شىمكەنتتىڭ 2020 جىلى تمد-نىڭ مادەني استاناسى بولىپ جاريالانۋى ۇلكەن مارتەبە ەكەنىن ايرىقشا ايتقان عابيدوللا ءابدىراحىموۆ جىل بويى ءۇشىنشى مەگاپوليستىڭ اۋقىمدى مادەني باعدارلامالار مەن كەزدەسۋلەر وتەتىن الىپ الاڭعا اينالاتىنىن جەتكىزدى. قالا اكىمى, سونىمەن قاتار, قالا اۋماعىندا جۇزەگە اسىپ جاتقان جوبالارعا توقتالدى. ونىڭ ايتۋىنشا, شىمكەنت قالاسى əۋەجايىندا جاڭا جولاۋشىلار تەرمينالىنىڭ قۇرىلىسى باستالعان. جوبانىڭ ينۆەستيتسيالىق قۇنى 50 ميلليون اقش دوللارىن قۇرايدى. جاڭا تەرمينالدىڭ ىسكە قوسىلۋى ناتيجەسىندە اۋەجايداعى جولاۋشىلار اعىمى 10 ەسەگە ارتاتىن بولادى. سونىمەن قاتار, قالاداعى تەمىرجول ۆوكزالىنا جاڭعىرتۋ جۇمىستارى جۇرگىزىلۋدە. ناتيجەسىندە قىزمەت كورسەتۋدىڭ حالىقارالىق ستاندارتتارىنا سايكەس كۇنىنە 9 مىڭعا جۋىق جولاۋشىنى قابىلداي الادى.
بۇدان بولەك, شىمكەنتتە 3 مىڭ ورىندى زاماناۋي «كونگرەسس-ورتالىق» سالۋ مەن 20 مىڭ ورىندى ورتالىق ستاديوندى قايتا جاڭعىرتۋ جوسپارلانۋدا. 2200 جىلدىق تاريحى بار شاھاردا «ەسكى قالاشىق – تسيتادەلدى» قايتا جاڭارتۋ مەن قوشقار اتا وزەنىنىڭ جاعالاۋىن اباتتاندىرۋ جۇمىستارى باستالدى. «تسيتادەل – شىمكەنتتىڭ بىرەگەي مادەني-تاريحي ايماعى. قالپىنا كەلتىرۋ جۇمىستارى اياقتالعاننان كەيىن بۇل نىسان تەك مەگاپوليستىڭ عانا ەمەس, بۇكىل قازاقستاننىڭ جارقىن تۋريستىك برەندىنە اينالاتىن بولادى», دەدى اكىم.
زاماناۋي ينفراقۇرىلىمنىڭ جوعارى حالىقارالىق ستاندارتتارىنا ساي 400 گەكتار اۋماقتا سالىنىپ جاتقان «Shymkent City» قالاشىعى تۋرالى ايتقان قالا اكىمى «حەپپيلەند» وتباسىلىق ويىن-ساۋىق كەشەنى دە بوي كوتەرەتىنىن مالىمدەدى.ء سوز سوڭىندا عابيدوللا ءابدىراحىموۆ شىمكەنتتىڭ كەلىستى كەلبەتىمەن, جىلىلىعىمەن, قوناقجاي قالپىمەن, يگى داستۇرىمەن جانە ءتالىمدى تاريحىمەن ماقتانا الاتىنىن جەتكىزدى.