وندا باس قوسقان قازاقستاننىڭ جانە رەسەيدىڭ قوستاناي وبلىسىمەن ىرگەلەس چەليابى, قورعان جانە ورىنبور وبلىستارىنىڭ جاستارى, قاشاننان ىرگەلەس قونعان, ىنتىماقتاستىقتى دامىتۋعا مۇددەلى ەكى ەلدەگى قوعامدىق ۇيىمدار وكىلدەرى ىزگىلىككە باستايتىن ەرىكتىلىك – ۆولونتەرلىك قوزعالىستار, وسى ورايداعى حالىقارالىق باستامالار تۋرالى وي-پىكىرلەرىن جانە ەرىكتىلىك سالاسىنداعى ۇزدىك تاجىريبەلەرىن ورتاعا سالدى. ەرىكتىلىك كوپتەگەن ەلدە كەڭ قانات جايعان, ادامداردىڭ قايىرىمدى ىستەرى قوعامدى ىزگىلەندىرەدى.
– ەرىكتىلەر – ناعىز باتىر, پاتريوت, مەيىرىمدى جاندار. وسى زالدا وتىرعان 1000 ەرىكتىنىڭ ارقايسىسى اينالاسىنا كومەك قولىن سوزۋعا دايار. قوعامدى قايىرىمدى ەتەتىن وزدەرىڭىز, – دەدى فورۋمنىڭ پلەنارلىق ءماجىلىسىنىڭ مودەراتورى, ەلىمىزدەگى «ۆولونتەرلەر ليگاسى» قوعامدىق قورىنىڭ نەگىزىن قالاۋشى قايىرجان مەڭدىعاليەۆ.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ 2019 جىلدى جاستار جىلى دەپ جاريالادى. مەرەكەسى دە, مىندەتى دە مول جىلدىڭ جول كارتاسى اياسىندا ءوتىپ وتىرعان فورۋمعا قاتىسۋشىلاردى وبلىس اكىمى ارحيمەد مۇحامبەتوۆ قۇتتىقتاپ, جاستار ساياساتىنا قاتىستى وبلىستا بىتكەن جاقسى ىستەردى اتاپ ءوتتى. ودان كەيىن د.اباەۆ ەلىمىزدەگى جالپى جاستارعا بەرىلىپ وتىرعان مول مۇمكىندىكتەردى تىلگە تيەك ەتتى.
– تاۋەلسىزدىكتىڭ العاشقى كۇنىنەن باستاپ, ءبىزدىڭ مەملەكەت جاستار ءىسىن نازاردان تىس قالدىرمادى. ەلباسى نۇرسۇلتان نازارباەۆ «بولاشاق» باعدارلاماسىن ىسكە قوستى. ول بويىنشا 13 مىڭ قازاقستاندىق جاس شەتەلدەردەگى ەڭ تاڭداۋلى دەگەن ۋنيۆەرسيتەتتەردەن ءبىلىم الدى. ول قازىر دە جالعاسىن تاۋىپ وتىر. جاستار جىلى مەملەكەت جاستاردىڭ جۇمىسقا ورنالاسۋى, كاسىپكەرلىكتى باستاپ كەتۋى, ولاردى جەڭىلدىكتى باسپانامەن قامتاماسىز ەتۋ, ساپالى ءبىلىم الۋلارى ءۇشىن قوماقتى قارجى سالىپ وتىر. جاستار جىلىنداعى وسىنداي شارالار قازاقستانداعى 4 ميلليون جاستىڭ 70 پايىزىن قامتيتىن بولادى. قازىر ءبىز جاڭا تسيفرلاندىرۋ ءداۋىرىنىڭ تابالدىرىعىن باستىق, سونىڭ ناعىز ەلشىسى وزدەرىڭىز بولاسىزدار. بۇگىنگى جاستار ءوزىنىڭ يگىلىكتى, قوعامدى دامىتۋعا ۇلكەن ۇلەس بولىپ قوسىلاتىن پايدالى ءىسىن ءوزىنىڭ ازاماتتىق ۇستانىمى ارقىلى كورسەتەدى. سونداي ىزگلىكتى ءىستىڭ ءبىرى ەرىكتىلەر قوزعالىسى قارقىندى دامىپ كەلەدى, – دەدى اباي اسكەربەك ۇلى.
