كەشە “نۇر وتان” حالىقتىق-دەموكراتيالىق پارتياسى فراكتسياسى مۇشەلەرىنىڭ رەسپۋبليكالىق فورۋمى ءوتتى. فورۋم جۇمىسىنا “نۇر وتان” حدپ ءتوراعاسىنىڭ ءبىرىنشى ورىنباسارى نۇرلان نىعماتۋلين, پارلامەنت سەناتىنىڭ توراعاسى قاسىم-جومارت توقاەۆ, پارلامەنت ءماجىلىسىنىڭ توراعاسى ورال مۇحامەدجانوۆ, پرەمەر-ءمينيستردىڭ ءبىرىنشى ورىنباسارى ومىرزاق شوكەەۆ, ۇكىمەت مۇشەلەرى, پرەزيدەنت اكىمشىلىگى مەن پرەمەر-مينيستر كەڭسەسىنىڭ وكىلدەرى, پارلامەنت پالاتالارىنىڭ دەپۋتاتتارى, بارلىق دەڭگەيدەگى ماسليحاتتارداعى “نۇر وتان” حدپ فراكتسيالارىنىڭ باسشىلارى مەن حاتشىلارىنان تۇراتىن 600-دەن استام ادام قاتىستى.
حالىق پەن بيلىك اراسىنداعى ءوزارا تۇسىنىستىك پەن مارتەبەلى ءمىندەتتەردى جۇزەگە اسىرۋدا “نۇر وتان” حالىقتىق-دەموكراتيالىق پارتياسىنا جۇكتەلگەن جاۋاپكەرشىلىكتىڭ سالماعى ايتارلىقتاي اۋىر ەكەندىگى بەلگىلى. سوندىقتان دا بولسا كەرەك, پارتيا مۇشەلەرىنىڭ ساياسي بەلسەندىلىكتەرى كۇن سايىن ارتا ءتۇسىپ كەلەدى. ەل حالقى تۇرمىسى مەن ءومىر ءسۇرۋ ساپاسىن مەيلىنشە جاقسارتۋدا پارتيا ۇيىمدارىنىڭ تىكەلەي باسشىلىعى مەن قاداعالاۋ ناتيجەسىندەگى جۇمىستار تياناقتى اتقارىلۋ ءۇستىندە. الايدا, سەنىم مەن ۇدەنىڭ اياسىن كەڭەيتۋگە دە اسا ءمان بەرگەن ءجون.
فورۋمدى جۇرگىزگەن “نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين الدىمەن جۋىردا الماتى وبلىسىنىڭ قىزىلاعاش اۋىلىنداعى بولعان سۋ تاسقىنىنان قازا بولعانداردىڭ تۋىستارى مەن جاقىندارىنىڭ قايعىسىنا ورتاقتاسۋ ءۇشىن ءبىر مينوتتىك ۇنسىزدىك جاريالادى. سودان كەيىن “نۇر وتان” حدپ دەپۋتاتتىق فراكتسياسى مەن ۇكىمەت ءمۇشەلەرى, باسقا دا قاتىسۋشىلار ەلباسى نۇرسۇلتان نازارباەۆتىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” جولداۋىنىڭ جۇزەگە اسىرىلۋ بارىسىن جان-جاقتى تالقىلاۋعا كىرىستى.
