سارسەنبى, 9 مامىر 2012 7:24
سوعىس – ادام بالاسىنىڭ باسىنا تۇسەتىن ەڭ اۋىر قاسىرەت. بۇگىنگى ۇرپاق سول قاسىرەتتى كورمەي-اق وسسە ەكەن, ونى بولدىرماۋ ءۇشىن ەگەمەن ەلىنىڭ ىرگەسىن نىعايتاتىنداي قاجىرلى ەڭبەك ەتسە ەكەن دەيمىز… ءيا, كەشەگى ۇلى وتان سوعىسىندا ءبىز ۇلى جەڭىسكە جەتتىك, سول جەڭىستىڭ بۇگىن جەمىسىن كورىپ جاتىرمىز. سول جەڭىستىڭ بىزگە قالاي كەلگەنىن, قانداي قيىندىقپەن كەلگەنىن كەلەر ۇرپاققا تاربيە بولسىن دەپ اڭگىمە ەتىپ ءوز اۋزىمەن ايتىپ بەرەتىن, سول قىرعىندى باسىنان وتكەرگەن ارداگەر-قاريالار بۇگىن جوقتىڭ قاسى, ازايدى. سول سوعىس ءورتىنىڭ ناعىز وتىندە بولىپ, وتتى جىلداردىڭ كۋاسى بولعان, بەرلينگە دەيىن بارىپ جەڭىس تۋىن تىگىپ, جاۋدى جەڭىپ كەلگەن بەكتاي ءابساتتاروۆ اعامىزبەن بىرگە بولعان ساتتەرىم ەسىمە ءتۇسىپ, ءبىر ۇزىك اڭگىمە ايتقىم كەلىپ وتىر…
سارسەنبى, 9 مامىر 2012 7:24
سوعىس – ادام بالاسىنىڭ باسىنا تۇسەتىن ەڭ اۋىر قاسىرەت. بۇگىنگى ۇرپاق سول قاسىرەتتى كورمەي-اق وسسە ەكەن, ونى بولدىرماۋ ءۇشىن ەگەمەن ەلىنىڭ ىرگەسىن نىعايتاتىنداي قاجىرلى ەڭبەك ەتسە ەكەن دەيمىز… ءيا, كەشەگى ۇلى وتان سوعىسىندا ءبىز ۇلى جەڭىسكە جەتتىك, سول جەڭىستىڭ بۇگىن جەمىسىن كورىپ جاتىرمىز. سول جەڭىستىڭ بىزگە قالاي كەلگەنىن, قانداي قيىندىقپەن كەلگەنىن كەلەر ۇرپاققا تاربيە بولسىن دەپ اڭگىمە ەتىپ ءوز اۋزىمەن ايتىپ بەرەتىن, سول قىرعىندى باسىنان وتكەرگەن ارداگەر-قاريالار بۇگىن جوقتىڭ قاسى, ازايدى. سول سوعىس ءورتىنىڭ ناعىز وتىندە بولىپ, وتتى جىلداردىڭ كۋاسى بولعان, بەرلينگە دەيىن بارىپ جەڭىس تۋىن تىگىپ, جاۋدى جەڭىپ كەلگەن بەكتاي ءابساتتاروۆ اعامىزبەن بىرگە بولعان ساتتەرىم ەسىمە ءتۇسىپ, ءبىر ۇزىك اڭگىمە ايتقىم كەلىپ وتىر…
كەڭەس وكىمەتىنىڭ السىرەپ, م.س.گورباچەۆ ءجۇرگىزىپ جاتقان ەلدىڭ ەكونوميكاسىن قايتا قۇرۋ كەزەڭى جىلدارى. مەن كەڭەستەر وداعى كوممۋنيستىك پارتياسىنىڭ جەزقازعان وبلىستىق كوميتەتىنىڭ ءبىرىنشى حاتشىسى ە.