مۇنان كەيىن فورۋم قوناعى, رەسەي جاستار ءىسى جونىندەگى فەدەرالدىق اگەنتتىگى جەتەكشىسىنىڭ ورىنباسارى اندرەي پلاتونوۆ ۆولونتەرلىك جۇمىستىڭ ەلدەردى ىنتىماققا جالعايتىن كۇش ەكەنىنە توقتالدى.
– مەملەكەتتىك ورگاندار ەرىكتىلەرمەن بىرگە تىزە قوسىپ, قوعامداعى كەدەرگىلەردى جەڭەدى, ەڭ اۋىر دەگەن كۇردەلى ىستەردىڭ شەشىمىن تابامىز. قازىر رەسەيدە ءىرى ەرىكتىلەر ۇيىمدارى بار. ولاردىڭ كوشباسشىلارى ادامداردى يگى ىسكە جۇمىلدىرىپ قانا قويماي, زاڭنامانى دا جاقسى بىلەدى. ولاردىڭ باستاماسىمەن نورماتيۆتىك اكتىلەر تولىقتىرىلىپ, ۆولونتەرلىك قىزمەتتىڭ كەڭ قانات جايۋىنا كەدەرگىلەر ازايدى,– دەدى ا.پلاتونوۆ رەسەيدەگى جاقسى تاجىريبەنى ورتاعا سالىپ.
قازىر ەرىكتىلەر جۇمىسى ەكولوگيالىق, پاتريوتتىق نەمەسە قۇتقارۋ سەكىلدى ءتۇرلى باعىتتا دامىپ كەلەدى. مىسالى, وسى فورۋم الدىندا عانا كورشى ەكى ەلدىڭ اۋماعىنان اعاتىن توبىل وزەنىنىڭ بويىندا «ەسو – challenge Qostanai» ەكولوگيالىق اكتسياسى وتكىزىلدى. ول وبلىستىڭ جىتىقارا, قامىستى, دەنيسوۆ, تاران, قوستاناي اۋداندارىن, ليساكوۆ, رۋدنىي قالالارىن قامتىدى. فورۋم اياسىندا قوستاناي قالاسىندا رەسەي-قازاقستان جاستارىن بىرىكتىرەتىن توبىل وزەنىنىڭ جاعالاۋىن تازالايتىن تاعى دا ەكو-اكتسيا ءوتتى. بۇل جاستار اراسىندا ەكولوگيالىق ءمادەنيەتتى, ەرىكتىلىكتى دامىتۋعا باعىتتالعان يگى جۇمىستىڭ ءبىرى عانا بولاتىن.
– مۇنداي فورۋمداردىڭ جاستارعا بەرەرى كوپ. جالپى, ەرىكتىلىكتىڭ ءوزى جاستار ءۇشىن ۇلكەن ءتاربيە قۇرالى دەر ەدىم. ول الدىمەن جاستاردىڭ بوس ۋاقىتىن ءتيىمدى پايدالانا بىلۋىنە, ءوز ۇستانىمىن قالىپتاستىرۋعا ءۇيرەتەدى. مەن كاسىپكەرمىن. ەرىكتى بولماسام دا تۇرمىسى تومەن جاندارعا كومەكتەسىپ جۇرەمىن. جاستار اراسىندا ەرىكتىلىكتىڭ دامىپ كەلە جاتقاندىعى الەۋمەتتىك جەلىلەردەگى جازىلعان جايلاردان جاقسى بىلىنەدى. وزگەنىڭ قايعىسىن بولىسە ءبىلۋ, مەيىرىمدىلىك كورسەتۋ ەڭ جاقسى قاسيەتتىڭ ءبىرى بولسا, بۇگىنگى قوعامدا ول ەرىكتىلىك قوزعالىسى ارقىلى باي تۇسەدى, – دەدى جاستار فورۋمىنا ورال قالاسىنان كەلىپ قاتىسقان مارينا بيعاليەۆا.
بۇگىن جاستار فورۋمىنىڭ جۇمىسى جالعاسادى.
قوستاناي