فورۋم بارىسىنداعى جاسالعان باياندامالاردىڭ ماڭىزدىلىعىنا توقتالماس بۇرىن, “نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين: “بۇگىنگى كۇنى پرەزيدەنتىمىز نۇرسۇلتان ءابىش ۇلى نازارباەۆ باسقاراتىن “نۇر وتان” حدپ مۇشەلەرىنىڭ سانى 700 مىڭنان اسىپ, قازاقستاننىڭ ءاربىر ازاماتىنىڭ جاعدايىن جاقسارتۋعا, ەڭبەكپەن قامتاماسىز ەتۋگە, ساپالى ءبىلىم مەن مەديتسينالىق كومەك كورسەتۋگە ۇلكەن ۇلەس قوسىپ كەلەدى. وسى جولدا قول جەتكەن جەتىستىكتەرىمىز بارشىلىق. بىراق, ونىمەن توقتاۋعا بولمايدى. الدا اتقارار ىستەر ودان دا كوپ. بۇل جۇمىستاردى ودان ءارى ءتيىمدى جالعاستىرۋدا, ماڭىزدى جوسپارلار مەن جوبالاردى ويداعىداي جۇزەگە اسىرۋدا, اسىرەسە, پارلامەنت پەن جەرگىلىكتى ءماسليحات دەپۋتاتتارىنا, اتقارۋشى ورگان وكىلدەرىنە ارتىلاتىن سەنىم وتە زور”, – دەپ ايماقتىق بارلىق دەڭگەيدەگى دەپۋتاتتارعا جاۋاپتى ءمىندەتتەر تۋراسىندا تاعى دا ەسكەرتىپ ءوتتى. مەملەكەتتىك ورگانداردىڭ حالىقتىق تۇعىرناما مىندەتتەرىن جۇزەگە اسىرۋ جۇمىستارىنىڭ اتقارىلۋى جونىندە دە ءسوز ەتتى. ايماقتاردى دامىتۋدا, بيۋدجەتتەردى بەكىتۋ تۋرالى شەشىمدەردى قابىلداۋدا, كادرلىق ماسەلەلەر مەن جەرگىلىكتى جەرلەردەگى ناقتى جاعدايلار بويىنشا ەل مەن پارتيا قۇرىلىمدارىنىڭ ىقپالىن ارتتىرۋدا ءماسليحاتتار مەن پارتيالىق فراكتسيالاردىڭ ءرولى جوعارى ەكەندىگى دە اتاپ كورسەتىلدى.
فورۋم بارىسىندا پارلامەنت ءماجىلىسىنىڭ توراعاسى, ماجىلىستەگى “نۇر وتان” حدپ فراكتسياسىنىڭ باسشىسى ورال مۇحامەدجانوۆ “نۇر وتان” پارتياسى مەن دەپۋتاتتىق كورپۋس مەملەكەت باسشىسىنىڭ قازاقستان حالقىنا جولداۋىندا ايتىلعان مىندەتتەر مەن ستراتەگيالىق دامۋ جوسپارىنىڭ ورىندالۋىن قاتاڭ باقىلاۋعا الاتىندىعى تۋرالى ايتىپ, پارتيانىڭ وڭىردەگى ءىس-ارەكەتىن سالماقتاندىرا ءتۇسۋ ءۇشىن ونىڭ مۇشەلەرىنىڭ جۇمىسىن ودان ءارى كۇشەيتە ءتۇسۋ كەرەكتىگىن تىلگە تيەك ەتتى.
فورۋم جۇمىسىندا بايانداما جاساعانداردىڭ ءبىرى ەڭبەك جانە حالىقتى الەۋمەتتىك قورعاۋ مينيسترى گۇلشارا ابدىقالىقوۆا بولدى. ونىڭ ايتۋىنا قاراعاندا, بيىل زەينەتاقىنى 25 پايىزعا ارتتىرۋدىڭ ناتيجەسىندە اتالعان الەۋمەتتىك تولەمدەردىڭ تومەنگى مولشەرى 18 مىڭ 325 تەڭگە بولسا, ورتاشا كورسەتكىشى 27 مىڭ 481 تەڭگەگە جەتكەن. “كەلەسى جىلى زەينەتاقىنى 30 پايىزعا ءوسىرۋدىڭ ارقاسىندا وسى سالاداعى كورسەتكىشتەر 2007 جىلمەن سالىستىرعاندا, 2,5 ەسەگە ۇلعايادى. ال ەلىمىزدىڭ قارجىلاي تۇراقتى زەينەتاقى جۇيەسىن قالىپتاستىرۋ اياسىندا زەينەتاقى مولشەرىن بۇرىنعى تابىسقا سايكەستەندىرۋ جۇمىسى جۇرگىزىلەدى”, – دەدى مينيستر. سونىمەن قاتار, ۇلى وتان سوعىسى ارداگەرلەرىنە 65 مىڭ تەڭگەدەن كومەك بەرىلەتىندىگى تۋرالى ناقتىلاي كەلىپ, ۇلى وتان سوعىسىنا قاتىسقانداردىڭ ساناتىنا كىرەتىندەرگە – 25 مىڭ تەڭگە, ەكىنشى رەت نەكەگە تۇرماعان اسكەريلەردىڭ جەسىرلەرىنە – 25 مىڭ تەڭگە, تىل ەڭبەككەرلەرىنە – 10 مىڭ تەڭگە جانە سوعىس مۇگەدەكتەرى مەن ولارعا تەڭەستىرىلگەن ازاماتتاردىڭ جۇبايلارىنا – 25 مىڭ تەڭگە كولەمىندە الەۋمەتتىك كومەك كورسەتىلەتىندىگى مەن بۇل ماقساتتارعا 4,8 ملرد. تەڭگە ءبولىنىپ وتىرعاندىعىن ايتتى.