گ. ەجيكوۆ-باباحانوۆتىڭ شەشىمىمەن جەزقازعان قالالىق پارتيا كوميتەتىنىڭ ءبىرىنشى حاتشىسى – قالالىق اتقارۋ كوميتەتىنىڭ توراعاسى قىزمەتىنە تاعايىندالدىم. مۇنداي جاۋاپكەرشىلىگى جوعارى قىزمەتتى مەن بۇرىن-سوڭدى اتقارىپ كورگەن ەمەسپىن, نەدەن باستاۋ كەرەك دەگەن تەرەڭ وي ءبىرىنشى كۇننەن-اق مازالاي باستادى. كوممۋنيستىك پارتيانىڭ ەل الدىنداعى بەدەلى قۇلدىراي باستاعان كەز. قانشاما حالقى بار ۇلكەن قالانىڭ تىرشىلىك-تىنىسىنا جاۋاپتى بولۋ, ارينە, وڭاي شارۋا ەمەس. سەنىم ارتىپ تاپسىرعان مىندەتتى ابىرويمەن اتقارۋ كەرەك. قالانىڭ الەۋمەتتىك-ەكونوميكالىق حال-احۋالى دا ءماز ەمەس…
ءبىر كۇنى تاڭەرتەڭ كۇندەلىكتى كەلەتىن رەسمي پوشتانى قاراپ وتىرسام, كوزىمە «ماسكەۋدەن, كرەملدەن» دەگەن سىرتىندا ءمور باسىلعان, ادەتتە ورتالىق ۇكىمەت تاراپىنان عانا كەلەتىن ءبىر ۇلكەن كونۆەرت كوزىمە ءتۇستى. كىمگە ءجىبەرىلگەن ەكەن دەپ قاراسام, «ابساتتاروۆۋ ب.ا.» دەگەن جازۋى بار. بۇل ازاماتتاردىڭ ءوتىنىشى بويىنشا كەلگەن جاۋاپ حات بولسا, نەگە قالالىق پارتيا كوميتەتىنە تۇسەدى دەگەن سۇراق تۋدى. مۇنداي جاعدايدا ءىشىن اشىپ وقۋعا قۇقىمىز بار, حاتتى الىپ وقي باستادىم. حات كەڭەستەر وداعى جوعارعى كەڭەسى پرەزيديۋمىنىڭ توراعاسى ا.ا. گرومىكودان كەلىپتى. حاتتان تۇسىنگەنىم, م.س. گورباچەۆ پارتيانىڭ بەدەلىن قالاي جوعارى دەڭگەيگە كوتەرەمىز دەپ كەزىندە كەڭەستەر وداعىنىڭ بارلىق پارتيا ارداگەرلەرىنە ءباسپاسوز ارقىلى ۇندەۋ جاريالاپ سۇراۋ جولداعان ەدى. پارتيانىڭ سول ۇندەۋىنە ءبىزدىڭ بەكتاي اعامىز ءوزىنىڭ پىكىرىن ايتىپ, ۇسىنىستارىن جىبەرسە كەرەك. بۇل حات بەكتاي اعامىزدىڭ ۇسىنىستارىنا ريزاشىلىق ءبىلدىرىپ جازىلعان العىس حات ەكەن. ءبىر قىزىعى – ماسكەۋگە جىبەرگەن حاتقا بەكەڭ ءوز ءۇيىنىڭ ادرەسىن جازباپتى.
ماعان ءبىر قىزىق وي كەلدى. دالادان ىزدەگەنىم الدىمنان ءوزى شىقتى ەمەس پە, بۇل ءبىر جاقسى ىرىم ەكەن دەپ جورىدىم. «قالا باسشىسى رەتىندە العاشقى قادامىن وسى كىسىمەن اقىلداسىپ, وسى كىسىنىڭ باتاسىن الىپ باستاسىن» دەگەن اللانىڭ ءوزىنىڭ قيسىنىن كەلتىرىپ جىبەرگەن ءناسىبى شىعار دەگەن وي كەلدى. بەكەڭ بۇل حاتتى, ارينە, العان جوق. وسى حاتتى سىلتاۋ قىلىپ قالامىزدىڭ ارداقتى اقساقالىنا بارىپ سالەم بەرىپ كەلەيىن دەپ ويىمدى ءتۇيدىم.
