سوعان سايكەس كەشە تمد اتقارۋ كوميتەتى توراعاسىنىڭ ءبىرىنشى ورىنباسارى ۆ.ا.گۋمينسكي, اتقارۋ كوميتەتى ءبولىمىنىڭ باستىعى ە.ا.سلوبودا, تمد اتقارۋ كوميتەتىنىڭ كەڭەسشىسى و.ۆ.كۋلەبا, ە.ۆ.كوزياك جانە تمد اتقارۋ كوميتەتىنىڭ كونسۋلتانتى ي.ي.پودلۋتسكايا ورتالىق سايلاۋ كوميسسياسىنا كەلدى.
اتالعان بايقاۋشىلارمەن وسك توراعاسى بەرىك يماشەۆ كەزدەستى. سونداي-اق كەزدەسۋگە وسك توراعاسىنىڭ ورىنباسارى ك. پەتروۆ پەن ونىڭ مۇشەسى ز. بايمولدينا دا قاتىستى. ب.يماشەۆ كەزدەسۋ شەڭبەرىندە ۆ.گۋمينسكيگە ەلەكتوراتتىق ناۋقاننىڭ بارلىق كەزەڭدەرى كەزىندەگى اتقارىلعان ىستەر تۋرالى, ياعني ۇسىنۋ, تىركەۋ, سايلاۋالدى ۇگىت جانە داۋىس بەرۋ كۇنى جۇرگىزىلەتىن شارالار مەن «سايلاۋ تۋرالى» كونستيتۋتسيالىق زاڭعا 2017-2018 جىلدارى ەنگىزىلگەن وزگەرىستەر تۋرالى ايتىپ بەردى.
جالپى تمد-نىڭ بايقاۋشىلار ميسسياسى قازاقستانداعى سايلاۋدى, ونىڭ ىشىندە قازاقستان رەسپۋبليكاسى پرەزيدەنتىنىڭ سايلاۋىن بايقاۋدا ۇلكەن جۇمىس تاجىريبەسىنە يە ەكەندىگىن اتاپ ءوتكەن ءجون. تمد-دان 700-دەن استام بايقاۋشىلار ميسسياسى قازاقستاندا 2015-2016 جىلدارى وتكەن ەكى سايلاۋ ناۋقانىن بايقاۋعا قاتىسقان بولاتىن. ال «سايلاۋ تۋرالى» كونستيتۋتسيالىق زاڭ قاداعالاۋدىڭ ءتيىستى ءتارتىبىن كوزدەيدى.
تمد اتقارۋ كوميتەتى توراعاسىنىڭ ءبىرىنشى ورىنباسارى ۆ.گۋمينسكي ءوز كەزەگىندە ب.يماشەۆقا كەزدەسۋدى ۇيىمداستىرعانى ءۇشىن العىسىن ءبىلدىردى جانە تمد اتقارۋ كوميتەتى قر وسك-نىڭ سايلاۋدى وتكىزۋگە بايلانىستى بارلىق ءىس-شارالارىن مۇقيات باقىلاعانى تۋرالى حابارلادى. ۆ. گۋمينسكي:
«ءبىزدىڭ كەزدەسۋىمىزدەن كەيىن, ياعني بۇگىنگى كۇننەن باستاپ تمد بايقاۋشىلار ميسسياسى وسىندا جۇمىسىن جالعاستىرىپ, قازاقستان پرەزيدەنتىنىڭ كەزەكتەن تىس سايلاۋىن تولىق كولەمدە بايقاۋعا كىرىسەدى. جالپى, ناقتىراق ايتار بولسام, تمد مەملەكەتتەرى تاراپىنان قازاقستانداعى كەزەكتەن تىس پرەزيدەنتتىك سايلاۋدى بايقاۋ ميسسياسى بۇگىننەن باستالىپ وتىر. وسىعان وراي ميسسيا شتابى قۇرىلىپ, ونى دايارلاۋ, قىزمەتتىك مىندەتتەمەلەرىن ورىنداۋ جۇمىستارىنا كىرىستىك. ميسسيا قازاقستان سىرتقى ىستەر مينيسترلىگىنەن شاقىرتۋ الدى. ال تمد اتقارۋ كوميتەتى ۋكراينادان باسقا دوستاستىققا مۇشە ەلدەردىڭ بارىنە پارلامەنتارالىق اسسامبلەياعا ءتيىستى ۇسىنىس جولدادى. تمد-نىڭ ميسسيا قۇرامىندا 300-گە تارتا بايقاۋشى بولادى دەپ كۇتىلىپ وتىر», – دەدى.
وتكەن جىلى «سايلاۋ تۋرالى» كونستيتۋتسيالىق زاڭعا شەت مەملەكەتتەر مەن حالىقارالىق ۇيىمداردىڭ بايقاۋشىلارىنا اۋدارماشى ىلەسىپ جۇرۋگە قۇقىلى ەكەنى تۋرالى جاڭا نورما دا ەنگىزىلدى. وسىعان بايلانىستى كونستيتۋتسيالىق زاڭنىڭ 20-2-بابىنىڭ 2 جانە 4-تارماقتارىنا سايكەس شەت مەملەكەتتەر مەن حالىقارالىق ۇيىمداردىڭ بايقاۋشىلارى قازاقستان سىرتقى ىستەر مينيسترلىگىنىڭ ۇسىنۋى بويىنشا ورتالىق سايلاۋ كوميسسياسىنىڭ جانىندا اككرەديتتەلىپ, ولارعا وسك بەلگىلەگەن ۇلگىدەگى كۋالىك بەرىلەدى. ال اككرەديتتەۋ داۋىس بەرۋگە بەس كۇن قالعاندا, ياعني 2019 جىلعى 3 ماۋسىمدا جەرگىلىكتى ۋاقىت بويىنشا 18.00-دە اياقتالادى دەپ بەلگىلەنگەنى ءمالىم.