“قىز جىبەك” بايقاۋى ءوتتى

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە “قىز جىبەك” ارۋلار بايقاۋى ءوتتى. بايقاۋ الدىندا ۋنيۆەرسيتەت رەكتورى باقىتجان ءابدىرايىم “ارداقتى انا” بايقاۋىنىڭ جە­ڭىم­پازدارىنا باعالى سىي­لىق­تار تاپسىردى. ال قىزىقتى وتكەن “قىز جىبەك” سايىسىندا قىزدار وزدەرىن تانىستىرۋ, سۇراق-جاۋاپ, ءورىستى ونەر, ۇلتتىق كيىم ۇلگىلەرى بو­يىنشا باسەكەگە ءتۇستى. 14 قىز­دىڭ اراسىنان ۇلتتىق قۇن­دى­لىق­تارىمىزدى قايتا جاڭعىرتىپ, ءتىل مەن ءدىلدىڭ جاقسى ۇلگىلەرىن كور­سەتكەن فيلولوگيا فاكۋلتەتىنىڭ ءبى­رىنشى كۋرس ستۋدەنتى ايىم مەي­راموۆا باس جۇلدەنى السا, ءبىرىنشى دارەجەلى ديپلومدى جارا­تى­لىس­تانۋ عىلىمدارى فاكۋلتەتىنىڭ ءتورتىنشى كۋرس ستۋدەنتى گۇلجاينار كەرەەۆا, ەكىنشى دارەجەلى دي­پلومدى ەكونوميكا فاكۋل­تەتىنىڭ ءبىرىنشى كۋرس ستۋدەنتى قۇندىز اماندوسوۆا, ءۇشىنشى دارەجەلى دي­پلومدى ينجەنەرلىك جانە قۇ­رىلىس فاكۋلتەتىنىڭ ءۇشىنشى كۋرس ستۋ­دەنتى ينديرا سانعۇلوۆا يەلەندى. بايقاۋ نۇرعيسا تىلەنديەۆتىڭ “اققۋىمەن” اشىلىپ, ول ىبى­رايدىڭ “گاككۋىنە” جالعاسسا, ارا-ارا­سىندا “دالا سازى” ستۋدەنتتەر ان­سامبلى, “سامۇرىق” بي, “ەۋرازيا اۋەندەرى” توپتارى اسەرلى ءان-كۇي­مەن, ادەمى بيمەن جيىلعان جۇرتتى ءتانتى ەتتى. وسى ارادا ويىمىزعا ورالعان مىنا ءبىر نارسەنى دە ايتا كەتسەك دەيمىز. وتكەن عاسىردىڭ جەتپىسىنشى جىلدارى الماتىدا بۇرىنعى پوليتەحنيكالىق ينس­تي­تۋتىندا “دوسمۇقاسان”, قىزدار پەداگوگيكالىق ينستيتۋتىندا “ايگۇل” انسامبلدەرى قۇرىلىپ, جاستاردىڭ سۇيىكتى ونەر ۇجىمىنا اين­الىپ ەدى. “دوسمۇقاسان” ان­سامبلىن قۇرعان ازاماتتاردىڭ قاتارى جىل ساناپ ازايىپ بارا جاتسا دا, ونىڭ ابىرويى قازىردىڭ وزىندە ءبىر مىسقال تومەندەگەن جوق. ەل استاناسىنداعى جوعارى وقۋ ورىن­دارىنان سونداي انسامبلدەر بوي كوتەرىپ جاتسا, ۇلتتىق ونەردىڭ جاڭعىرۋىمەن قاتار, جاستاردىڭ ارا­سىندا سەرپىلىس تۋعىزار ەدى. باي­قاۋدان بايقاعانىمىز, تالانت­تى جاستار بارشىلىق ەكەن. سولار­دىڭ باسىن بىرىكتىرىپ, ۇلتتىق ونەر­گە باۋلىساق, تاۋەلسىز مەم­لە­كە­تىمىزدىڭ بۇگىنگى جاستارى دا ال­دىڭ­عى اعالارى مەن اپالارىنىڭ ءداس­تۇرىن ۇشتاۋدان قاشپايتىنى انىق. سۇلەيمەن مامەت.