بۇرىن ءار قالادا تۇرىپ, قاتتى ارالاسا الماساق تا بۇل اعامىزدىڭ سوعىس جانە ەڭبەك ارداگەرى بولىپ ەلىنە سىڭىرگەن ەڭبەگىنە, قالا ءتوڭىرەگىندە بەلسەندى اقساقالداردىڭ ءبىرى بولىپ قالانىڭ قوعامدىق ومىرىنە ارالاسىپ جۇرگەن ىستەرىنە سىرتتاي قانىق ەدىم. بۇل كىسىنىڭ ءۇيىنىڭ ادرەسىن دە بىلمەيمىن. ويلانىپ وتىرىپ تولەگەن بۇكىروۆ دوسىما تەلەفون سوقتىم. «بەكتاي اعامىز سەنىڭ كورشىڭ ەكەن عوي, مەنى ەرتىپ الىپ بار, ەكەۋمىز بىرگە بارىپ سالەم بەرىپ شىعايىق», دەدىم. ول: «جارايدى, بارىپ شىعايىق», دەدى.
ءسويتىپ, ەرتەڭىنە كەشكى ساعات بەستەردىڭ شاماسىندا بەكەڭنىڭ ۇيىنە كەلدىك. جازدىڭ كولەڭكەسى قوڭىرجاي, كۇننىڭ كوزى قاتتى ىسىعان جايلى كۇندەرىنىڭ ءبىرى ەدى. اعامىز رىباچي اۋىلىنىڭ تايجان كوشەسىندەگى جەر ۇيدە تۇرادى ەكەن. الدىمىزدان «تورگە شىعىڭىزدار» دەپ گۇلسىم كەلىنى ك ۇلىمسىرەپ قارسى الدى, تورگە شىعارىپ بىزدەرگە كورپە جايىپ جاتىر. ءبىر ۋاقىتتا ءبىز وتىرعان بولمەگە بەكەڭ كىرىپ كەلدى, ورنىمىزدان تۇرىپ بارىپ اعامىزدىڭ قولىن الدىق. اعامىزدى ءبىرىنشى كورگەنىم. قان مايداندا ەلدى جاۋدان قورعاۋعا قاسىق قانى قالعانشا بەلى قايىسپاي قارسى تۇرعان باتىر اعامىزدىڭ كەلبەتىنىڭ ءبىر كورگەننەن-اق كەلىستى ەكەنىن اڭعارۋعا بولادى. ورتا بويلى, كەڭ ماڭدايلى, جاسى جەتپىستى ماڭايلاپ قالعان كىسى ەكەن. سوناۋ ءبىر سۇراپىل جىلداردىڭ تەرەڭ سىرلارى جاتقانداي قاباعى قاتىڭقى ەكەن, ءبىر كورگەننەن ءتىل تابىسىپ اڭگىمەگە تارتۋ وڭاي ەمەس ەكەنىن سەزىپ, تولەگەندى بىرگە ەرتىپ كەلگەنىمە قاتتى قۋاندىم. ءيا, بۇل دا ءبىر كەشەگى سۇراپىل سوعىستىڭ اعامىزدىڭ بولمىسى مەن جان دۇنيەسىنە تەرەڭنەن ءىزىن سالىپ قالدىرعان تاڭباسى شىعار دەپ ۇقتىم…
ءبىرشاما ۋاقىت ءوتكەننەن كەيىن: «ءيا, ءىنىلەرىم, قوش كەلدىڭدەر! تولەگەن, ءۇي-ىشتەرىڭ امان با, قايدان ءجۇرسىڭدەر؟» دەپ بەكەڭ ءۇي يەسى رەتىندە ءوزى ءسوز باستادى. سول-اق ەكەن, ءتولەگەن مەنى تانىستىرا باستادى. «مىنا جىگىت ەرتەدە رۋدنيك پوسەلكەسىندە تۇرعان, جۇمانازار دەگەن كىسىنىڭ بالاسى, قالامىزدىڭ كەشە عانا جاڭادان تاعايىندالعان باسشىسى, ءبىز سىزگە ءسالەم بەرەيىك دەپ ارنايى اتباسىن بۇرىپ كەلىپ وتىرمىز», دەدى. بەكەڭ سوندا باسىن كوتەرىپ الىپ: «ە-ە, ءوزىمنىڭ ءىنىم ەكەنسىڭ عوي, ناعىز تۋىسىم بولىپ شىقتىڭ عوي, مايگەلدىنىڭ بەس بالاسىنىڭ بىرەۋى سەن بولساڭ, ەكىنشىسى مەن بولامىن», دەپ قاباعى اشىلىپ, كوڭىلى جادىراپ سالا بەردى.
