كەشە ەلباسى ن.نازارباەۆتىڭ تاپسىرۋى بويىنشا الماتى وبلىسىنىڭ اقسۋ اۋدانىندا ورىن العان توتەنشە جاعدايلاردىڭ زارداپتارىن جويۋ جونىندەگى كوميسسيا قۇرىلدى, دەپ حابارلادى پرەمەر-ءمينيستردىڭ ءباسپاسوز قىزمەتى.
توتەنشە جاعدايلار ءمينيسترى ۆ.بوجكو باسشىلىق ەتەتىن كوميسسيا قۇرامىنا دەنساۋلىق ساقتاۋ ءمينيسترى ج.دوسقاليەۆ, قۇرىلىس ىستەرى جانە تۇرعىن ءۇي-كوممۋنالدىق شارۋاشىلىق اگەنتتىگىنىڭ توراعاسى س.نوكين, كولىك جانە كوممۋنيكاتسيالار, ەڭبەك جانە حالىقتى الەۋمەتتىك قورعاۋ, اۋىل شارۋاشىلىعى, ءبىلىم جانە عىلىم, سونداي-اق ىشكى ىستەر مينيسترلىكتەرىنىڭ وكىلدەرى كىردى.
تاۋلىكتىڭ ەكىنشى جارتىسىندا پرەمەر-مينيستر مەن ۇكىمەتتىك كوميسسيا تولىق قۇرامىندا تالدىقورعان قالاسىنا كەلىپ, وقيعا بولعان قىزىلاعاش اۋىلىنا باعىت الدى. سول جەردە قالىپتاسقان جاعدايمەن جانە سۋ تاسقىنى سالدارىن جويۋ جونىندەگى جەدەل شتابتىڭ جۇمىسىمەن تانىسىپ, توتەنشە جاعدايدان زارداپ شەككەندەرگە كومەك كورسەتۋ بارىسىن كوردى.
تجم دەرەكتەرى بويىنشا, 11 ناۋرىز كۇنگى 22 ساعات 20 مينوتتە نوسەر جاڭبىردىڭ جانە اۋا رايىنىڭ كۇرت جىلىنۋىنىڭ سالدارىنان قىزىلاعاش سۋ قويماسىنىڭ پلوتيناسىن تاسقىن سۋ بۇزىپ كەتكەن. سونىڭ سالدارىنان قىزىلاعاش اۋىلى توپان سۋدىڭ استىندا قالعان. قاۋىپتى ايماقتا تۇرىپ جاتقان ادامدار الدىن الا قۇلاعدار ەتىلىپ, تۇرعىنداردى وبلىس ورتالىعىنا جەتكىزۋ ۇيىمداستىرىلعان.
قازىرگى كەزدە لاگەر قۇرىلىپ, ءتىرشىلىككە قاجەتتى جۇيەلەر اكەلىنگەن. بۇل جۇمىستارعا اسكەر مەن ءورت ءسوندىرۋ, ىشكى ىستەر, “قازسەلدەنقورعاۋ”, ت.ب. قۇرىلىمدار كۇشتەرى تارتىلىپ, تىكۇشاقتار, ارنايى تەحنيكالار مەن قۇرال-جابدىقتار جەتكىزىلگەن.
سودان كەيىن پرەمەر-مينيستر كوشىرىلگەن تۇرعىندار ۋاقىتشا ورنالاسقان جەردە بولىپ, ولاردىڭ تۇرىپ جاتقان جاعدايلارىمەن تانىستى. ك.ءماسىموۆ ادامداردىڭ قازاسىنا وراي ءوز كوڭىلىن ءبىلدىرىپ, زارداپ شەككەن جاندارعا جان-جاقتى كومەك كورسەتىلەتىنىن قاداپ ايتتى.
پرەمەر-مينيستر سونداي-اق جەدەل شتابتىڭ ءماجىلىسىن وتكىزىپ, وندا مەملەكەت باسشىسىنىڭ اتالعان وقيعانىڭ سالدارىن جويۋ جانە وزگە وڭىرلەردە توتەنشە جاعدايلاردىڭ تۋىنداۋىنا جول بەرمەۋ جونىندەگى ناقتى تاپسىرماسىن جاريا ەتتى.
سونىمەن قاتار, ك.ءماسىموۆ دەنساۋلىق ساقتاۋ مينيسترىنە تۇرعىندارعا العاشقى كومەك كورسەتۋ جونىندە شارالار قابىلداۋدى تاپسىردى. “ولاردىڭ جاعدايىن ءتۇسىنۋ كەرەك: تۇرعىندار ءبىر ساتتە باسپاناسىز, اقشاسىز جانە قۇجاتسىز قالدى. اراسىندا كوپتەگەن ورالماندار بار. بارلىعىنا قاجەتتى كومەك كورسەتىلۋى ءتيىس”, – دەدى ول. پرەمەر-مينيستر سونداي-اق تۋىستارى مەن جاقىندارىن جوعالتقان وتباسىلارىنا كومەك كورسەتۋدى دە تاپسىردى.
سونىمەن ءبىر مەزگىلدە, ك.ءماسىموۆ سۋ باسقان ايماقتان كوشىرىلگەن بالالاردىڭ وقۋ ۇدەرىسى ۇزىلمەۋى قاجەتتىگىن اتاپ كورسەتتى.
توتەنشە جاعدايدىڭ سالدارىن جويۋ جونىندەگى شارالار شەڭبەرىندە قارجى مينيسترلىگىنە قىسقا مەرزىمدە قاجەتتى قارجى ءبولىپ, ونىڭ دىتتەگەن جەرىنە جەتۋى كەرەكتىگى دە قاتاڭ تاپسىرىلدى.
سونداي-اق پرەمەر-مينيستر قۇرىلىس ىستەرى جانە تۇرعىن ءۇي-كوممۋنالدىق شارۋاشىلىق اگەنتتىگىنە, سونىمەن قاتار, بارلىق وبلىستار مەن استانا جانە الماتى قالالارىنىڭ اكىمدەرىنە توتەنشە جاعدايدان زارداپ شەككەن ۇيلەردى قالپىنا كەلتىرۋگە جانە سالۋعا كومەك كورسەتۋ كەرەكتىگىن تاپسىردى.
ك.ءماسىموۆ وسى رەتتە ۆ.بوجكو مەن الماتى وبلىسىنىڭ اكىمى س.ۇمبەتوۆكە زارداپتاردى جويۋ بويىنشا ءىس-قيمىل جوسپارىن جاساپ, ۇكىمەتتىڭ بەكىتۋىنە ۇسىنۋدى تاپسىردى. سونداي-اق توتەنشە جاعدايدىڭ ورىن الۋ سەبەپتەرىن تەكسەرۋ قاجەتتىگىن ايتتى.
جەدەل شتاب ءماجىلىسىنىڭ قورىتىندىسىندا پرەمەر-مينيستر ۆ.بوجكوعا وبلىس اكىمدىكتەرى جانە سۋ رەسۋرستارى جونىندەگى كوميتەت وكىلدەرىمەن بىرلەسىپ, الماتى جانە شىعىس قازاقستان وبلىستارىنداعى, سونداي-اق بۇكىل ەل اۋماعىنداعى ىقتيمال قاۋىپتى اۋماقتاردى قاتاڭ باقىلاۋعا الۋدى تاپسىردى.