فورۋم بارىسىندا “نۇر وتان” حدپ قوستاناي, شىعىس قازاقستان, قاراعاندى, جامبىل, الماتى وبلىستىق فيليالدارىنداعى پارتيا وكىلدەرى ءوز وڭىرلەرىندەگى اتقارىلعان ناقتى ءىس-شارالاردىڭ ناتيجەلەرىمەن تانىستىرىپ ءوتتى. پارتيانىڭ الەۋمەتتىك ساياساتىن تولىققاندى جۇزەگە اسىرۋعا, اگروونەركاسىپتىك وندىرىستەردى دامىتۋعا, اۋىلداعىلاردىڭ تۇرمىس دەڭگەيىن كوتەرۋگە, جاستاردى اۋىلدا قالدىرۋعا, ءار ايماقتاردا بىرلىك, تۇراقتىلىق پەن بەيبىتشىلىكتى ساقتاۋعا باسا نازار اۋدارىلاتىندىعىن اتاپ كورسەتتى. سولاردىڭ ىشىندە قوعامدى مودەرنيزاتسيالاۋدى جۇزەگە اسىرۋدا ءار ايماق, ءار ءوڭىر جەكە ءوز باستارىنان باستاۋ كەرەكتىگى تۋرالى, سونىمەن قاتار, دەپۋتاتتاردىڭ ينتەرنەت رەسۋرسىن ءتيىمدى پايدالانۋ ارقىلى اقپاراتتىق تەحنولوگياعا بەيىمدەلۋ كەرەكتىگى ءجونىندەگى وڭ پىكىرلەر ورتاعا سالىندى.
فورۋم سوڭىندا قاتىسۋشىلار قازاقستان ازاماتتارىنا “ەكونوميكانىڭ شيكىزاتتىق, ەكستەنسيۆتى, تەحنيكالىق ارتتا قالۋ سيپاتىن باتىل ەڭسەرىپ شىعۋى ءۇشىن بۇكىل قوعامنىڭ, ءاربىر ازاماتتىڭ كۇش-جىگەرىن بىرىكتىرۋ قاجەت دەگەن توقتامعا كەلدى. ەكونوميكانىڭ ناقتى ءارى جەدەل ءارتاراپتاندىرىلۋى مەن ونىڭ يننوۆاتسيالىق-تەحنولوگيالىق جاڭعىرۋى – ءبىزدىڭ باستى ماقساتىمىز بولۋعا ءتيىس” اتتى ءۇندەۋ جاريالادى. بۇل ۇندەۋ بارلىق قازاقستاندىقتاردى ەلىمىزدىڭ 2020 جىلعا دەيىنگى ستراتەگيالىق دامۋ جوسپارىن جۇزەگە اسىرۋ ۇدەرىسىنە بەلسەنە قاتىسۋعا شاقىرادى.
اراي ۇيرەنىشبەكقىزى.