ءارى قاراي اڭگىمەنى مەن جالعاستىردىم. «اعا, مەن سىزگە ەكى بىردەي ماڭىزدى شارۋانىڭ باسىن قوسىپ كەلىپ وتىرمىن. بىرىنشىدەن, جەزقازعان قالالىق پارتيا كوميتەتىنىڭ اتىنان, قالا كوممۋنيستەرىنىڭ اتىنان سىزگە ۇلكەن العىس ايتۋ ءۇشىن كەلدىم. ءCىزدى كوممۋنيستىك پارتيانىڭ ناعىز بەلسەندى جاناشىرى رەتىندە ماسكەۋدەگى پارتيا باسشىلارى دا بىلەدى ەكەن. پارتيانىڭ كەلەشەگى تۋرالى پىكىر-ۇسىنىستار بەرگەنىڭىز ءۇشىن ولار دا سىزگە كوپ راحمەتىن ايتىپ جاتىر. مىنا حاتتى جىبەرگەن ۇسىنىستارىڭىزعا جاۋاپ رەتىندە سىزگە ارناپ اندرەي گرومىكونىڭ ءوزى جازىپتى. وسىنى تابىس ەتكەلى كەلىپ وتىرمىن, ماسكەۋدەگى باسشىلارعا جەزقازعان شاھارىنىڭ اتىن شىعارىپ, ەستەرىنە تاعى ءبىر رەت سالعانىڭىز ءۇشىن كوپ-كوپ راحمەت. ءسىزدىڭ مۇنداي قادامىڭىز, ماسكەۋدەن العان العىسىڭىز ءبىزدىڭ قالا تۇرعىندارى ءۇشىن دە ۇلكەن ابىروي. ەكىنشى ءبىر ماڭىزدى شارۋام, سىزگە وبلىستىق ارداگەرلەر كەڭەسىنىڭ توراعاسى رەتىندە اقىل-كەڭەس سۇرايىن دەپ كەلدىم, باتا-تىلەكتەرىڭىزدى ءوز اۋزىڭىزدان ەستىپ, اقساقالدى اعالارىمىزدىڭ اماناتتارىن ءوز ەركىممەن ارقاما سالىپ مىندەتىمە الايىن دەپ كەلدىم. پارتيا مەن ۇكىمەتىمىز مەنى جاڭا قىزمەتكە تاعايىنداپ, ماعان سەنىم ارتىپ, الدىما كوپتەگەن مىندەتتەر قويىپ وتىر. بۇل مىندەتتەردى ابىرويمەن اتقارا الۋىم ەڭ الدىمەن اۋىل اعالارىنىڭ بەرەتىن اقىل-كەڭەستەرىنە, قالا تۇرعىندارىنىڭ مۇقتاج شارۋالارىنا كومەك بەرە الۋىما تىعىز بايلانىستى ەكەنىن وزدەرىڭىز دە جاقسى بىلەسىزدەر. سوندىقتان دا, اعا, ءسىزدىڭ اڭگىمەلەرىڭىزدى تىڭداۋعا بۇگىن دە جانە قاشان بولسا دا ءازىرمىن», دەپ اعىمنان جارىلدىم.
