا تاجىريبەگە باعىتتالعان پاندەردى ەنگىزۋدىڭ ماڭىزىن اتاپ ءوتتى.
سەمينار سوڭىندا «ۇزدىك جاس مەترولوگ – 2019» جانە «ۇزدىك ولشەۋ قۇرالى – 2019» بايقاۋىنىڭ جەڭىمپازدارى ماراپاتتالدى.
مايگۇل سۇلتان,
«Egemen Qazaqstan»