«مەنىڭ كوممۋنيستىك پارتيا قاتارىندا ءجۇرگەنىمە باقانداي ەلۋ جىل بولىپتى, پارتياعا سول اسكەر قاتارىندا فاشيستەرمەن سوعىسىپ جۇرگەن كەزىمدە 1945 جىلى بەرلين قالاسىندا قابىلداندىم. مىنە, سودان بەرى پارتيامەن ءبىر انادان تۋعانداي بىرگە ءومىر ءسۇرىپ كەلەمىن. سوڭعى كەزدە پارتيانىڭ بەدەلى ءتۇسىپ بارا جاتقانى مەنىڭ دە جانىما قاتتى باتىپ ءجۇردى, سول ىشتەگى مازالاپ جۇرگەن ويلارىمدى ايتىپ م.س.گورباچەۆتىڭ اتىنا حات جازعان ەدىم. بۇدان بىلاي قاراي پارتيامىزدىڭ اتى «لەنينسكايا پارتيا بولسىن» دەپ ۇسىنىس بەردىم. ونداعى ويىم لەنيننىڭ اتى مەن ونىڭ ىلىمدەرىنىڭ قوعامداعى بەدەلى ءالى دە بولسا تۇسە قويعان جوق ەدى… بۇگىن مەن ون بالانىڭ اكەسىمىن, جۇبايىم كۇلجامالدىڭ كوز جۇمعانىنا كوپ بولعان جوق, جالعىزدىققا ءالى دە بولسا بويىم ۇيرەنەتىن ەمەس, كوڭىلىم ءبىر مەزگىل ءبولىنسىن دەپ قالانىڭ دا, وبلىستىڭ دا قوعامدىق ءىس-شارالارىنان قالماۋعا تىرىسامىن, قولىمنان كەلسە, كومەگىمدى دە بەرىپ جاتامىن…» بەكەڭنىڭ اڭگىمەسى تاۋسىلاتىن ەمەس. تەرەزەگە قاراسام, دالاعا قاراڭعى ءتۇسىپ كەتىپتى. ءبىزدىڭ تىقىرشي باستاعانىمىزدى سەزدى مە, ايتەۋىر, ءبىر ۋاقىتتا اعامىز: «ال, ىنىلەرىم, ۋاقىتتارىڭ بولىپ قالدى-اۋ دەيمىن, ءبىلىپ وتىرمىن, جورتقاندا جولدارىڭ بولسىن, ءۇيدىڭ ەسىگى سەندەر ءۇشىن قاشاندا اشىق. ال, مۇقامبەت, اينالايىن, ەلدىڭ ابىرويىن ەڭ اۋىر كەزەڭدە الىپ جۇرۋگە وزىڭە اللا ءناسىپ ەتىپتى, بىلەمىن قيىن بولاتىنىن. سەن ەندى ءبىر ەلدىڭ عانا بالاسى ەمەسسىڭ, بار ەلدىڭ داناسىسىڭ, كوپ قولدىڭ اعاسىسىڭ, اقتى اق دەپ باعالايتىن, قارانى قارا دەپ قارالايتىن كەزدەرىڭ كوپ بولادى. باسىڭا ءىس تۇسسە, كوپشىلىكتى ساعالاساڭ ارقاشان قيىندىقتاردى جەڭىپ شىعاسىڭ. ەندى ءاربىر ىسىڭە كامىل بول, حالقىڭا ءادىل بول, اللا تاعالا قاشان بولسا دا جولىڭدى اشىق قىلۋعا, ابىرويىڭنىڭ بيىك بولۋىنا ءناسىپ ەتسىن, ءامين!» دەپ باتاسىن بەردى.
ودان كەيىن بەكتاي اعامىزبەن قالانىڭ قوعامدىق ءىس-شارالارىندا ءجيى كەزدەسىپ تۇردىق. جەزقازعان وبلىستىق ارداگەرلەر كەڭەسىنىڭ توراعاسى رەتىندە قالانىڭ ىسكە اسىراتىن كوپتەگەن ءىس-شارالارى مەن باستامالارىنا قولداۋ كورسەتىپ ءجۇردى. اڭگىمەلەسىپ, كەلەلى ماسەلەلەرگە قاتىستى كەڭەسۋ ءۇشىن سوعىس جانە ەڭبەك ارداگەرلەرىنىڭ باستارىن ءجيى قوساتىن ەدىم, كەزدەسۋلەرىمىز داستارقان باسىندا جالعاسىن تاۋىپ جاتاتىن. سونداي ءبىر جەڭىس كۇنىندە جايىلعان داستارقان باسىندا بەكەڭنىڭ كوتەرىڭكى كوڭىلىن پايدالانىپ, سوعىسقا قاتىسقان ساتتەرىنەن كوپشىلىككە اڭگىمە ايتىپ بەرۋىن ءوتىنگەن ەدىك. بەكەڭ اڭگىمە ايتۋعا ساراڭداۋ كىسى بولاتىن, سوندا دا بولسا, ايتەۋىر, سول كۇن اعامىزدىڭ كوڭىل پەرنەسىنىڭ ءبىر اعىتىلعان كۇنى بولدى, قاباعىن كەرىپ تەرەڭ ءبىر كۇرسىندى دە, اڭگىمەسىن ايتۋعا كىرىسىپ كەتتى…
…بەكەڭ 1942 جىلدىڭ 17 ماۋسىمىندا ءوز ەركىمەن مايدانعا اتتانادى. بىراق, ونى بىردەن قان مايدانعا كىرگىزبەيدى, جاۋىنگەرلەردىڭ اسكەري وقۋ-جاتتىعۋلارى دايىندىقتارى ءوتىپ جاتقان توتسك سەلوسىندا ورنالاسقان 11-ءشى زاپاستاعى اتقىشتار بريگاداسىنا جىبەرەدى. سول جەردە ول حيميالىق بارلاۋشىلار كۋرسىن بىتىرەدى. اسكەري دايىندىقتارى اياقتالعاننان كەيىن جولداستارىمەن بىرگە سولتۇستىك-باتىس مايدانىندا سوعىسىپ جاتقان 353-ءشى جەكە پۋلەمەتتى-ارتيللەريالىق باتالوننىڭ قۇرامىنا كەلىپ كىرەدى. بۇل جەردە ول رەسەي جەرلەرىن گيتلەرشىلەردەن ازات ەتۋدەگى كەسكىلەسكەن ۇرىستارعا قاتىسادى.
اتىشۋلى كۋرسك يىنىندەگى ۇرىسقا قاتىسىپ, سوعىستىڭ ناعىز قىزعان بەل ورتاسىندا بولادى. ۋكراينا جەرلەرىن, جيتومير, كوزياتينا قالالارىن, پولشانىڭ ۆارشاۆا, پوزنان, گدانسك, گدىنيا قالالارىن باسقىنشىلاردان ازات ەتۋگە جانە اتاقتى ساندومير پلاتسدارمىن شابۋىلمەن الۋداعى كەسكىلەسكەن شايقاسقا قاتىسادى. اۋىر جارالانىپ, ءولىم مەن ءومىر ارپالىسقان ساتتەردى دە باستان وتكەرەدى…
ساندومير پلاتسدارمىن العانى ءۇشىن 69-شى گۆارديالىق تانكيستەر پولكىنە ساندومير پولكى اتاعى بەرىلەدى. ول ءوز تانكىسىمەن دنەستر, سان, ۆيسلا, بۋگ جانە ودەر وزەندەرىن شايقاسپەن جاۋىنشا جاۋىپ, قارشا بوراعان وقتىڭ استىمەن كوپىرسىز ءجۇزىپ-كەسىپ وتكەن ۇرىستارعا قاتىسادى. گەرمانيانىڭ قالالارىن شابۋىلمەن العان قاندى ۇرىستاردا, نەمىستىڭ استاناسى بەرليندى شابۋىلداعان ۇرىستا ەرلىكپەن شايقاسادى. 1945 جىلدىڭ ءساۋىر ايىندا كەڭەستەر وداعى كوممۋنيستىك پارتياسىنىڭ قاتارىنا قابىلدانادى. بەرليننىڭ ءاربىر شارشى مەترى ءۇشىن تار كوشەلەرىندە بولعان كەسكىلەسكەن شايقاستاردا, بەكتايدىڭ تانكىسىنىڭ ەكيپاجى جاياۋ اسكەرلەرمەن قويان-قولتىق بىرىگىپ اۆتوماتپەن, گراناتالارمەن قارۋلانىپ, كوپ قاباتتى ۇيلەردىڭ تاسالارىندا جاسىرىنىپ, تانكىلەردى فاۋستپاترونمەن اتىپ شىداتپاعان نەمىس سولداتتارىنىڭ ىزىنە ءتۇسىپ جاياۋ اكەرلەرشە سوعىسادى…. وسىنداي سوڭعى شەشۋشى شايقاستىڭ قاندى قىرعىنىن باسىنان وتكىزگەن بەكتاي جاۋدىڭ باس ورداسى بەرلينگە جەڭىس تۋىن تىگۋگە ۇلەسىن قوسىپ ەرلىگىمەن كوزگە تۇسەدى. سوعىس بىتكەننەن سوڭ دا گەرمانيانى وككۋپاتسيالاعان پولكتىڭ قۇرامىندا جەتى اي اسكەري قىزمەت اتقارادى. ۇرىس-شايقاستاردا ءۇش رەت اۋىر جاراقات العان جاۋىنگەر رەتىندە 1946 جىلدىڭ 16 ناۋرىزىندا اسكەر قاتارىنان بوساتىلىپ, ەلگە ورالادى.
وتانىن جاۋدان قورعاعان شايقاستاردا ءتورت رەت قاتتى جارالانادى جانە كونتۋزيا الادى. سوعىستا كورسەتكەن ەرلىگى مەن باتىرلىعى ءۇشىن ول 5 وردەنمەن: I جانە II دارەجەلى «وتان سوعىسى» وردەندەرىمەن, ەكى «قىزىل جۇلدىز» وردەندەرىمەن, III دارەجەلى «داڭق» وردەنىمەن جانە 15-تەن اسا مەدالدارمەن, جوعارعى باس قولباسشىنىڭ جانە گەرمانيانى وككۋپاتسيالاعان ءاسكەر قولباسشىسىنىڭ العىستارىمەن, ارميا قولباسشىسىنىڭ گراموتالارىمەن ماراپاتتالادى…
سوعىستان كەيىن امان-ەسەن ەلىنە ورالعان بەكەڭ ۇلكەن ءبىر اۋلەتتىڭ ۇيىتقىسى بولدى, كۇلجامال جەڭگەمىز ەكەۋى ون بالا تاربيەلەپ ءوسىردى. بالالارىنىڭ بارىنە جوعارى ءبىلىم الۋىنا كوپ ەڭبەك ءسىڭىردى, ۇلىن ۇياعا, قىزىن قياعا قوندىرىپ, ولاردىڭ قىزىعىن دا كورىپ ۇلگەردى. ءبۇگىندە بالالارىنىڭ – ەكەۋى عىلىم كانديداتى, ينجەنەر, اگرونوم, ەكونوميست, ءدارىگەر ماماندىقتارىنىڭ يەلەرى بولىپ ۇلگىلى وتباسىلاردىڭ قاتارىندا استانادا, جەزقازعاندا جانە الماتىدا مەملەكەتتىك قىزمەت, قۇرىلىس, اۋىل شارۋاشىلىعى, تاۋ-كەن, دەنساۋلىق ساقتاۋ, بايلانىس, قارجى سالالارىندا ەلىنە ەلەۋلى ەڭبەك ەتىپ جاتىر. بۇگىندە بەكتاي اعامىزدىڭ ورتامىزدان باسقا دۇنيەگە كوشكەنىنە ون جىل بولىپتى. جىل سايىن بەكەڭدى «ومىردەگى جاۋاپتى قادامدارىمدى باستاعان كەزدە اق تىلەك باتاسىن بەرگەن اعامىز ەدى» دەپ ءاربىر جەڭىس كۇنىندە ەرەكشە سۇيىسپەنشىلىكپەن ەسىمە الىپ وتىرامىن…
مۇقامبەت كوپەەۆ, مەملەكەت جانە قوعام قايراتكەرى.
استانا.